لحمة, عضم مشفى,واحد بيفسحنى, احمدك يارب

بمناسبة الكلاب

اكتر حاجة شدتنى فى الموضوع مش طبيعة شغلانة صاحب الليسانس

لا انا بتكلم عالمبلغ الى هو بياخده

اللى معناه طبعا ان ال 300 جنيه دول بيتصرفوا على تهدية اعصاب الكلاب

غير طبعا فلوس الأكل المستورد, و لامؤاخده تجهيز مكان البى بى

و يمكن كمان تكون عنده داده بتغيرله الكافولة

كافولة؟؟ قصدى البامبرس طبعا

فى الوقت اللى عندنا فيه حسب ارقام احد المراكز الحقوقية

3 و نص مليون واحد بيعيشوا بأقل من دولار فى اليوم, يعنى بالصلاة عالنبى كده حوالى 6 جنيه فى اليوم

و عندنا حوالى 33 مليون و نص بيعيشوا بأقل من 2 دولار فى اليوم, يعنى لو حد شاطر حسبها يلاقيها حوالى 12 جنيه فى اليوم

طبعا ده يشمل الأكل و الشرب و العلاج و اللبس

غير بقى الكهرباء و الغاز و التليفون و مصاريف التعليم

غير بقى و ده الأهم ان الأرقام دى المثبوته فى اوراق رسمية و معروفين

فيه طبعا ارقام مش مثبته خالص, زى اللى بيعيشوا فى المقابر مثلا

و اللى الشارع خلفهم,و بيحتضنهم

و اللى كل رزقهم عالجودة من الناس, و كل همهم انهم يهربوا من عصا مخبر ولا عسكرى درك

فى الوقت ده نلاقى الكلاب بيتصرف عليهم 300 جنيه فى الشهر عشان اعصابهم بس متتعبش

طيب انا نفسى, بشتغل اهه والله ما بحصل ال 300 جنيه اللى بيتصرفوا على تهدية اعصاب الكلاب

بس جاتلى فكرة رهيبة بقى

خصوصا ان اهلى بيلحوا عليا انى اشوف شغل تانى بعد الظهر و انا مش لاقى حاجة مناسبة

لغاية ما قرات المقال ده و فكرت انى اتصل بأى عائلة من دول

و اقولهم انا عاوز اشتغل كلب كام ساعة فى اليوم !!!

كلاااااااااب و ماشى فى البلاد كلااااااااااااب

دى على وزن سواح و ماشى فى البلاد سواح

و دى معناها هيتفهم بعدين

امبارح قدرا كده وقع فى ايدى اداه من اللى بتعذبنى جدا

طبعا محدش بيحب يعذب نفسه

خصوصا لما يكون العذاب ده عذاب نفسى و فكرى رهيب

و عشان ارد لنفسى كرامتها و اعتزازها بنفسها

بطلت من زماااااااااان اقرا الجرائد اليومية

بس وقع امبارح فى ايدى جرنان منهم

و الحمد لله انه عشان مفتوح على صفحة العبقرى جدا الأستاذ عزت السعدنى

كده بقى مبقتش اداة تعذيب ولا حاجة

بقت حاجة هتفرحنى, خصوصا مع العنوان اللى غصب عنك هتلاقيه بيشدك

لو انت ايه, لو مبتعرفش تقرا حتى هتشدك الصورة

المهم بصيت فى الصورة و سرحت و قرأت العنوان و كلى امل انى اقرا موضوع شيق جدا

كان ايه بقى العنوااااااااااااااااااااااان؟؟

مفسحاتى كلاب بالليسانس!!!!!

الموضوع باختصار انه بيتعرض للنماذج اللى مش لاقية شغل من الشباب, او بمعنى اصح النماذج اللى ارتضت بأى شغل عشان مش لاقية شغل

يعنى مثلا واحد بكارليوس تجارة و شغال صبى عالمة, اه والله صبى عالمة بيلم النقظة وراها من عالاستيج

و واحدة خريجة اداب ايطالى اشتغلت بيبى سيتر و فى الأخر اجرت ميكروباص و ساقته !!!

و اللى من غلبه اشترى موبايل بخط بيزنس و بيحكى بحرقة عن اللى عمله فيه البوليس

لما مسكوه و قبضوا عليه عشان بيشتغل من غير ترخيص

و هو اللى لا سرق فلوس حد ولا تاجر بأعراض حد

ولا غرق حد ولا حرق حد

ولا جاب لحد اكل مسرطن,هو كل الموضوع انه حب يكسب قرشين

اما بقى صاحب العنوان ده اللى خلى قلبى يبكى

ليسانس حقوق و بيشتغل مفسحاتى كلاب,

بياخد الكلاب تتفسح و تتمشى عالنيل 3 ساعات فى اليوم ب 300 جنيه فى الشهر

ما هو لازم برضه الكلاب تتفسح و إلا نفسيتها تتعب برضه

مش لازم نهيألها الجو المناسب للتكاثر عشان يجبوا لما كلاب صغنتوتة و نلاقى فرضة عمل لكل 3 كلاب !!!

افتكرت احمد ادم فى مسرحية حودة كرامة لما مشى فى مظاهرة فى امريكا لناس بيهتفوا و يقولوا

we want protection for street dogs

و هو من طيبته يا عينى فاكرهم عاملين مظاهرة عشان محدش يبات فى البوكس !!!

القصد يعنى ان الكلاب دى حاجة مهمة جدا فى حياتنا و من غير منعرفش نعيش

يعنى الناس الغلابة اصحاب الكلاب دول يعيشوا ازاى لو معندهمش كلب يفسحوه؟؟؟

ولا احساسهم يبقى ايه بقى لما ضيف ييجى يزورهم و معاه الكلب بتاعه و ميلاقيهمش عندهم كلب ولا كلبة تونس الكلب السينجل بتاعه

و يا فضيحتهم بقى لو حد ما عائلتهم شم خبر انهم الوحيدين اللى معندهمش كلب

ممكن يقاطعوهم و يحرموهم من الميراث

الكلاب يا جماعة ليها وضع عالمى, مينفعش نستقل بيه

الله يمسيك بالخير يا عم نجم لما كتبت قصيدة كلب الست

سبحان الله, يعنى الإهتمام بالكلاب ده من زمان بقى

كان مبدع والله لما ختم قصيدته الجامدة و هو بيخاطب الحيوانات و قال:

بشرى لأصحاب الديول, و اللى له اربع رجول

بشرى لإخواننا البهايم من جمايس او عجول

اللى صاحبه يا جماعة له غناوى فى الإذاعة

راح يدوس فوق الغلابه والنيابه بالتباعه

انت تسوى في النيابه تسعميه م الغلابه

طب ياريت يافوكس كنا ولا تربطنا القرابه

هيص ياكلب الست هيص لك مقامك في البوليس

بكره تتولف وزاره للكلاب ياخدوك رئيس

بركاتك يا مصر

بقالى مدة بتابع كلام الناس عن حكاية الشجرة المبروكة اللى ظهر عليها نقش لفظ الجلاله فى طريق مصر اسماعيلية

كلام كتييييييييير و كل واحدة عنده روياته اللى بيدافع عنها

و اللى بيحلف ان ابنه راح و صورها بالموبايل

و اللى فرحان و يقول ظهر الحق و كلام من هذا القبيل

و المحافظة تحط عليها حراسة عشان التدافع من الناس و تعطيل الطريق

و انتداب مسئول من كلية الزراعة فى جامعة عين شمس عشان يقول ده طبيعى ولا من فعل البشر

و البيت بيتك يعمل عنها فقرة

و الجرائد تهتم بالموضوع على انه يطلع منه سبوبة فى شد القارىء

غير بقى الناس اللى بيأكدوا ان الشعب ده عبقرى فى انه يكسب من ولا حاجة

اللى عمل نصبة شاى و قهوة عند الشجرة

و اللى وقف بعربية حمص الشام

غير بقى البلطيجة من نوعية بتوع الكارتة بتاعة الميكروباص

اللى ياخدوا اتاوة على اللى عاوز يصور بالكاميرا ولا الموبايل

يعنى شغل على كبير قوى

و اهه بترزق يا بيه

انا طبعا ماليش اى صفه انى احكم على الشجرة و النقش على اعتبار انى مش متخصص ولا حاجة

بس لما شفت الصورة لقيت النقش بارز عن الشجرة و لونه غامق, و بقية الشجرة لونها فاتح زى ما تكون اتمسحت على ماكينة عند اى نجار

يعنى فى رأيى ان حد عملها

و غير كده, لما هى حاجة طبيعية ليه مشفنهاش غير دلوقتى؟؟

و الأهم من ده كله

اشمعنى مصر من دون كل الدول

و شعبها من دون كل شعوب الأرض اللى ربنا يخصه بطهور معجزاته

ده احنا حتى شعب كسول ولا بيعمل حاجة

غير انه بيحب يكسب بالفهلوة و تفتيح المخ

احنا عايشين كبت سياسى و قهر اجتماعى بيخلينا عاوزين نصدق اى معجزة تحصل عشان تأكد لنا ان ربنا كبير

يعنى نوع من تصبير نفسنا يعنى, نوع من التواكل مش التوكل

ما هو ربنا اللى اظهر النقش على الشجرة قادر انه يغير نظام حياتنا

لا ربنا مش هيغير نظام حياتنا غير لما نغير احنا نفسنا الأول

ان الله لا يغير ما بقوم حتى يغيروا ما بأنفسهم

فوق كل ده, احنا شعب بيؤمن بالخرافة بشكل كبير

و دى ارقام المركز المصرى للبحوث الإجتماعية و الجنائية فى 2003

ان المصريين صرفوا حوالى 10 مليار جنيه على الدجل و الشعوذة و فك الأعمال

و ان حوالى 300 الف واحد دجال و مشعوذ بيسترزقوا على قفا الهبل و اللى بيصدقوا الكلام ده

غير ان المصريين بيؤمنوا ب 274 خرافة

طبعا ده من 4 سنين شوفوا انتوا بقى دلوقتى بقوا كام

بالمناسبة انا افتكرت لقائ لوزير البترول فى البيت بيتك

كان المذيع بيسأله عن الإكتشافات البترولية و الغاز الطبيعى

رد الوزير بأدب و فخر ان عندنا فى مصر نسبة نجاح الإكتشافات 3 اضعاف المعدل العالمى للنجاح

طبعا حاجة تفرح

ف المذيع من فرحة الخبر سأله طيب ايه السبب, الأبحاث مثلا اللى بتتعمل بل البحث و التنقيب

رد الويزر قاله ان مصر بلد مبروكة, يعنى بلد بركة !!!

و ده بيوضح قد ايه التفكير فى البركة او الحاجات الخارقة ميسطرة على تفكيرنا بشكل كبير

حصل و بيحصل فى مصر

امبارح بقى ايه, كنت ماشى فى الشارع ناحية الدقى كده

و خير اللهم اجعله خير لقيت 3 قمرات زى الشربات مش عارف ليه قولوا هيه قولوا هيه

هيه هيه هيه

المهم ان القمرات اللى زى الشربات دول كانوا اجانب, و كان لبسهم مش ولابد يعنى

او هى واحدة بس اللى لبسها مش ولابد, لابسه جينز و بادى

بس البادى هاف ستوماك و كات

و الجينز ساقط !!!

طبعا انا حاسس بكل اللى هيريل على المنظر ده, لأن انا نفسى اتهبلت

بس قبل ما اروح فى حالة الإزبهلال دى شفت حاجة نادرا ما اشوفها

شفت الشعب المصرى بكل طوائفه, عيال و شباب و رجالة كبار

و حتى البنات بيبصوا على ال 3 قمرات اللى زى الشربات دول

حالة كده مشفتش زيها فى التفاف الشعب المصرى حواليها

يعنى لا تعديلات دستورية, ولا سجن ايمن نور, ولا المحاكمة العسكرية بتاعة الشاطر

ولا اللى ماتوا فى العبارة, ولا اللى داخوا و اغمى عليهم بسبب اكياس الدم

ولا مثلا موضوع الإنتخابات ولا اى حاجة من دى قدرت تلف الشعب المصرى عليها زى ما عملوا ال 3 قمرات اللى زى الشربات دول

حاجة واحدة بس لفت المصريين حواليها, كان حسن شحاته و رجالته بتوع كاس الأمم

و يتهيألى ان لو ال 3 قمرات اللى زى الشربات كانوا فى الإستاد مكانش حد خد باله من المنتخب خالص

اللى هيجننى بقى

ان ممكن الشباب اللى كان ماشى وراهم من اللى بيتحسر على شبابه و انه يا حبة عين امه مش لاقى جواز ولا انحراف حتى

و الرجالة الكبار ممكن برضه يبصوا من نوعية جتنا نيلة فى حظنا الهباب بتاعة عمنا قاسم السماوى

و طبعا مش محتاج اوضح ليه البنات كانوا بيبصوا !!!

اللى استغربتله بجد و فضلت اسأل نفسى عليه هو العيال الصغيرة اللى كانوا عاملين زى زفة للقمرات دول

عيال لا يتعدى سن الواحد فيهم 7 ولا 8 سنين بالكتير

لا و ماشيين فى الشارع يقولوا اللى عاوز يبص يبص

هما جايين هنا

نازلين المترو

يا نهار ابيض, حتى العيال!!!

مش عارف لما افتكرت مرحلة الطفولة بتاعتى بقيت متأكد انى معدتش على المرحلة دى

ده عشان بالمقارنة بالعيال دى اما مكنتش طفل

انا كنت ملاك

الحاجة حواجة

لو سمحت دقيقة

معلش متعطل

مش هعطلك متخافش

يا سيدى انا مستعجل

بقولك ايه اسمع الكلمتين اللى انا حافظهم متخلينيش اتنرفز

طبعا مع التهديد الصارخ ده رضيت مرغما انى اسمع الأخ الفاضل المهذب المحترم اللى كان قرب يمد ايده عليا عشان مش عاوز اشوف المنتج اللى بيسوقه

هو اصلا كان شكله مش طايق نفسه و بيتلكك

وقفنا جنب عربية زلمكة شنطتها مفتوحة و فيها خلاطات و مكاوى و شوية اجهزة كده

و علبة تليفون نوكيا مش فاكر الموديل بتاعه فى الصالون من جوه

و ابتدى الشو اللى انا حفظته من كتر ما شفته و سمعته

احنا بنقدم لحضرتك ازازة برفان و فيها كارت

حضرتك بتفتح الأزازة هتكسب خلاط او مكوة او تليفون نوكيا

و لو لقيت الكارت كسبان بس هتدفع تمن الإزازة 40 جنيه

و لو لقيت الكارت مش كسبان هاتخد ازازة البرفان مجانا و هتاخد كمان 20 جنيه

طبعا انا مش متأكد ان الإزازة فيها ميه بريحه و بس

يعنى انا اكاد اجزم انها ميه مجارى

المهم بصتله و قولتله طيب لما كل الكروت كسبانة مفتحتش ازازة ليييه؟؟؟؟

بدأ دلوقتى اللى بيكلمنى و الشرر بيطق من عينه

قاللى انت فاكرنى حرامى(يعنى هو انا اللى حرامى؟؟؟)

المهم اتكلم كلام كتييير قوى توهنى فيه

انا اصلا كنت بسمعه عشان اتقى شره, لأنه شكله كان ناوى عالشر

قلتله شكرا و مشيت

سمعته بيقول مع الف مليون سلامة, بيقولها بأسلوب ساخط و ساخر و ناقم فى نفس الوقت

بس انا بقى مزعلش قوى, عشان بصراحه حسيت ان سخريته دى مش عليا انا

على قد ما هى عالبلد و حالها و على احتياجه انه يقف طول النهار فى موقف ميكروباص يرخم و يتنح عاللى رايح و اللى جاى

و انا ماشى بعده يخطوتين شفت واحد تانى برضه( بيتنح) على واحد زيى ماشى فى الشارع و الراجل بيقوله والله مستعجل والله مستعجل

افتكرت جمله عبقرية قالهالى مهندس عبقرى لما اضطر انه يشتغل سواق تاكسى

دى دنيا ***** و الحاجة حواجة

عالبطاطا البطاطا, ياعينى عالبطاطا

لا تجيبلى شكلاته لا بلاش يا وله

روح رجع البطاطا لا بلاش يا وله

لا تجيبلى شكلاته لا بلاش يا وله

لا ترجع البطاطا لا بلاش يا وله

الله يرحمك يا سندريلا, اكيد اكيد اكيد مكنتيش هتقولى كده لو عرفتى المعلومات الرهيبة اللى عرفتها عن البطاطا

طبعا محدش يختلف على الشوكولاته ابدا

و لا يمكن برضه تتقارن بالبطاطا

بس لما الواحد يكون لسه صغنون و بيبتدى حياته ومش لاقى يجيب كارت المويايل ماشى

لما واحد يكون خريج و امكانياته الفكرية و العقلية محترمة و صاحب الشغل بيعاملة على انه مبيفهمش حاجة برضه ماشى

لكن لما الواحد يروح منظقة زى جولف سيتى اللى فى العبور

و يشوف هناك فيلا, سورى قصدى قصر

لأن اللى شفته هناك مش فيلا ده لا يمكن انه يقل عن انه يكون قصر

كووووووووووول ده و احنا لسه فى عادى

لكن لما الواحد يعرف بقى ان قصر من دول معروض للبيع بكااااااااااااااااااااااام؟؟؟

ب 125 مليون جنيه( انا كان هيغمى عليا لما سمعت الرقم, امال اللى بيشيلو يعمل ايه؟)

يعنى وارد جدا ان صاحب القصر يكون بيزنس مان رهيب, او ممكن كمان يكون مستثمر اجنبى و عارف حب المنظرة اللى فينا,

و ممكن برضه يكون واحد من اللى بيسهلوا قروض البنوك

او من اللى بيتاجروا فى الخضار و الفواكه المسرطنة

او ممكن يكون بتاع رقاصة او مدرب كورة

او حتى تاجر مخدرات

لكن المفجأة ان صاحب القصر ابو 125 مليون جنيه

طلع تاجر بطاطا

اه والله بطاطا

حتى ان اللى بيحكيلى قاللى يا بطاطا يا بطاطس

الرقم برضه و تأثيره يا جماعة, خلى اللى بيحكى اتلخبط بين البطاطا و البطاطس

المهم لما عرفت, حطيت الصورة دى جنب صور كتير قوى

زى مثلا مهندس شغال زبال ب 250 جنيه

او خريج علوم بتفوق بيكسر حجر فى الجبل

او دكتور مثلا شغال سواق تاكسى

او ملايييييييييييييييين كتير لا لاقييت شغل ولا حتى اللقمة

جمعت الصور دى فى دماغى و مبقتش حاسس غير بحاجة واحدة

لا عاوز ابقى غنى ولا اشترى القصر

عاوز اروح البيت اعمل شهادتى قرطاس لب !!

لييييييييييييييه؟؟؟

ليه لما واحد يكون عبقرى بيكون شحات؟؟

انا قصدى ليه لما واحد دماغة نضيف مش بيلاقى حد يقدر

و اللى اقل منه يعامله على انه مبيفهمش؟؟

ليه لما الواحد يكون عنده ضمير بيتحارب؟؟

ليه لما الواحد بيكون بيعامل ربنا, الناس مش بتسيبه فى حاله؟؟

انا بس بسأل و بستغرب عشان اعرف واحد تقريبا عبقرى, و تقريبا مش لاقى ياكل

و مديون و حالته صعب

فى الوقت اللى غيره و اللى اقل منه فى الإمكانيات و الخبرات و كل حاجة

اغنى منه, بلاش الغنى

مرتاح فى كل حاجة و بيعرف يخلص اموره؟؟

دخل الشتا و قفل البيبان عالبيوت

حاسب يابنى,بص قدامك

ما تفتح يا اخ, انت ماشى وسط ناس

يا حيوان, هو البعيد اعمى مبيشوفش

اه ما هو مش حاسس باللى بره

ايوة ياسطى, بعيد عن الميه وحياتك

فوق المطب الجاى ياسطى

حرام على 5 دقايق تأخير فى الجو ده امضى تأخير

الجو ده بتاع قعدة تحت البطانية

نفسى اشرب شاى

اقفل القزاز ده, احنا كده هننشف

البس جاكيت يا حبيبى

دول بس حتت من كلام المواطن المصرى لما الدنيا بتمطر

المطر فى اى حته معناه خير,إلا عندنا معناه طين و بهدلة و رفع ديول الفساتين و الجيبات و البناطيل و الجلاليب

و يا سلام بقى لو مع المطر ده ماسورة ميه تنطسر زى ما حصل كده فى الشارع عندى

كنت خلاص قربت اجيب عوامة

ليا قريبى عايش فى اوروبا, بيقولى هناك المطر مبيبطلش بالأسبوع و ال 10 ايام بدون انقطاع

و متشوفش الشوراع غرقانة كده

اضيف للكلام ده خبر قرأته ان فى هولندا عملوا اسفلت بيمتص ميه المطر عشان يقللوا حوادث العربيات

اقوم ارجع تانى للماسورة المكسورة و العوامة اللى هاروح بيها الشغل

بس برضه, مهما كانت الشوارع متبهدلة

و مطينة عالاخر و محدش يعرف يمشى فيها

هفضل احب المطر, و جو المطر, و ريحة المطر

و المشى تحت المطر, و اكل ايس كريم و انا بتمشى تحت المطر

و حتى لو مش هقدر اعمل ده كله, هحس بجو الشتا فى كلام المبدع صلاح جاهين

دخل الشتا و قفل البيبان عالبيوت

و جعل شعاع الشمس خيط عنكبوت

و حاجات كتير بتموت فى ليل الشتا

لكن حاجات اكتر بترفض تموت

ارحمنا يارب

عاوز اخش الحمام,عاوز اخش الحمااااااااااااااااااااام

يا بابا مزنووووووووووق, هعمل على روحى,

يا باباااااااااا, يا بابااااااااا

يوووووووو بقى

ده مش كلام عيل رخم فى السينما ولا فى الإستاد

حكم العيال الصغيرة دول عليهم حركات تغييييييييييييييييييظ

انا شايف الجمهور ابتدى يحدف طوب

امال ده كلام مين ياعم الحاج

للأسف و انا مقدر حجم الصدمة, ده كان عيل صغير فى صلاة الجمعه

ايه؟؟ بتقولوا ايه ياولاد؟؟ صلاه ايه

صلاه الجمعة, ايوة والله صلاه الجمعة

طبعا كلام الواد ده اللى هو ابن الراجل اللى كان بيصلى جنبى خلانى معرفش اركز

و قلت اخلص صلاه بس و اكلمه, لقيت واحد محترم قاله لو مش هيعرف يصلى متجيبهوش

قلت خلاص, الراجل قاله المفيد

المهم كل اسبوع انا بقعد فى نفس المكان, و نفس الراجل بيقعد قريب منى

كل اسبوع تقريبا الواد ابنه يقعد يلعب, و ينام و يتدلع

ايه ده, ده جامع ولا ملاهى!!!!؟؟؟

المهم اللى فكرنى الإسبوع ده بالكلام ده كله, برضه اتنين عيال كانوا بيصلوا فى الصف اللى قدامى

العيال ايه, يضربوا بعض, بالكف و الدراع

بالشلوت و خناقة, و ده يزق ده, و ده يمسك فى شعر ده

لأ و الغريب انه لما كنا بنركع ولا نسجد, كانوا يبطلوا خناق و يسجدوا و يركعوا

و طبعا ضيعوا تركيزى

انا بس بستغرب ان تقريبا كل صلاه بيبقوا قدامى انا بالظبط, ما علينا

فى جملة ضياع تركيزى ده, فكرت ان العيال دى بتيجى لوحدها الجامع ليه؟؟

و لما اهلهم بيشجعوهم على التعود عالمساجد ليه مبيروحوش معاهم؟؟؟

يعنى بدل ما يسيبوهم لوحدهم ياخدوهم معاهم, على الأقل العيل من دول هيحس انه كبير و هيتكسف يعمل اللى بيعمله ده

صحيح عندنا مثال لواحد مبيقولش لأبنه بتعمل ايه زى اخينا ابو الواد بتاع الحمام ده

لكن اكيد فيه ناس تانية مش هيسكتوا عالغلط

المهم بعد ما سلمنا و خلصنا صلاه العيال مسكوا فى بعض جامد بقى

زى ما يكونوا مستنيين الصلاه تخلص عشان يتخانقوا

حوشت بينهم لقيت كام واحد بيساعدونى على استحياء

و لما مسكت واحد فيهم بقوله بعصبيه انت جاى تصلى ولا تلعب؟؟؟

لقيت واحد بس بيقولى بالراحه عليه

بصراحه استغربت قوى ان محدش كلمهم خااااااااااااالص

يعنى يا نسيب العيال يعملوا الغلط يا نعنفهم و نخليهم يكرهوا المساجد؟؟؟؟؟؟؟؟؟؟؟؟