امل

من كام يوم كده قرينا عن البنت اللى اسمها امل من الغربية اللى اختفت

بنت نصرانية و عندها 18 سنة و بيقولوا ان المسلمين خطفوها يعنى عشان تتأسلم

المهم يعنى ملخص القصة ان البنت اخدت اذن من شغلها ساعة وو من ساعتها مرجعتش

النهاردة يبقى بقالها حوالى 10 ايام

المهم يعنى قالوا انهم شافوها مع واحدة منتقبة

و بعد ما اختفت بكام يوم اتصل واحد اسمه محمد عبد الله و قال لابوها ولا لأمها مبروك بنت ربنا هداها

راحت المباحث جايباه و حققوا معاه و سابوه

يعنى بصراحة مش عارف اقول ايه,قصة بقت سخيفة جدا الصراحة

اى حد يختفى من مسلمين ولا نصارى يتهموا الأخر انه بيأسلمه ولا بينصره

مبدأيا كده مفيش دين يتأثر بدخول الف ولا خروج 10

و بعدين يعنى هى اول ما تحتفى كده تبقى تأسلمت

يعنى حتى مش يستنوا يوم ولا اتنين ممكن تكون فين حتى

لا و الأخوة الأقباط عاملين اعتصام فى الكنيسة من ساعتها

و باعتين رسايل لشيخ الأزهر و رئيس الجمهورية و مشعارف مين تانى

انا مش بتكلم فى ملابسات الأختفاء ولا حتى اسلامها لو كان حصل

انا بتكلم فى الطريقة اللى بنعالج بيها مشاكلنا الداخلية

و نحط 100 خط تحت الداخلية دى

اللى الناس مش واخدة بالها منه ان فيه ايادى خفية تلعب عشان تقوض اساس الوطن

ده ان كان لسه متبقى بقية من الوطن

و انهم يخلوا فيه طائفية و تبقى حجة عشان ييجوا عندنا

و يتكرر عراق تانى و لبنان تانى و ابوغريب تالت و رابع

الناس دى بقى مالهمش حل, لانهم زى الطفيليات اللى عايشة على امتصاص الغذاء من النباتات

طبعا مش هنقطع النبات

لكن بالنسبة للفرع اللى سايب الطفيليات تتغذى عليه انا بقى بهديله الصور دى يمكن يفوق

ثورة العطشى, و الباقى فى السكة

الواحد بقاله مده مدخلش عالبلوج بتاعته, الحتة اللى بيحس فيها انه براحته

الإكتئاب و الملل بقوا ضيوف اعزاء عليا, او على رأى واحدة صاحبتى احنا اللى بقينا ضيوف اعزاء عليهم

يادوبك الإسبوع اللى فات حسيت ان فيه حاجة جديدة

خير اللهم اجعله خير داخل من الباب لقيت تامر بيه امين فى البيت بيتك بيتكلم فى التليفون عالهواء مع محمد ثروت

الراجل كان بيقوله ان ناس قافلين الطريق الساحلى الدولى عشان بقالهم مش عارف كام شهر المية مقطوعة عنهم

و فعلا حجزوا السيارات لمدة حوالى 10 ساعات عشان المحافظة تستجيب لطلباتهم و توصلهم المية الحلوة

و تامر بيه زعلان قوى من الإسلوب غير الحضارى للمطالبة بشوية مية

كان نفسى اسأله لو نزلت السوبر ماركت و ملقتش الميه المعدنية اللى بتشربها هتحس بإيه

المهم الفقرة اللى بعدها كان المفتى جاى يتكلم عن موضوع الختان و الفتوى الجنان اللى طلعها,و دى ممكن نعملها بوست لوحدة اصلا

و تامر امين حكى له على اللى حصل من الأهالى و كده, يقوم بقى فضيلة المفتى بقى ايه

يقوم يناشد الأهالى انهم يفرجوا عن العربيات المحتجزة

و يقولهم ان كده غلط و حرام, و يضرب امثله من مواقف للصحابة بحاجات كويسة

و ضرب مثل لمحافظة الشرقية بالكرم, مش عارف ايه علاقة الكرم بالمية المقطوعة بس ما علينا

و يقول ان ممكن يكون فيه ناس عيانة و مش عارفين ياخدوا دوا السكر

اكيد طبعا واحد رايح الساحل الشمالى و اتأخر هيتعب و يموت كمان

و لا جاب سيرة المحافظة ولا انها المسئولة عن حالة الكبت و الإحتقان اللى وصل الشعب ليها

ولا اتكلم عن اهمية المية للناس اللى مش بيحسوا خالص

ولا ضرب مثل بسيدنا عثمنا لما اشترى نص البئر من الراجل اليهودى عشان المسلمين يشربوا

ولا مثلا عن سيدنا عمر لما كان بيخاف انه يسئل عن بغلة تعثرت فى الطريق

مش كام الف واحد مش لاقيين يشربوا

ولا عن سيدنا ابو بكر لما كان بيصرف امله كله فى سبيل الله

مش مناقصات تغيير المواسير و الله اعلم باللى بيحصل فيها

باختصار خلى الأهالى هما اللى غلطانين وش كده

اللى مش قادر افهمة ان محدش اخد باله ان حالة احتقان زى كده ممكن تعمل ايه؟

و لكم فى اعتصامات العمال عبرة

محدش فكر ان الجوع و العطش ممكن يخلوا الناس يهبوا و يثوروا عشان اللقمة و بق الميه

اما اللى انا متأكد منه بجد ان الحادثة دى هتبقى بداية جنب اعتصامات العمال فى بناء نظام توعية جديد عند الشعب و الناس العادية

ممكن,ممكن فى يوم من الأيام يقوم يثورة

و الدليل اهه

ثورة الناس العطشانة و هما بيطالبوا بكباية مية نضيفة

دلوقتى افتكرت صوت الشيخ امام العميق و الدافى قوى و هو بيغنى و انا بغنى معاه

هلى يا شمس البشاير

طابت و ان الأوان

طلى و حلى الستاير

نور الأشاير يبان

و ارمى الضفاير مداين

فوق المكان و الزمان

مصر الشباب العزيزة

قامت و كان اللى كان

قامت و كان اللى كان

قامت و كان اللى كان

اتنين

من ساعة ما عرفت ان وجيه عزيز هيغنى فى الساقية عملت حسابى انى احضر

شجعنى على كده اصحابى اللى قالولى هنروح مع بعض

الصراحة انا مكنتش سمعته قبل اليوم الجامد ده, كنت قريت عنه بس و سمعت عنه من اصحابى

لكن لما روحت لقيت حاجة تانية خالص

لقيت ان اللى قريته و اللى سمعته عنه لا يوفيه حقه ابدا

بيغنى بكل حواسه و مش بيغنى اى كلام

و الحانه و الفن اللى بيقدمه بوجه عام حاجة كده تستحق ان مصر تنتسب للراجل ده

زى ما بتنتسب للاهرام و ابو الهول و شرم الشيخ

بمعنى اننا نفخر ان عندنا فنان بالشكل ده

لما دخلت القاعة اصلا بالعافية لقيت مكان عالسور, زحمة رهيبة, ناس بتحب الفن اللى بجد

خصوصا ان كان معاه الشاعر على سلامه كاتب معظم اغانيه

م الأخر كانت امسيه جامدة جدااااااااااااا هما الأتنين مع بعض

وجيه عزيز و على سلامة

و مع وجيه عزيز اغنى

قول معايا قول بجد

قول معايا قول بجد

هى عيشة ولا موتة ولا فوته فى حارة سد

قول لحد أى حد

قول لحد أى حد

حد رايح حد غايب حد جاى

حد لسه فينا فايق حد حى

قول ياعم, قول يا هم

قول لحد لسه فيه عنده دم

امايه.. و انتى بترحى بالرحى..

على مفارق ضحى..

وحدك و بتعددى

على كل حاجة حلوة مفقودة

متنسنيش يامه فى عدودة

عدودة من اقدم خيوط سودا فى توب الحزن

لا تولولى فيها ولا تهللى...

و حطى فيها اسم واحد مات

كان صاحبى يامه...

و اسمه

ناجى العلى

عبد الرحمن الأبنودى-الموت على الأسفلت

------------------------------------------------------------------------------------------------

الأبيات دى كل ما اقراها تلمسنى من جوه, مش عشان كلامها البسيط و معناها العميق بس

كمان عشان كل مرة اقراها يظهر قدامى ناجى العلى اللى الأبنودى يقصده فى الأبيات على انه حاجة من الحاجات الحلوة اللى فى حياتى و

بتموت كل يوم

الأبنودى يقصد ناجى العلى الرسام الفلسطينى

و انا ناجى العلى بالنسبة لى مجرد رمز, رمز لكل حاجة فى حياتى او المفروض انها تبقى فى حياتنا كلنا و بتموت

الجمعة اللى فاتت....و الجمعة اللى قبلها

يوم الجمعة اللى قبل اللى فاتت اول ما صحيت من النوم كنت سامع صوت الترانيم جاى من الكنيسة اللى ورا البيت

الصراحة, للحظة واحدة اتضايقت من الصوت العالى مع انى كنت صحيت من النوم خلاص

بس فكرت فى الموضوع, صوت ترانيم و صلوات جاية من الكنيسة, ايه اللى يضرنى فى كده؟؟؟

خصوصا ان المربع اللى انا ساكن فيه, موجود فيه حوالى 6 مساجد و دى الكنيسة الوحيدة اللى فيه, مع العلم ان اقرب كنيسة مش اقل من 10-15 دقيقة مشى

و غنى عن الذكر طبعا ان صوت الأذان فى المكيروفون 5 مرات فى اليوم, و فى الصلوات الجهرية كمان

ده طبعا غير اذان الفجر لوحده, عشان بيبقى فى وقت الناس كلها نايمة, ف لو المسلم بيصى عشان يصلى فرض ربنا

المسيحى يصحى ليه؟؟

المهم انى ملقتش مبرر لأنى اكون متضايق من الصوت اللى جاى من الكنيسة,لأن كل واحد من حقة يقيم شعائر دينه زى ما يحب

-------------------------------------------------------------------------------------------------------

نفس اليوم بقى فى صلاة الجمعة, فى النص التانى من الخطبة الإمام اتكلم عن موضوع الفتنة الطائفية اللى كان حصلت من اسبوعين فى العياط

و قال ان الجانبنين محتقنين بسبب الإقتصاد الضعيف و الفقر و الغلاء و انحطاط الأخلاق و غيرهم من الأسباب اللى احنا عارفينها

و بعدين وجه كلامه للمسلمين قال ان لو المسيحى عنده مبدأ احب مخلصيك و اكرم اعدائك و من ضربك على خدك الأيمن صعر له خدك الأيسر

ف احنا عندنا قول الله تعالى " خد العفو و أمر بالعرف و أعرض عن الجاهلين

كذلك قول الله تعالى " لا ينهاكم الله عن الذين لم يقاتلوكم فى الدين أو يخرجوكم من دياركم أن تبروهم و تقسطوا إليهم

و ضرب امثله من السيرة عن عمرو بن العاص مثلا لما كان بيدى الأقباط مال عشان يبنوا كنائس

و عن سيدنا عمر لما رفض يصلى فى الكنيسة فى بيت المقدس و قال لو صليت هنا لأخدها المسلمون و قالوا لقد صلى عمر هنا

و سأل ايه اللى هيضر المسلمين ان الأقباط يحولوا منزل عادى لمكان عبادة؟؟

و غيره من الكلام الكثير اللى له معنى و دلالات عميقة

انا الصراحة انبسطت من كلامه, خصوصا انه بيتوافق مع اللى حصلى يومها الصبح

و كنت مبسوط ان عندنا خطباء بيعرفوا يتكلموا فى الدين ازاى و انه بيربط بين الدين و الدنيا

و يومها خرجت من الصلاه و انا متكيف قوى

--------------------------------------------------------------------------------------------------------

الجمعة اللى هى امبارح بقى, اول ما الخطيب بدأ يتكلم حسيت باختلاف الصوت, لغاية ما اتكلم كلمتين كمان عرفت انه غير الخطيب اللى بيخطب كل مرة

صحيح ان الخطيب ده بييجى من وقت للتانى, بس اشمعنى الجمعة دى؟؟؟

بعد اللى قاله الخطيب الأولانى الجمعة اللى فاتت؟؟

و اللى أكد لى الموضوع ده انى لقيته بيتكلم عن ايه؟؟؟؟؟؟؟

عن الغيبة و النميمة!!!!!

صحيح هى الغيبة و النميمة حاجات فى الدين و الناس لازم تعرفها

بس محدش تقريبا مش عارف الغيبة و النميمة

و بعدين احنا بنقول الواحد يختار التوقيت المناسب

يعنى مينفعش فى وقت كل الناس بتفتى, و تلاقى واحد بيقولك إرضاع الكبير

و تلاقى واحد يقولك التبرك ببول الرسول صلى الله عليه و سلم

و يكون عندنا مواجهات طائفية بين مسلمين و اقباط

ناهيك طبعا عن الفساد بأشكاله و اللى منهم الرشوة

و ييجى فى الاخر يقول الغيبة و النميمة !!!!

ولا احنا كل واحد بيقول كلمة حق مبيعشلوش صوت !!!!

المالكى

كتير عندنا فى الأرياف ناس عواجيز حدود معرفتهم اخره الحارة اللى فيها بيتهم, و تلاقى الواحد من دول لا عمره طلع بطاقة ولا حتى راح البندر, ناس طبيعيين و على فطرتهم و تحبهم اول ما تكلمهم و متحبش تسيب قعدتهم

افتكرت الكلام ده كله لما سمعت خبر فى برنامج على قناة فضائية بيقول ان رجل فى السعودية, اسمه المالكى و عايش فى قرية بنى مالك فى جنوب محافظة الطائف, ماله الراجل ده, حاجة بسيطة جدا, عنده 91 سنة و اول مرة يطلع بطاقة فى حياته و يركب عربية, سيارة يعنى !!!!!

الحكاية انه لما تعب و اضطر يروح مستشفى فى جدة كان لازم يتنقل من الطائف لجدة فركب العربية, و طبعا المستشفى كان لازم تسجل بيناته فاضطر انه يطلع بطاقة, خبر غريب بس بيحصل و عندنا منه نماذج كتير قوى فى مصر, المهم ان الخبر اثار عندى شوية نقاط

اولا : ان الراجل اضطر انه يروح المستشفى لما تعب, معنى كده انه اول مرة يتعب و يروح المستشفى فى 91 سنة هو كل عمره, ما شاء الله عليه, عايش فى قرية, الهوا اللى بيتنفسه نضيف, الأكل من غير مبيدات, اللى بيقولوا عليه اورجانيك, شغلته رعى غنم , يعنى طول النهار بيلف وسط الزرع و الخضرة, رياضة كده و هو فى سن كبيرة, غير انه ميعرفش ابعد من حدود قريته

فين بقى الصحة دى عندنا مع كم المبيدات المسطرنة اللى بناكلها طول الوقت؟؟ و ما يصاحب ذلك من زيادة عدد المرضى فى معهد الاورام و معهد ناصر؟؟ بلاش دى, فين الصحة دى عندنا فى شاب عنده 20 ولا 30 سنة و مبيقدرش يشتغل نص شغل الراجل ده؟؟ فين الهوا النضيف اللى خلاص اتشبع بثانى اكسيد الكربون؟؟؟ فين روقان البال و مشاهدة الغروب مع كباية شاى لذيذة كده و ان الواحد ميبقاش شايل اى هم؟؟ فين الإصطباحة بمنظر الخضرة و الغنم و الحياة البدائية اللى مفيهاش اى نوع من انواع التزييف؟؟فين المية النضيفة اللى مفيهاش نفايات؟؟ و الأهم من ده فين النية السليمة اللى اكيد متلوثتش بسبب اخبار القتل و الحرق و الإعتقال و الإغتصاب والتحرش و الفساد و مشاكل المرور و تأخر سن الزواج؟؟؟

ثانيا : ان طول الحلقة 2 مذيعين و هما بيحاولوا يطلعوا بمعانى من الخبر ده , و ازاى ان الواحد ممكن يبدأ فى اى حاجة حتى فى سن متأخر و الكلام ده , و المذسعة التالتة تاعبها قوى فكرة ان ازاى واحد عايش من غير عربية, نفسى افهم يعنى بدل ما نحاول نطلع بالفكرة او الدروس العميقة من الخبر ده برضه بنعالجه بتفاهة, مين بقى اللى وصل الناس التافهة دى لإنها تخاطب عقول الشباب؟؟ هو يعنى عشان برنامج بيخاطب الشباب مينفعش نكلمه فى مواضيع بتهمة بلغته هو؟؟ لازم يعنى تبقى المواضيع تافهة عشان خاطر الشباب؟؟؟؟؟

بهية

المشهد الأول

يجلس سعيد و زوجته الأجنبية مع والده فى البلكونة, و تأتى الأم بصينية الشاى و فى الداخل ينبعث صوت محمد منير بكلمات صلاح جاهين ( مصر النسيم فى الليالى و بياعين الفل, و مراية بهتانة عالقهاوى اوزرها و اطل,مصر السما الفزدقى عصافير معدية, و القلة مملية على الشباك مندية)

ابو سعيد : و ناوى تعمل ايه يابنى بعد ما اتغربت السنين دى كلها؟؟

سعيد : يعنى هاعمل ايه يابابا, هنا مبقتاش بلدى خلاص, انا اتعودت على عيشة برة, و ولادى هيتعلموا برة, هنا مبقاش مكان ينفع للمعيشة خلاص

ابوه : طيب يابنى انت عشت برة و اتعلمت ارجع بقى عشان بلدك

سعيد : يضحك ضحكة سخرية, بلدى؟؟؟ هى فين بلدى دى؟؟ بلدى دى اللى مقدرتنيش و انا متفوق فى الجامعة ولا بشغلانة كويسة ولا بحياة ادمية, افكر فيها دلوقتى؟؟

المشهد الثانى

اخو سعيد فى الجامة يقود مظاهرة طلابية للإعتراض على اعتقال بعض زملائهم مع صياح الطلبة و المطالبة بالإفراج عن زملائهم

المشهد الثالث

نفس المشهد الأول ولكن بإختلاف المكان, الأسرة مجتمعة امام التلفزيون و معهم اخو سعيد, و بعد فترة يطرق الباب بقوة ة يدخل بعض الضباط و يصطحبون اخو سعيد

ابوه :خير يابنى فيه ايه؟؟

الضابط : مفيش يا حاج, شوية و هايرجع علطول

المشهد الرابع

سعيد و المحامى فى المديرية يحاولوا معرفة مكان اخوه بلا فائدة و يقابلوا هناك الكثير من اسر الطلبة يحاولوا معرفة اماكن احتجاز ذويهم

المشهد الأخير

سعيد يودع زوجته فى المطار, و يذهب لقيادة مظاهر للمطالبة بالإفراج عن اخوه و باقى الطلبة و فى الخلفية ينبعث صوت الشيخ امام و يغنى

مصر يامة يا بهية يام طرحة جلابية

الزمن شاب و انتى شابة, هو رايح و انتى جاية

جاية فوق الصعب ماشية, فات عليكى ليل و مية

و احتمالك هو هو, و ابتسامتك هى هى

تضحكى للصبح يصبح, بعد ليلة و مغربية

تلطع السمش تلاقيكى معجبانية و صبية, يا بهييييييييية

الزاوج, تانى و تالت و سبعتاشر

كل ما اسمع عن اى حد ابتكر حاجة جديدة فى شغله افرح ان عندنا عقول لسه شغاله, لكن للأسف التجديد مش دايما بيبقى فى محله

قرأت خبر بيقول ان المأذونين عشان يواجهوا الكساد فى حالة الزواج و بالتالى قله رزقهم عملوا عرض مغرى

ان اللى يعقد قرانه ياخد حباية فياجرا هدية !!!!

ايوة, علامات تعجب من هنا للصبح و فاتح بقى مذهول من اللى بقرا, عشان يعنى مش مشاكل الزواج كلها فى الأداء فى العلاقة الزوجية

اصلا هو حد لاقى زواج عشان يبقى عنده مشاكل فى الاداء, غير ان اكتر من نص الشباب تقريبا عندهم كبت جنسى

و لكم فى تحرش وسط البلد عبرة

زى ما يكون مثلا كل الشباب لقى شغل مناسب لإمكانياته و طموحاته و بمترتب كويس

و لقى شقة ايجارها مناسب لدخله, لأ و ربنا رزقه بعروسة اهلها مش بيطلبوا كتير

و اطمئن لمستقبله انه لما يخلف عيل هيعرف يأكله و يشربه و يعلمه و يعالجه لما يتعب

و ان كل ده اتحل و مفاضلش غير الأداء اللى محتاج يتظبط بحباية فياجرا !!!

المأذونين تقريبا ميعرفوش ان معظم حالات الإغتصاب و التحرش الجنسى بتحصل من مراهقين, يعنى عندنا جيل لسه هيطلع عنده كبت جنسى كامل

ده طبعا غير الجيل اللى عدى مرحلة المراهقة و اللى طبعا مش لاقى جواز و ربنا يستر منه و عليه

و تقريبا كمان ميعرفوش ان فيه حوالى 12-14 مليون بنت عدوا سن الزواج, اكيد مش عشان شبابنا مش عارف يجيب فياجرا, لكن عشان شبابنا مش عارف يتجوز اصلا

و بعدين لما انتوا ما شاء الله عليكم مخكم شغال فى الترويج لمهنتكم, ما تأكدوا على اهمية الزواج فى كل عقد قران بتعملوه

و تأكدوا على اساس اختيار الزوج لزوجته( تنكح المرأة لأربع, مالها و جمالها و دينها و نسبها, فاظفر بذات الدين تربت يداك

و تقولوا لأهل العروسة ان اسس الموافقة على الزوج اللى متقدم لبنتهم( اذا جائكم من ترضون دينه و خلقه فزوجوه, إلا تفعلوا تكن فتنة فى الأرض و فساد كبير)

فهموا الناس ان النبى صلى الله عليه وسلم رفض يزوج بنته لأشراف قريش و زوجها للإمام على و هو كان فقير, زوجهاله مقابل درع كان اهداهوله فى الأصل

لكن مش تقولوا حباية فياجرا و كلام فارغ

و اذا المشاكل دى كلها اتحلت و فضل مشكلة الفياجرا, انا هاجيب الفياجرا دى لكل عريس هيتجوز جديد هدية منى بس يتجوزوا !!!!

احيه يابو سوسو احييييييييييييييييييه

كل مرة اقابل فيها د/شاهين ازعل و افرح

افرح عشان عندنا ناس زيه, مخلصة فى شغلها و متجوزة الشغل م الأخر

و ازعل عشان مبيتقدروش ولا بيوصلوا لأى حاجة

د/شاهين ده من الناس اللى أثرت فيا جداااااااااااااااا خلال دراستى بالكلية,كان ليا فيه رأى بقول عنه

ان لو عندنا 1000 راجل من نوعية الراجل ده, كنا زماننا بقينا احسن و اقوى من امريكا و المانيا و اليابان مجتمعين

ليه عشان عنده قدرة عجيبة عالشغل بدون ملل او زهق او تعب, انا فاكر مرة فضل قاعد حوالى 3 ايام فى الكلية مروحش بيته عشان بيشتغل,3 ايام شغل متواصل

و عنده قدره عجيبة على قيادة الناس حواليه و الهامهم و مساعدتهم بدون زهق او تعب

المهم هو عنده ايمان مطلق بإننا فى مصر ممكن نصنع عربية

نصنع ايه يا ولاد,عربية, بتقولوا مين؟؟؟ عربية, عربية فى مصر؟؟ اه والله عربية

النهاردة بقى الموضوع وسع منه شويه, قالى نفسه فى سيارة عربية, يعنى ناخد الفلوس مثلا من دول الخليج, و الفكر من مصر و الشام, و الخبرة من المغرب العربى و نصنع سيارة عربية نواجه بيها تحديات القرن الواحد و العشرين و نقدر بعد 20 سنة نقف قدام الصناعة الكورية مثلا

كلام كبير قوى و جامد جداااااااااااااااااااااا

بس مش صعبة شوية حكاية اننا نتفق على الحوار ده كعرب,

والله يا دكتور مع احترامى الشديد ليك, احترام مطلق, دلوقتى بس انا فهمت جملة سعيد صال الخالدة فى مسرحية العيال كبرت

احيه يابو سوسو احييييييييييييييييييييييه

القلم

رايح فين يا قلمى

بتبعد ليه يا قلمى

ليه لما احتاجك

مش بلاقيك جنبى

و ليه لما تبقى معايا

بلاقيك بعيد عنى

انت منى و انا منك

و مش ممكن هيضيع فنك

ارجع تانى يا قلمى

ارجع لحضن قلبك

بحلم

معظم اصحابى بيتهمونى بالجنون و بانى واجع دماغى عالفاضى

عشان مهتم شوية بالسياسة او بمعنى اصح بحال البلد

فى مرة واحد سألنى انت عاوز ايه بالظبط

قلتله انا بحلم بحياه ادمية لكل واحد

بحلم بسكن نضيف ومواصلات ادمية و ميه مش ملوثه و دواء متوفر و اكل مش مسرطن

بحلم ان اولاد المواطنين يتعلموا تعليم بجد و يستفادوا منه

بحلم انهم لما يتخرجوا يشتغلوا فى شغلانات مناسبة لإمكانياتهم

بحلم ان ميبقاش فيه قانون طوارىء

بحلم بإنتخابات نزيهة

بحلم انى ازعق باعلى صوتى

بس بعد كل اللى قلتهوله لقيت الواد متنح فى وشى

ساعتها حلمت انى مكونش حلمت

لحمة, عضم مشفى,واحد بيفسحنى, احمدك يارب

بمناسبة الكلاب

اكتر حاجة شدتنى فى الموضوع مش طبيعة شغلانة صاحب الليسانس

لا انا بتكلم عالمبلغ الى هو بياخده

اللى معناه طبعا ان ال 300 جنيه دول بيتصرفوا على تهدية اعصاب الكلاب

غير طبعا فلوس الأكل المستورد, و لامؤاخده تجهيز مكان البى بى

و يمكن كمان تكون عنده داده بتغيرله الكافولة

كافولة؟؟ قصدى البامبرس طبعا

فى الوقت اللى عندنا فيه حسب ارقام احد المراكز الحقوقية

3 و نص مليون واحد بيعيشوا بأقل من دولار فى اليوم, يعنى بالصلاة عالنبى كده حوالى 6 جنيه فى اليوم

و عندنا حوالى 33 مليون و نص بيعيشوا بأقل من 2 دولار فى اليوم, يعنى لو حد شاطر حسبها يلاقيها حوالى 12 جنيه فى اليوم

طبعا ده يشمل الأكل و الشرب و العلاج و اللبس

غير بقى الكهرباء و الغاز و التليفون و مصاريف التعليم

غير بقى و ده الأهم ان الأرقام دى المثبوته فى اوراق رسمية و معروفين

فيه طبعا ارقام مش مثبته خالص, زى اللى بيعيشوا فى المقابر مثلا

و اللى الشارع خلفهم,و بيحتضنهم

و اللى كل رزقهم عالجودة من الناس, و كل همهم انهم يهربوا من عصا مخبر ولا عسكرى درك

فى الوقت ده نلاقى الكلاب بيتصرف عليهم 300 جنيه فى الشهر عشان اعصابهم بس متتعبش

طيب انا نفسى, بشتغل اهه والله ما بحصل ال 300 جنيه اللى بيتصرفوا على تهدية اعصاب الكلاب

بس جاتلى فكرة رهيبة بقى

خصوصا ان اهلى بيلحوا عليا انى اشوف شغل تانى بعد الظهر و انا مش لاقى حاجة مناسبة

لغاية ما قرات المقال ده و فكرت انى اتصل بأى عائلة من دول

و اقولهم انا عاوز اشتغل كلب كام ساعة فى اليوم !!!

لييييييييييييييه؟؟؟

ليه لما واحد يكون عبقرى بيكون شحات؟؟

انا قصدى ليه لما واحد دماغة نضيف مش بيلاقى حد يقدر

و اللى اقل منه يعامله على انه مبيفهمش؟؟

ليه لما الواحد يكون عنده ضمير بيتحارب؟؟

ليه لما الواحد بيكون بيعامل ربنا, الناس مش بتسيبه فى حاله؟؟

انا بس بسأل و بستغرب عشان اعرف واحد تقريبا عبقرى, و تقريبا مش لاقى ياكل

و مديون و حالته صعب

فى الوقت اللى غيره و اللى اقل منه فى الإمكانيات و الخبرات و كل حاجة

اغنى منه, بلاش الغنى

مرتاح فى كل حاجة و بيعرف يخلص اموره؟؟

دخل الشتا و قفل البيبان عالبيوت

حاسب يابنى,بص قدامك

ما تفتح يا اخ, انت ماشى وسط ناس

يا حيوان, هو البعيد اعمى مبيشوفش

اه ما هو مش حاسس باللى بره

ايوة ياسطى, بعيد عن الميه وحياتك

فوق المطب الجاى ياسطى

حرام على 5 دقايق تأخير فى الجو ده امضى تأخير

الجو ده بتاع قعدة تحت البطانية

نفسى اشرب شاى

اقفل القزاز ده, احنا كده هننشف

البس جاكيت يا حبيبى

دول بس حتت من كلام المواطن المصرى لما الدنيا بتمطر

المطر فى اى حته معناه خير,إلا عندنا معناه طين و بهدلة و رفع ديول الفساتين و الجيبات و البناطيل و الجلاليب

و يا سلام بقى لو مع المطر ده ماسورة ميه تنطسر زى ما حصل كده فى الشارع عندى

كنت خلاص قربت اجيب عوامة

ليا قريبى عايش فى اوروبا, بيقولى هناك المطر مبيبطلش بالأسبوع و ال 10 ايام بدون انقطاع

و متشوفش الشوراع غرقانة كده

اضيف للكلام ده خبر قرأته ان فى هولندا عملوا اسفلت بيمتص ميه المطر عشان يقللوا حوادث العربيات

اقوم ارجع تانى للماسورة المكسورة و العوامة اللى هاروح بيها الشغل

بس برضه, مهما كانت الشوارع متبهدلة

و مطينة عالاخر و محدش يعرف يمشى فيها

هفضل احب المطر, و جو المطر, و ريحة المطر

و المشى تحت المطر, و اكل ايس كريم و انا بتمشى تحت المطر

و حتى لو مش هقدر اعمل ده كله, هحس بجو الشتا فى كلام المبدع صلاح جاهين

دخل الشتا و قفل البيبان عالبيوت

و جعل شعاع الشمس خيط عنكبوت

و حاجات كتير بتموت فى ليل الشتا

لكن حاجات اكتر بترفض تموت

و ما حياتنا إلا فيلم كارتون كبير

قرأت قبل كده فى رواية للعبقرى بهاء طاهر كلمة على لسان واحد من ابطاله بيقول فيها ان القصة او الرواية بتكمل بفهمنا ليها,يعنى اللى بيدى معنى للقصة هو فهمنا و ادراكنا ليها و حسب الكلام ده لما شفت فيلم ice age 2 لقيت الفيلم بجد تحفه, شايفه بيصور الحياة اللى احنا فيها بالظبط عن طريق الشخصيات اللى فيه,

يعنى مثلا هنلاقى الحيوان الغريب اللى كان السبب فى الإنهيار الجليدى فى الجزء الأول بسبب حباية البندق اللى متمسك بيها دى, طالع فى الجزء ده متكلمش خالص, و برضه بيحارب عشان تفضل معاه حباية البندق دى, حتى لما السد انهار و الفيضان هيغرق كل حاجة, فضل يعافر عشان ياخد اللى هو عاوزة,حتى لما النسر اخدها منه برضه مهمهوش و طلع عش النسر يجيبها, و لما حارب وحوش و هو جسمه صغير جدا عشان البندق اللى معاه و موتهم كلهم, كمان هو فى الأخر اللى انقذ الحيوانات كلها لما برضه كان بيحافظ على البندقة بتاعته و هد السد اللى فى أخر الوادى ف ميه الفيضان خرجت و رجعت الغابة تنفع للمعيشة, الحاجة اللى تخلينا نفكر ان كل واحد لازم لازم لازم لما بيعمل حاجة بيأثر فى اللى حواليه, حتى لو كان ميقصدش, بصراحه كده الشخصية دى زى الإنسان اللى بيحارب عشان مبدأ او اى حاجة هو مؤمن بيها, و فى سبيل كده عمل كل اللى يقدر عليه حتى الموت مقدرش يبعده عن اللى بيدور عليه, م الأخر كده

هو عاش الأسطورة الذاتية بتاعته

نيجى بقى للنمر, الحيوان المفترس اللى صوته يرعب كل الحيوانات, كله بيخاف منه, بس فيه حاجة صغيرة قوى هو بيخاف منها, لأ و بيخاف يواجهها, و بيعمل كل جهده ان محدش يعرف عنه انه بيخاف, و هو بيخاف من ايه من الميه,باختصار الشخصية اللى الناس بتفتكرها حاجة و تطلع فى الأخر حاجة تانية خااااااااالص, بس فى الأخر بمساعده صديقه الدب الكسلان واجه مشكلته و قدر يتخلص من خوفه بالمواجهة,عرف ان الوهم كان الحاجة اللى مخلياه مش قادر يواجه مشكلته, لكن فى الأخر اعترف بضعفه و واجه مشكلته,

فيل الماموث, كل الحيوانات بتشفق عليه عشان فاكرينه اخر واحد من فصيلته بس هو بيرفض الفكرة دى, و عنده اعتقاد و ايمان قوى بإن لسه فيه ماموث غيره, احيانا بيبقى الإعتقاد من قوته بيخلى الواحد مؤمن بحاجة مش موجودة لأ و يحققها,مثلا الناس بتوع شرق اّسيا اللى تلاقى منهم اللى بيعبد اى حاجة غريبة, بس عنده اعتقاد جامد فيها,ف الأعتقاد القوى هو اللى بيخلى الواحد عنده دايما امل,

و فعلا قابل فيل ماموث انثى و فى اخر الفيلم عملوا عائلة لأ و مش بس كده كمان لقى قطيع من الماموث فى الغابة,

اما بقى الماموث الأنثى دى حكايتها حكاية, اول ما قابلها الفيل فى الغابة كانت على شجرة و مقتنعة انها حيوان البوسوم(انا نفسى مش عارف ايه ده بس هو شبه السنجاب شوية) و فى الفيلم بيبان انها عايشة مع اتنين من البوسوم دول و هما كل عائلتها, فكرة المواطنة, يعنى عشان هى ملهاش عائلة اتربت مع الحيوانات دول وهى صغيرة لغاية ما صدقت انها بوسوم زيهم,فكرة الشخص اللى بيدور على الإنتماء او العائلة, احتياجة للإنتماء بيخليه يصدق او يعمل اى حاجة مش منطقية, بس عشان ده وضع غلط,

بتعرف فى الأخر انها غلط بس بتفضل تعتنى بحيوانات البوسوم زى الأول

كمان فيه النسر, الطائر اللى عاوز الفيضان يموت الحيوانات كلها عشان يبقى عنده أكل كتير من اللحوم الميتة, نفس فكرة الأشخاص الوصوليين اللى بيطلعوا على اكتاف اللى احسن منهم فى كل حته, مستنيين انهم يموتوا او يقعوا عشان علطول يقوموا بالواجب,

نوتى السريع,حيوان غريب كده اول ما سمع بموضوع الفيضان ده استغل الموقف كويس قوى, قال اخترع حاجات عشان يخلى الحيوانات تتنفس تحت الميه, نوع من الإستغلال الإقتصادى, مش شبه رجال الأعمال اللى غرقوا السوق بشوية منتجات احنا مش محتاجين لها و خلونا منستغناش عنها؟؟ برضه فى الفلم الحيوانات كانت ابتدت تصدق كلامه و يشتروا اختراعاته اللى مش هتفيدهم خالص

الدب الكسلان, اللى فى رأيى بطل الفيلم كله, الحيوانات كلها ظالماه, بيقولوا عليه غبى او مش فاهمهم, بس ده عشان هو كان عاوز مصلحتهم, الشخص اللى بيحب الناس كلها و بيفكر لهم فالناس بتسىء الظن بيه,يعنى هو اللى خلى النمر يواجه خوفه من الميه, هو اللى خلى الماموث يغير فى الماموث الأنثى بعد ما كان يأس, هو اللى اصحابه عرفوا قيمته بعد ما الفيضان خلص و الغابة بقت مكان للمعيشة, مش عامل صحيح زى الناس اللى بتعيش عشان غيرها؟؟؟ عموما هو الفيلم جامد, للى هيشوفه و يفهمة كده أو هيفهمه عادى على انه فيلم كارتون مفيهوش اى حاجة غير شوية انيمشن

الترمس

يالا الترمس...يظل صدي هذه العبارة بهذا الصوت الأنثوي الأجش يدوي في أذني كلما مررت بهذه السيدة العجوز التي تفترش ناصية الشارع كل يوم من بعد صلاه العصر إلي ما بعد صلاة العشاء

, بهذه الصينية الألومنيوم التي اتعجب من لمعانها الدائم كلما مررت عليها, أري وجهها الذي أشعر به يبتسم فيزيد من تجاعيده الكثيرة و الكئيبة,

اشعر بها و أحاول أن أعرف أي شىء عنها فلا أستطيع,

ربما خجلا,

و ربما بسبب الخوف من المجهول أو جرح مشاعرها,

فلا البث إلا أن ابتسم و أنا أتعجب من صبرها و عدم يأسها من الخروج بتلك الصينية اللامعة كل يوم,

ربما يكون خروجها كل يوم هو نوع من اليأس ذاته

و لكن في جميع الأحوال أعجب بها لأخذها بأسباب الرزق,

أوقات أراها و هي قادمة قبل افتراش الأرض أمام المحل الكبير و أتسائل أين يمكن أن تعيش؟؟ و هل مثلا لها عائلة؟؟ و ترى إذا كانت هي العائل لهم بهذه الصينية التي تحمل فوقها حبات الترمس؟؟

و أظل اتأملها بخطواتها البطيئة و أنا أفكر في تلك الاحتمالات بينما يدها اليمنى تسند (الجردل) فوق رأسها و من فوقه الصينية,

فتظهر بسبب رفعة يدها (الجلابية) الصفراء التي قليلا أو نادرا ما رأيتها تغيرها و تتحرك بسبب حركة يدها الطرحة الكحلي التي أكاد اجزم بأنها لا تستبدلها,

أراها و أشعر بنفسي أهرول ناحيتها لأخذ الحمولة عنها, فتبتسم و تقول لي في طيبة ورقة رغم صوتها الأجش(انشالله يخليك يارب) فأبتسم ثانية و أخذ يدها في يدي لتتكأ عليها و تظل ترفع باليد الأخرى (الجردل) فوق رأسها,

حتى اوصلها مجلسها علي ناصية الشارع و اسألها إن كانت في حاجة لشىء؟؟ تقول لي بنفس الطيبة و هي تملأ يدها ببعض حبات الترمس من فوق الصينية(خد اتسلى بقى) أضحك و اّخذ منها ملء يدها و أضع بدلا منها النقود القليلة جدا,

فتزيد ابتسامتها من تجاعيد وجهها و تقول( يارب ينجحك يارب) أو في مرات أخرى (يارب اشوفك عريس) فأعود للإبتسام و القي السلام و أذهب إلي حيث كنت ذاهب,

و ذات يوم فى طريق عودتي للمنزل من العمل و قد كنت مرهقا, وجدتها تبتسم فتجهمت رغما عني بسبب مشاكل العمل,

زادت ابتسامتها و هي تقول لي(مكشر ليه؟؟ يابنى ولا حاجة تستاهل, خدلك شوية ترمس لوز, اتسلى و متزعلش نفسك) أخذت منها حبات الترمس و أنا اتصنع الإبتسام و مددت يدي كالعادة أعطيها بعض النقود,

صدتنى قائلة (سايق عليك النبي دول هدية دي أخر مرة هاعمل فيها ترمس) ابتسم بالفعل هذه المرة و أشكرها,

و في المساء, اسمع جلبة و صوت بعض الأشخاص في الشارع أتطلع الأمر أجد زحاما أمام المحل الكبير التي تفترش الأرض امامه, اسأل ما الذي حدث,

يأتينى الجواب

فأدرك انها بالفعل اخر مرة تعمل فيها ترمس.

فى هذه اللحظة فقط....تخلص من كل شىء

لا اعرف ما الذي يدفعنى لمحاولة فهم او معرفه ما يفكر به شخص اخر؟؟

ربما هي محاولة مني لإختراق المجهول,حيث أن تفكير كل انسان و عقله هو ملكه هو فقط,لا يمكن لأحد اخر مهما كان أن يتطلع عليه؟؟

ربما لأننى فقدت الكثير من الأصدقاء و الأحباء ايضا فى لحظه كنتى اتمنى فيها أن اخترق تفكيرهم لأعلم لماذا يحدث كل هذا؟؟

أو ربما لأنى شاهدتب بعينى شخص ما يموت و فى النفس الأخير و ودت لو اعرف ما هو بالضبط الذي يفكر فيه؟؟

ربما كان هذا هو ما ابحث عنه بالفعل,

اعتقد انه يفكر فى حياته التى ستصبح بعد لحظات مجرد ذكرى,

ربما ايضا يفكر كيف سيتصرف كل إنسان بعد وفاته, يفكر فيمن سوف يبكونه, يفكر فيمن سوف يحزنون امد الدهر عليه,

يفكر فيمن سيفرح لموته لأى سبب كان ,

و يفكر فى عائلته, فى ابنائه, هل سيظلون على محبتهم له, هل سيدعون له بالرحمة و المغفرة؟؟؟

أم كل ما سيفكرون به هو الميراث و تقسيم التركه؟؟؟

يفكر فى زوجته, هل ستظل على ذكراه؟؟ هل تستطيع الصمود وحدها حتى نهاية الطريق؟؟

هل ستذكره بالخير و تتمنى ان يجمع بينهما ثانية فى الجنه؟؟ هل سيظل قلبها ينزف عليه ولا يشعر بها احد؟؟

ام هل ستنسى كل ذلك و تذكر فقك عيوبه و مشاكله؟؟

يعود إلى امه, المرأة الوحيدة التي تأكد حبها خالصا نقيا من دون اى اسباب, و اى اسباب تلك اقوى من الأمومة؟؟

يرثى لحالها, أمي لا تبكينى , فلا انا ولا أي شخص يستحق تلك الدموع الغالية,

امى لا تحزنى فإنى قد شفيت من داء الدنيا و ذاهب لأتشفى بدواء الأخرة,

امى لا تقلقى سأبعث بتحياتك لأبى و أبلغه انك مازلت علي العهد,

أمى سيعاود اخواتى و اخوتى زيارتك بعد أن يدركوا أن الموت لا فرار منه و أنه اقرب مما يتصورون,

أمى سيأتى أولادى و يكونون كما كنت لك دائما,

ستظلين فى عيني و قلبى يا امى امد الدهر و إن كنا فى عالمين مختلفين,

اشعر بالوقت و أن الرحلة قاربت على الإنتهاء الأخير لا استطيع أن افكر فى اى شىء اخر,

فى الأصدقاء و زملاء العمل, فى الجيران و الأحباب,

هذة اللحظه, هذة اللحظه فقط هى التي تظهر الوفي من الخائن,

المخلص من الغادر,

الصديق من العدو,

قال اليونان قديما فى اساطيرهم أن الروح تظل تحوم حول الجسد اربعين يوما,

و بعدها اما الجحيم

أو الخلود

,لكم تمنيت أن ارى ما سوف يحدث بجثمانى و لو لأربع ساعات فقط,

أريد أن اري من سوف يتأثر حقا ممن سوف يتقن اظهار التأثر,

و كأن الحياه الطويلة التي عشتها لم تكفى, أو لعلها لم تكن صادقة تماما,

اشعر الأن ان الموت اصدق من الحياه,

كلاهما حقيقى و موجود, لكن فى الموت تكون الأشياء أوضح,

تكون اعمق

و تكون اصدق,

بالكاد اسمع بكاء زوجتى فبداية تغيبى عن عالمهم بدأت,

أري بطرف عينى أولادى و هم يهرولون نحوي,

احاول أن انطق بأسم امى ليأتوا بها,

و لكنه كان اسرع, لم يمهلنى حتى لأكمل ابعاد شفتي عن بعضيهما,

و اسمع واضحا في هذه اللحظة الأخيرة بكاء أمى و عويلها من بعيد

لو حد عارف

حد قبل كده حس احساس غريب مش عارف يوصفه؟؟؟

حد حس ان جواه حاجات مش عارف ايه طبيعتها؟؟؟

حد حس انه مكتئب على طول الخط؟؟

طيب و اللى المود بتاعه بيلعب بيه؟؟؟

يعنى لا هو مبسوط ولا هو زعلان, هو فى حالة غريبة زى بتوع الفضاء لما يبقوا فى البتاعة اللى اسمها انعدام الوزن

بس هو جواه كلاكيع

حد واحشاه اغنية بتفكره بحد معين؟؟؟

حد طيب واحشاه اغنية بتفك المود بتاعه؟؟

طيب بلاش, حد عاوز يسمع اغنية و مش قادر حتى يشغلها؟؟

ولا حد مثلا شغل الأغنية اللى هو عاوزها و معملتش المطلوب؟؟

طيب الواحد يعمل ايه؟؟

نحلم بإيه؟؟

و نصحى ليه؟؟

ما احنا عايشين فى الحلم, ولا يمكن الحلم هو اللى عايش جوانا

ولا يمكن احنا بالحلم اللى جوانا جزء من حلم حد تانى

بنقوم بدورنا و بس؟؟

ولا احنا اصلا صاحيين ولا نايمين و احنا بنحلم؟؟

يمكن الحلم من قوته خلانا مش قادرين نفرق بين الحلم و الواقع

ولا الحلم اصلا جزء من الواقع مش عارفين نحققه فبنحلم بيه؟؟

ولا الواقع بتاعنا كله عباره عن حلم حققناه و خلصنا منه؟؟

ولا احنا اصلا لسه فى بداية الليلة؟؟

يعنى ده مجرد تتر الحلم؟؟

انا اعتقد ان ده كله مجرد شىء افتراضى

موجود فى عقولنا و قلوبنا و فى عيون اللى بنحبهم و نحلم عشانهم

بس هو اييييييييييييييييييييييه !!!؟؟؟

حد عارف؟؟؟؟؟؟

ولا يمكن محدش عارف !!