افيال,نسانيس,قرود.....احمدك يارب

والله مش عارف احنا هنوصل لغاية فين بالفساد المتفشى فينا ده زى الوباء

و مش عارف احنا بنتقدم ولا بنتأخر ولا بنعمل ايه بالظبط

ولا عارف تصنيفنا وسط الدول عموما

بس الأكيد اننا بقينا حاجة كده مينفعش تتصنف

بقينا اضحوكة بين كل الدول والله باللى بنعمله ده

المقدمة الطويلة العريضة دى بس عشان الخبر الجامد جدا اللى قريته لسه حالا طازه

قال ايه باه,عشان يعنى الناس تاكل لحمة و تتظبط و تشرب شوربه بقى و كده

رجل اعمال سكندرى استورد لحمة افيال من الهند !!!!

طبعا مش هيخلى الناس تاكل افيال

لكن اللحمة عجوزة و عمرها اكتر من 5 سنين,فبيسومها افيال يعنى

المهم ان الموضوع ده مخالف للوائح اللجنه الطبية البيطريه

و اللى يضحك بقى ان اللجنة الطبية البيطرية دى كانت مع الراجل ده فى الهند و هو بيشترى اللحمة عشان يكشفوا عليها

و الرجل كتر خيره مد اقامة اللجنة 10 ايام بدون ابداء اسباب

طبعا ما هى الهند ام العجايب يمكن يتعاقدوا كمان على شوية نسانيس و بقر من اللى بيوقف الشارع هناك

و خلى الناس تاكل,دول شوية جعانين هيدقوا يعنى على اللحمة بتاعة افيال ولا قرود ولا حتى هنود

و اللحمة هتنزل فى السوق و الناس هتاكلها,غلابة نفسهم ياكلوا لحمة و بيفكروا انهم ياكلوها حتى لو هيموتوا بعد ما ياكلوها

و بعدين الكيلو بتاعها ب 9 جنيه

يعنى ارخص من كيلو الجبنة !!!

المهم ان اللى وافقوا على دخول الحاجات دى مصر ميبقوش يعيطوا زى ما حضل بعد لحمة توفيق عبد الحى ولحوم النسور و الصقور

اللى كان اكلها للناس من حوالى 20 سنة

قتل الملائكة

النهاردة خير اللهم اجعله خير كانوا جايبين على 90 دقيقة حاجة غريبة
بنت اتعرضت للإغتصاب و جابت طفلة
خبر ممكن نسمعه كتير وسط الكم الهائل من حوادث الإغتصاب اللى بيفرزها مجتمع عنده كبت جنسى جماعى
لكن الغريب فى الموضوع ان البنت اللى اتعرضت للإغتصاب عندها 11 سنة !!!!!!!!!!!!
ايوة الواحد يفتح بقه من هنا للصبح,على القرف اللى حسيته لما سمعت الموضوع ده
يعنى الاستاذ اللى نفسه طاوعته انه يغتصب ملاك ,الدنيا فضيت من الستات او البنات فيغتصب طفلة؟؟؟؟؟؟؟
---------------------------------------------------------------------------------------
هو انا كان نفسى اكتب رأيى فى الموضوع ده بس حاسس بإحباط جامد
و فى نفس الوقت مخنوق و متضايق من حالة الكبت الجنسى اللى وصللها الشباب
مش عارف احنا وصلنا او هنوصل لغاية فين بالوضع ده
كل اللى حاسسه انى حاسس بغربة,غربة جامدة

انا مصرى و ابويا مصرى

فى بوست قبل كده كتبت عن يوم قمىء شفته مع امى فى مستشفى التأمين الصحى و المعاملة التحفة اللى بنشوفها جوة بلدنا

بس لما قريت بقى خبر اختطاف 90 مصرى فى الأردن حسيت قد ايه احنا مالناس سعر ولا قيمة

لا جوة مصر ولا برة مصر

و عرفت قد ايه( او ممكن نقول اتأكدت) اننا يعنى فعلا بلا اى قيمة

لا قيمة معنوية ولا قيمة مادية ولا اى نوع من انواع القيم بتاعة البشر

المهم يعنى مفاد الخبر بيقول ان فيه 90 واحد اتخطفوا فى الأردن و الخاطفين طالبين فدية مالية

ايوة, رجعنا لورا عشارت السنين, فى عصر الخطف و المافيا, بس مع المصريين بس

باعتبارهم ارخص اجناس الأرض

و كمان اللى خطفهم متأكد ان لا حكومة ولا وزارة خارجية هتتحرك

ما هو شعب رخيص, يالا خلينا نخلص شوية من الزحمة

ده احنا بقينا 75 مليون, هيأكلونا منين؟؟

ألا صحيح, هما فى الصين بياكلوا منين؟؟؟ سؤال فى وسط الكلام

المهم اللى خاطفينهم بقى طالبين فدية مالية عشان يفرجوا عنهم

طيب الحكومة اكيد مش هتدفع

و اكيد برضه مفيش وساطة من دولة اجنبية او عربية, عشان دى جماعة جديدة اول مرة نسمع عنها

و اكيد برضه اللى مسافر يشتغل فى الأردن اكيد اهله مش هيعرفوا يدفعوا الفدية

ده ربنا الاعلم باهله هيعيشوا ازاى فى الفترة اللى هو مخطوف فيها,لأنه اكيد كان بيبعتلهم فلوس

و الاغرب من ده كله هو ان عدد 90 مصرى مختطفين كتير جدا, يعنى لو كان فيه جنسيات تانية كان ممكن الواحد يقول عملية منظمة

لكن دول مصريين بس, يعنى عملية منظمة ضد المصريين

لا و وعدوهم بعقود عمل فى ايطاليا, يعنى عارفين نقط الضعف و مكان اللى يمنوا بيه المصريين

و خدوهم لفوا بيهم تركيا و لبنان و يعتقد انهم حابسنهم فى سوريا دلوقتى, يعنى لا تعليق بصراحه

والله مش عارف اقول ايه, ربنا يرجعهم بالسلامة و يصبر اهلهم

و يغير الوضع اللى خلاهم يسافروا بلد غريب يتنظم ضدهم حاجة بالشكل ده

ده كان راسب

فى الشغل المنيل اللى انا فيه ده ممكن الواحد يتخيل اى حاجة غلط و حرام و زى الزفت

طبعا, مش شغل فى مصلحة حكومية

المهم امبارح كنت قاعد مع واحدة زميلتى اساعدها فى شغلها

هى بتشتغل فى شئون الطلبة بتعمل شغل الكمبيوتر,يعنى نقل السجلات و جوابات الوكلاء و العميد و كده

المهم واحدة معها فى الأوضة ادتها ورقة تكتبها عشان تطلع لوكيل الكلية يمضى عليها

قريت الورقة و لقيت مصيبة

المفروض مكتوب فى الورقة نتيجة التماس عمله 2 طلبة و المفروض الوكيل يمضى عليه

الإلتماس الأول طالب اتحولت نتيجته من راسب لناجح عشان ايه بقى

عشان لما راجعوا درجاته, المفروض انه كانت غياب فى امتحان العملى, و بعد المراجعة لقوه جايب 23 !!!!!

و الطالب التانى درجة اعمال السنة مكانتش مرصودة خالص, و بعد المراجعة برضه اتحولت نتيجته من راسب لناجح

والله انا اعرف بما اننا كلنا بشر, ان وارد ان الواحد يغلط

يغلط فى رقم, فى صفر مثلا, فى حاجة قريبة

لكن واحد يتكتب غياب و هو جايب درجة فى الإمتحان, جديدة دى

و واحد تانى يتساب مكان درجة اعمال السنة بتاعتة فاضية و هو ليه درجات, برضه جديدة

مش عارف ليه المستوى المنحط ده من عدم الضمير و شغل اى كلام

المهم بقى, ان ال 2 طلاب دول دوروا على حقهم و هياخدوه اهه

ياترى فيه كام زيهم مفكروش ان ممكن يبقى ليهم حق؟؟

طبعا عشان نظام التعليم بيخلى اى حد يشك فى قدراته العقلية و النفسية و كل حاجة

انا م البلد دى, انا م البلد دى

يوم من الأيام اللى فعلا بكره فيها عيشتى فى مصر

امى تعبت, عادى اى حد بيتعب, بس عشان كانت محتاجة جراحة صغيرة كده فى ايديها و هتاخد اجازة فكان لازم-للأسف-انها تروح مستشفى التأمين الصحى

انا انا اصلا مبكرهش فى حياتى قد التعامل مع المستشفيات اللى من النوع ده

اللى هى حكومة و كل اللى فيها من اطباء و تومرجية و رجال امن بيعاملوا المواطن على انه ولامؤاخدة شحات

المواطن الشحات ده جاى يعطلهم و يعكنن عليهم و يخليهم ميعرفوش يشوفوا شغلهم

بس شهادة للحق قبل ما اقول على اللى استفزنى, فيه ناس محترمين هناك, زى اى حتة بس طبعا قليلين

المهم اول ما دخلنا قابلنا دكتور كان خارج و شافنا و قالنا خير؟؟ مين اللى تعبان

بصراحة دكتور وجهة بشوش كده و على وشة ابتسامة جميلة و بيرد على كل الأسئلة بخصوص الوضع اللى احنا فيه

و بيستمع باهتمام , و فوق ده بيكره الروتين بتاع الورق و الكلام ده

طبيعى جدا واحد روحه حرة هيكره الروتين القاتل ده

المهم شاف الجرح اللى فى ايد ماما و طمنها و عملنا ملف للعمليات و ادينا مستنيين

طبعا مندهشتش لما عرفت ان الدكتور ده مش مصرى!!!! ده اردنى

المهم فضلنا مستنيين حوالى ساعة مثلا لغاية ما دخلنا العمليات

وصف حجرة العمليات بقى

حجرة مربعة كبيرة, مكيفة تكييف قوى, الحائط المواجه للباب فيه بابين كبار مكتوب عليهم عمليات 1 و 2

و الحائط اللى عالشمال فيه عمليات 3 و حجرة صغيرة

و الحائط اللى عاليمين فيه عمليات 3 و حجرة الدكاترة و طبيب التخدير و كده

المهم ان الحجرة المربعة الكبيرة دى فيها 3 سراير عليهم مرضى مش منظمين طبعا,المهم انهم بعاد عن ابواب حجرات العمليات ال 4

ممرضة جابت لماما كرسى جلد زى بتاع المكاتب بس باين عليه جديد, و الدكتور جه شاف ايديها و راح ابتدى شغل

امى تقوله بالراحة, و انا اقوله اديها بنج

و هو يقول مفيش لزوم, ابص على وش امى الاقيها بتموت من الألم

لما لاقانى كده قالى استنى بره, و جه دكتور تانى معاه و تعمد انه يدينى ظهره عشان مشفهوش من الكوه اللى فى الباب

لما ملقتش منه فايدة رحت دخلت تانى كانوا خلصوا, اقوله مفيش علاج, قاللى لالالالا

مع ان المفروض عالأقل تاخد حقنة مسكن, ما علينا

المهم فى كل ده كان ملقت للنظر جدا منظر الدكتور, باليونيفورم الأخضر الزبالة اللى المستشفى كلها بتلبسه, عيانين و دكاترة

و منظره و هو مكرمش و لو جبت اصغر تومرجى فى المستشفى مش هيرضى يلبسه

و منظر ايديه و هى لونها ابيض من كتر استخدام حاجة فى العمليات, الله اعلم هى ايه انا معرفهاش, بس ايديه كان لونهم غريب

و الدكتور التانى اللى جه معاه و هو ماسك ايد ماما عشان الدكتور الأولانى شغال فى الجرح

تليفونه رن راح ماسك ايدها بإيد واحدة بس ورد عالتليفون

ده غير انى لما دخلت بعد كده عشان اخد بقية الورق لقيته قاعد مولع سيجارة فى الأودة المكيفة بتاعة المعليات !!!!!!!!!

و التومرجى بيطلع ماما بره على الكرسى ابوعجل عشان مكانتش قادرة تقف, كان كل همه ان الكرسى ده خاص بقسم الجراحة و مينفعش يتساب برة !!!!!!

مش عارف امتى هيكون عندنا البنى ادم اهم من الورق و الدبابيس و الكرسى ابو عجل !!!!!!!!!

إلى كل الموظفين الحكوميين, اللبن الأورجانيك مجانا فى المصلحة

مش عارف ليه كل فترة يتفتح موضوع إرضاع الكبير

و المشكلة ان اللى بيتكلم فيه مش بيوضح مثلا إذا كان الحديث الصحيح عن النبى صلى الله عليه وسلم خاص بحالة سالم مولى ابى حذيفة ولا ممكن يتعمم

اخر حاجة قريتها واحد من المشايخ, حتى مش فاكر اسمه قال ان الموظفة ترضع زميلها فى العمل عشان تحلل الخلوة بينهم فى اوقات العمل !!!

يعنى الست و الراجل اللى بيتقفل عليهم مكتب واحد و محدش يدخله غير بإذنهم, الست تتفضل مشكورة و تلقمه ثديها عشان تحلل الخلوة بينهم

ايوة هو قال كده, الإرضاع بالتقام الثدى مباشرة !!!

يا حلاوة يا حلاوة, لأ و قال انها ممكن تخلغ حجابها قدامه و ان الإرضاع ده لا يحرم الزواج !!!!

والله الموضوع حيرنى خصوصا ان انا موظف ;)

بس مش معايا اى موظفات فى المكتب خااااااااالص, انا لوحدى كده :D

بس تخيلت بقى لو فعلا اخذوا بالفتوى دى, يا نهار ابيض

هتلاقى كل الشباب العاطلين اللى بيكرهوا سيرة الحكومة و شغلها جايبين وسايط عشان يشتغلوا حتى فى البوفية

و هتلاقى فلوس دخول المصلحة الحكومية بقت اكبر من فلوس البترول

و هتلاقى بقى الموظفين اللى موجودين بالفعل بيحبوا الشغل و كل واحد بييجى بدرى

طبعا عشان ياخد الرضعة

و بالنسبة للشباب بقى الشيخ قال ان الإرضاع لا يحرم الزواج, فعنده فرصه انه يجرب اكتر من مصدر ما هو كله بالفتوى بقى

و هتلاقى كمان الراجل من دول بيجتهد انه يترقى عشان يبقى جنب المديرة باعتبار ان الدهن فى العتاقى

و الشباب مبيعملش شغله جامد عشان يفضل جنب المزز من الموظفين

و كل شهرين ولا حاجة لما الراجل من دول يكون رضع من كل الموظفات تقريبا يطلب نقله لمكان تانى

اهه فرصه يجرب برضة حاجة جديدة, احسن من اللبن ابو بودرة سيراميك

ولا الست اللى والدة جديد, صحتها ياعينى هتروح, هتلاحق على ابنها ولا على زمايلها

ولا بقى ممكن بنفس المنطق ترضع المدرسة مثلا طلبة ثانوى باعتبارهم بلغوا الحلم

ياعينى يابنتى لو مدرسة بنين و كل فصل فيه 60 ولا 70 طالب

و كده نبقى لقينا حل لمشكلة التعليم و اختفاء الطلبة و التزويغ

و هتلاقى بقى ناس يطلعوا عالفضائيات و يتكلموا فى حكم الرضعات المشبعات

و يجيبوا فريقين واحد محافظ و التانى مجدد

واحد يقولك خمس رضعات مشبعات عشان تحلل الخلوة بينهم

و التانى بيحلف بأغلظ الأيمان انه لازم يتكرع عشان يبقى شبع

و التالت يأمن على كلام و التانى و يقولك انه لازم يأشط على كتف زميلته و تمسحله بقه بالبافتة عشان يتأكدوا انه شبع

و ساعتها بقى انا هاسمع كلام امى اللى بتقولى امسك فى الوظيفة بإيدك و سنانك عشان مش هتلاقيها تانى

طلع عندها بعد نظر!!!!

سيب الملك للمالك

صديقى شريف بعتلى الصور دى, و كان معاهم صور تانية بس مرضيتش احطها حفاظا على سلامة الفاظ اصدقائى اللى بيجبروا بخاطرى و يزرورونى هنا

بصراحه مكنتش عاوز اعلق عليهم حفاظا على سلامة الفاظى انا لكن مش قادر امسك نفسى الصراحة

الصورة اللى عاليمين بتوضح يعنى ان مفيش اهتمام نوهائى بالعشوائيات و طبعا سكانها اللى هما محدودى الدخل اللى كل جهد الكحومة موجه لرفع مستوى معيشتهم !!!!

و بتوضح كمان منطق الحنوع اللى عايش بيه المصريين, و بيأكد ده الجملة العميقة جداااااااااااااا اللى مكتوب على بلكونة البيت, سيب الملك للماك, لأ و فيه غسيل و محلات فاتحة تحت يعنى فيه حياة فى البيت ده, مع ان لو عملناه لامؤاخده زريبة للبهايم البهايم هتثور و مترضاش تعيش فيه !!!

الصورة التانية بقى احط جنبها مليون علامة استفهام, يعنى المقاول او صاحب العمارة او اى كان المستفيد خلاص هيموت لو مخدش ال 2 متر دول من الشارع؟؟ ولا هو نيته سليمة و عاوز ينور لسكان العمارة و يوفر عليهم كهربا؟؟ ولا يمكن هو عامل العمارة ايجار و عاوز يسهل على الحرامية طلوع العمارة على عامود النور بدل المواسير؟؟ على اعتبار يعنى اننا تقدمنا و لازم نساعد الحرامية انهم يادوا شغلهم على اكمل وجه؟؟ و فين بتوع الحى او البلدية او المسئولين عموما على السرقة دى؟؟ مش دى برضه سرقة من شارع الحكومة؟؟ يعنى الأتنين متر دول بفلوس؟؟ يعنى اهدار للمال العام ؟؟ لكن اللى مستفزنى اكتر هو ان مفيش راجل واحد فى الشارع قادر يقول لأ؟؟ و يبلغ عنه؟؟ طول بناء 3 ادوار محدش خد باله؟؟؟ ولا احنا خلاص اتعودنا اننا نبقى فى حالنا و منقولش لأ على الغلط؟؟؟

رحماك يارب

الى كل اللى مش لاقى شغل, ممكن تبقى بتاع كارتة

فى مرة كنت قاعد مع واحدة زميلتى فى الكلية و كانت بترمى اكل للقطط, اصلا كان مجرد ما الأكل يطلع قطط الكلية كلها تتلم حوالينا, المهم لما كانت ترمى اى حتة اكل كنا نلاقى قطط تجرى على اللقمة و قطط تحصلها و تحاول تخطفها و قطط تقف بعيد مستنية اى حاجة تجيلها لغاية عندها او مستنية القطط اللى بتاكل تخلص و تخش هى عالفتات بتاعها, المهم لما شفت المنظر ده بقولها سبحان الله منطق القوى و الضعيف و قانون الغاب موجود حتى بين الحيوانات, لقتها بصتلى بصة غريبة قوى و قالتلى اصلا الإنسان واخده من الحيوانات, قلتلها بس باللى بيحصل اليومين دول واضح ان الحيوانات هى اللى واخداه من البنى ادمين

ستوووووووووووووووووووب, ده كان موقف افتكرته النهاردة الصبح لما حصلت حاجة استفزتنى جدا,

خليكوا معانا, فاصل و سنواصل

خير بقى, النهاردة الصبح و انا رايح الشغل, بيبقى فيه زحمة عالخط اللى بركب منه, فبيبقى فيه عربيات من خط تانى بتحمل الف مسكن

فى نص السكة و فى مكان مبيتغيرش, و على فكرة حصل اكتر من مرة, واحد يوقف الميكروباص و ياخد 2 جنيه!!!! مش عارف باى حق ياخدهم, المهم انه لازم ياخدهم, دول بقى بتوع الكارتة, يعنى اى عربية عشان تشتغل عالخط لازم يدفعوا ال 2 جنيه اتاوه, حتى العربيات اللى مش بتشتغل اصلا عالخط و بيحمل بص الصبح عشان يسترزق وقت الزحمة,برضه لازم يدفع, السواق يدى الراجل جنيه واحد و يقوله دى اول فردة, هادفع الجنيه التانى فى الفردة الجاية يقوله لا, او يديله الفلوس من باب انك مش عاوز تدفع متدفعش, مصاحب ليها نظرة وعيد, من نوعية هكسرلك زجاج العربية, او مش هتشتغل تانى, او العربية هتنسحب, على اعتبار ان الناس دى مسنودين من امناء شرطة مثلا او حتى ضباط, المهم ان فى الأخر السواق بيرضخ و بيدفع, بالذوق بالعافية بيدفع.

السؤال هنا بقى, الراجل منهم مبيحسش انه بياكل فلوس حرام؟؟؟؟

طيب بلاش دى, هنقول مش بيحسوا, او مبيعرفوش حلال و حرام, محدش فيهم بيحس, و لو للحظة انه عالة و بيكسب فلوسه بالبلطجة و عدم احترام الناس؟؟

ولا هما بقى من نوعية ان المجتمع جنى عليهم و محدش هيشغلهم عشان معظمهم اصلا رد سجون و مسجلين خطر؟؟

و بياخدوا حقهم بدراعم و قانون الغاب؟؟

اللى عاوز افهمه بجد, ايه السبب ان قانون الغاب بقى يخيل للواحد انه شىء متأصل فى الإنسان و ان الحيوان هو اللى اخده منه؟؟

اعتقد ان الحيوانات بيبصوا علينا و يتريقوا و يقولوا ايه الناس اللى معندهمش رحمة ولا احساس دول؟؟

و دلوقتى بس فهمت اجابتى العبقرية لزميلتى اللى كانت بتأكل القطط !!!!

تبقى انت اكيد اكيد فى مصر

قال ايه بقى, اللى جايب جيد بس هو اللى هيدخل الأنترفيو عشان يسافر

يسافر ايه و اتنرفيو مين ياعم انت

الموضوع ببساطة ان عندى فى الشغل كانوا عاملين اعلان عن تدريب فى الصيف للطلبة فى سوريا و اليمن و الأردن و ليبيا

عادى الحوار, نوع من تطوير التعليم و فتح افاق جديدة امام الخريجين

حاجة كده من الكلام الكبير اللى بنسمعه ده

بس ده اصلا لو فى تعليم عشان نفتح افاق جديدة للخريجين, ما علينا

المهم الناس اللى قدموا جه معاد الانترفيو بتاعهم, و كان على ما سمعت اسئلة عامة

المهم لما كان العدد كبير, قالوا ان اللى جايب اقل من جيد مش هيدخل الأنترفيو,

مش باعتبار انه هيسافر علطول,لأ ده معندوش احتمال انه يسافر اصلا

انا مش معترض عالفكرة, بس ده لما يكون التقدير هو فعلا تقييم الطالب

لان طبعا التعليم مش بيبين القدرات الحقيقة ابداااااااااااااااااااااااااا

انا مش بقول ان فلان احسن من علان

ولا زبيدة احسن من عزيزة

بس الفكرة ان فيه ناس امكانياتهم اكبر من انها تطلع فى تقدير,لكن عشان مش جايبين تقدير مش هيدخلوا الانترفيو

لكن طول ما عندنا الطريقة العقيمة فى الأختيار, تبقى انت اكيد اكيد فى مصر

المديييييييييير المدير

سبحان الله, فى الشغل اللى انا فيه صوتى اتنبح على عمال ينظفوا المكان اللى انا فيه

مش عشانى بس عشان المكان نفسه و طبيعته ان بيدخله ناس كتير

ولا حياة لمن تنادى

و من اول ما استلمت العمل كتبت الحاجات اللى ناقصة و بلغت بيها السكرتارية و هما بلغوا بيها الصيانة

و انا بردة بغنى وسط جماعة طرش

و كل حاجة ماشية تبع روتين الحكومة الممل و اللى بيغتال اى ماحولة ابداع

قلت يا واد طنش خااااااااااااااااااااااالص و سيب حبيبك على هواه

و المفروض ان فيه معرض هيقام و لا حد كلمنى ولا قاللى حاجة عشان تجهيزاته خالص

المهم النهاردة لقيت المهندسة مسئولة الصيانة جايبة 2 صنايعية عشان يركبوا الزجاج المكسور

و فى اقل من نص ساعة كان الزجاج متركب

خير خير, اهم بدأو يتحركوا, و انبسطت بقى و قولت خلاص مفيش روتين ولا اى حاجة من دى

بس فرحتى مطالتش, عشان عرفت ان رئيس الجامعة هيزور الكلية ولازم تبقى بتبرق قصاده

يالهوى, هو احنا ايه اللى جرى لنا؟؟؟؟؟؟؟

منتحركش ولا نعمل اى حاجة غير لما يكون المدير هيمر ولا هيفتش

ليه مش بنخاف من ضمائرنا ولا من ربنا زى ما بنخاف من مدراءنا

ليه زيارة المدير او المسئول الكبير كأنها يعنى حج لبيت الله الحرام الكل بيستعد له

و فى الأخر ناس ثورجية يزعلوا لما اقول اننا مش هنبقى زى الغرب ولا بعد 100 سنة

لانهم ببساطة محدش فيهم بيتملق رئيسه, ولا بينافقه ولا بيمسحله جوخ

يالا هنعمل ايه بس

ندعى و نقول

اللهم لا تؤاخذنا بما فعل السفهاء منا

من حكمدار العاصمة, إلى كل شعب مصر

من حكمدار العاصمة إلى المواطن احمد ابراهيم القاطن بدير النحاس

لا تشرب الدواء, الدواء فيه سمون قاتل

و الراجل يتفزع و يرمى الكبايه مع انه مش المقصود اصلا,يالا ما علينا

مع ان الجملة دى كانت موضع سخرية كتير من اللى شافوا الفيلم العتيق

لكن برضه ليها معنى عميق شويتين

ان الناس كان عندها ضمير,يعنى البنت لما ملقتش الدوا راحت واخدة التروماى لغاية العتبة عشان تركبه هناك

و لما الصديلى لقى انه غلط, بالخطأ و مش مقصود

جرى ورا البت, و لما ملقهاش راح عالبوليس و صعد الموضوع لأعلى جهة

لدرجة اننا نسمع حكمدار العاصة بذات نفسه(ده غير رئيس مباحث العاصمة اللى انضرب من الهجانة) بينادى فى الراديو على المواطن احمد ابراهيم

و عشان ايه عشان يقوله متشربش الدوا, الراجل اتلخبط و هو بيعمله

لو شربته كده هتموت

طبعا كان موضع سخرية عشان لا يمكن اى حد هيعمل كده فى العالم

الناس كانت فاكرة انها بتشوف فيلم هندى

بس برضه برغم المبالغة فى الفكرة, بس كانت بتعكس حاجة مهمة جدا

الناس كان عندها ضمير, كله بيخاف على كله

حتى الحكمدرا ساب كل مشاغله و قعد ينبح صوته على احمد ابراهيم فى الراديو عشان ميشربش الدوا

لو عملنا قياس للسخرية اللى نالت الفلم عموما و الجزء ده خصوصا عشان سذاجة الفكرة

و بين اللى بيحصل دلوقتى و محدش بيتكلم خالص

اكل مسرطن ماشى, ميه ملوئة تمام, دوا مش موجود امال نسرق ليه لو موجود

تعديلات دستورية زى بعضه, تزوير و فساد ميضرش,رشوة و وساطة و محسوبية ظبط نفسك و ناولنى

كل ده كوم, غير اللى مذكرتوش, و انى اسمع من الحاج ان اللبن اللى فى السوق مغشوش ببودرة سيراميك ده بقى اللى دلق الكباية و كان مش بس قطرة,كان خرطوم ميه

مش عارف ذهن انهى شيطان اللى تفتق عن الفطرة العبقرية و المذهلة دى

يتهيألى هنا مفيش بقى مقارنة بين الصيدلى اللى غلط و مش عاوز يكون السبب فى موت واحد

و بين المسؤل عن غش اللبن و هيبقى مسؤل عن تسمم الاف

و يتهيألى كمان ان لو واحد من بتوع اللبن الصغيرين عرف و حب ينقذ المواطنين مش هيعلق ورقة ولا هيبطل يبيع عشان سمعة المحل

هيبيع و يكسب و يروح يقابل الحكمدار, هى ديتها ايه؟؟ اعلان فى الراديو و يطلع الحكمدار يحذر المواطنين بقى مش المواطن

بس الحكمدار بقى هيطع فى الراديو يقول

من حكمدار العاصمة إلى المواطن احمد ابراهيم القاطن فى كل حته فى مصر

اشرب اللبن بالهنا و الشفا يا معلم

اللبن فيه سيراميك متشطب

و انجز بسرعة عشان فيه 75 مليون غيرك عاوزين يشربوا

فى الفترة الأخيرة و الناس ملهاش سيرة غير موضوع الأسرى بتوع 67

اللى قتلهم بينامين بن اليعارز و هو قائد الفرقة شكيد

ده طبعا حسب الفيلم الوثائقى اللى عرضته القناه الأولى فى التليفزيون الإسرائيلى

و ده كله عشان مرور 40 سنه على حرب 67

ده شىء عادى, على اعتبار ان كل طرف فى الحرب بيحاول يبين الوقت اللى كان فيه قوى

زى ما احنا مبنزهقش من الاغانى الوطنية و فيلم الطريق إلى ايلات اللى التليفزيون معندوش غيرهم

المهم مش دى قضيتنا

الناس زى ما تكون جعانة و لقت برام لحمة

و الناس تكتب فى الجرائد, و بتوع التليفزيون يجيبوا ضيوف و محللين سياسيين

و الخارجية الإسرائيلية تنفى و الخارجية المصرية تقول علينا توخى الحذر

لأ و الانكى من كل كده ان يطهر ناس كانوا اسرى فى 67 دلوقتى

طبعا ده عادى يعنى, انا عمى كان اسير فى 67

بس كانوا مجموعة الأسرى اللى اتقتل منهم ظباط و جنود

و طبعا بيحكوا مهازل, ينفع مخرجيين هوليوود يتعلموا منهم

و ده مش جديد عالصهاينة باى حال

اللى مجننى بقى, ان الناس الأسرى اللى اتكلموا دلوقتى كانوا فين طول 40 سنة

سامع حد من الدكة الأخيرة بيقول ما هو الشريط لسه معروض, محدش كان هيصدقهم

اولا الشريط انا معتقدش انه لسه معروض قريب, عشان طبعا الصهاينة مش هيسيبوا فرصه يبان فيها انهم هزمونا إلا و يستغلوها احسن استغلال

كمان يعنى لو مكانش الشريط اتعرض خالص,هما بعد ما رجعوا من الأسر متكلموش ليه؟؟

الموضوع عامل بلبلة خصوصا مع عناوين من عينة

القاهرة تجمع ادلة تؤكد تورط بن اليعازر لمحاكمته امام محكمة العدل الدولية بلاهاى

الخارجية المصرية تؤكد لن نقطع علاقتنا بإسرائيل بسبب شريط!!!

الخارجية الإسرائيلية تؤكد ان الفيلم اللى اتعرض القتلى اللى فيه مش مصريين, من الفصائل الفلسطينية

زى ما يكون الفلسطينيين ملهمش ديه,سبحان الله,

المهم دماغى ورمت و طلع فيها كالو, بكلم واحد صاحبى و بشاركه فى تفكيرى ضحك قوى و قاللى

لو انت زانق ابوك فى موضوع و مش عارف يخلص منه يعمل اييييييييييه؟؟؟

هيقولك على خناقته مع جارك اللى من 10 سنين عشان تنسى و تجيب حقه و حقك

بصيت له قوى, قاللى التعديلات الدستورية يا معلم

لازم حاجة اقوى منها تحصل عشان ننساها شوية لغاية ما تعدى زى ما بيعدى الفيل من خرم الأبرة

ساعتها رن فى ودنى مش عارف ليه الصوت العميق بتاع الشيخ امام

و الصوت الدافى بتاع محمد منير و هما بيغنوا الكلام المعبر المؤلم بتاع احمد فؤاد نجم

ياما مويل الهوى ياما مويليا

طعن الخناجر ولا حكم الخسيس فيا

يا مصر و انتى الحقيقة و انتى اغترابى و شقايا

و انتى الجراح الرهيبة و انتى اللى عندك دوايا

علمنى حبك عبارة, سهلة و بسيطة و عفية

شرط المحبة الجسارة,شرع القلوب الوفية

ياما مويل الهوى ياما مويليا

طعن الخناجر ولا حكم الخسيس فيا

بيب بييييييييييييييييييب

مش عارف لحد امتى هتبقى الشوارع عندنا زى السيرك

و السواقين زى الحاوى

يعنى مش بيعتمد فى سواقته للعربية على مهارة سائق على قد ما بيعتمد على مهارة مروض اسود

لو لعيب عالحبل, او حتى لعيب جمباز

من كام يوم قادى حظى العاثر فى طريق مقفول قفلة الحوار العربى-العربى

مش الحوار العربى - الإسرائيلى

و الحمد لله انا مكنتش سايق, كنت راكب

عشان لو كنت سايق كان هيجيلى شلل رباعى

المهم خير اللهم اجعله خير, عربيات من ك ناحية

يمين و شمال و قدام و ورا و كان ناقص ييجوا من البلكونات و الشبابيك

و دراجات و موتسيكلات

و ناس على كل لون و دين

اللى بيتخانق و اللى بيزعق و اللى بيشتم

و اللى عامل زى عسكرى المرور بينظم الطريق

يعنى بإختصار تحول الشعب الميمون( و هو فعلا ميمون على رأى واحد صاحبى, ميمون بتاع اسماعيييييييييييين مش بتاع اليمين) اتحول الشعب كله لناس بتنظم المرور

و كل وحد طبعا بيغنى على ليلاه

يعنى اللى عربيته تفك من الزحمه يركب و انشالله اللى وراه يولع

المهم اليوم خلص بالنسبة لى لأن المشوار اللى كنت رايحه خلاص معاده هيروح

اتفقنا مع اللى بيلم الاجرة انى انزل و اخد نص الأجرة اللى دفعتها

ما هى مش هتخرب من كله يعنى

المهم قضيتها كعابى مع الحاجة الله يسترها لغاية ما عدينا الحته دى, و مشينا شوية حلوين زيهم عشان نلاقى حاجة نركبها

و طول ما انا ماشى عمال اضحك زى العبيط و الحاجة بتقول لا حول ولا قوة إلا بالله

الواد عقله خف و قرب يتجنن

هو طول عمره نفسه يسافر, يسافر عند البلاد اللى بتقدر البنى ادم

يسافر فى بلد فيها مواصلات ادمية

يسافر فى بلد حقه فيها مش مهضوم

و فضلت تدعى و تقولى يارب يخرج من اللى هو فيه و انا اسفره حتى موزمبيق

بس الواد يعقل

و انا كل ده مش بضحك لأنى اتجننت, بس بضحك عشان افتكرت المسئول الامريكى اللى زار مصر من كام سنة

و لما نزل الشارع و شاف الناس ماشية ازاى بعربياتها

الراجل انبهر و عرف قد ايه ان بلده متخلفه

و ان احنا فى مصر عملنا نظام جديد عشان نحد من حوادث العربيات

قال ايه ياخويا

انه لما شاف الناس ماشية ازاى بعربياتها, افتكر انه نزل مصر فى اليوم التاريخى اللى بنعمله كل سنه عشان الناس تمشى براحتها من غير ما تلتزم بقواعد مرور

يعنى بالعربى كده افتكر ان المنظر ده حالة عارضة بتحصل يوم فى السنة

عشان من كتر ما الناس بتلتزم بقواعد المرور بيجيلها ملل و ممكن الحوادث تزيد

و احنا بقى عشان نكسر الملل و نحبب الناس فى السواقة عملنا يوم الناس تمشى فيه براحتها من غير اى قيود

الراجل الغلبان انبهر باللى شافه و وعد بدراسته و تطبيقه فى امريكا

لا حول الله يارب

طيب بالله عليك ماليش حق اضحك زى العبيط او المجنون؟؟

احلى حاجة فى الموضوع ان امى وافقت مبدأيا على السفر و لو حتى لموزمبيق!!!!

كلاااااااااب و ماشى فى البلاد كلااااااااااااب

دى على وزن سواح و ماشى فى البلاد سواح

و دى معناها هيتفهم بعدين

امبارح قدرا كده وقع فى ايدى اداه من اللى بتعذبنى جدا

طبعا محدش بيحب يعذب نفسه

خصوصا لما يكون العذاب ده عذاب نفسى و فكرى رهيب

و عشان ارد لنفسى كرامتها و اعتزازها بنفسها

بطلت من زماااااااااان اقرا الجرائد اليومية

بس وقع امبارح فى ايدى جرنان منهم

و الحمد لله انه عشان مفتوح على صفحة العبقرى جدا الأستاذ عزت السعدنى

كده بقى مبقتش اداة تعذيب ولا حاجة

بقت حاجة هتفرحنى, خصوصا مع العنوان اللى غصب عنك هتلاقيه بيشدك

لو انت ايه, لو مبتعرفش تقرا حتى هتشدك الصورة

المهم بصيت فى الصورة و سرحت و قرأت العنوان و كلى امل انى اقرا موضوع شيق جدا

كان ايه بقى العنوااااااااااااااااااااااان؟؟

مفسحاتى كلاب بالليسانس!!!!!

الموضوع باختصار انه بيتعرض للنماذج اللى مش لاقية شغل من الشباب, او بمعنى اصح النماذج اللى ارتضت بأى شغل عشان مش لاقية شغل

يعنى مثلا واحد بكارليوس تجارة و شغال صبى عالمة, اه والله صبى عالمة بيلم النقظة وراها من عالاستيج

و واحدة خريجة اداب ايطالى اشتغلت بيبى سيتر و فى الأخر اجرت ميكروباص و ساقته !!!

و اللى من غلبه اشترى موبايل بخط بيزنس و بيحكى بحرقة عن اللى عمله فيه البوليس

لما مسكوه و قبضوا عليه عشان بيشتغل من غير ترخيص

و هو اللى لا سرق فلوس حد ولا تاجر بأعراض حد

ولا غرق حد ولا حرق حد

ولا جاب لحد اكل مسرطن,هو كل الموضوع انه حب يكسب قرشين

اما بقى صاحب العنوان ده اللى خلى قلبى يبكى

ليسانس حقوق و بيشتغل مفسحاتى كلاب,

بياخد الكلاب تتفسح و تتمشى عالنيل 3 ساعات فى اليوم ب 300 جنيه فى الشهر

ما هو لازم برضه الكلاب تتفسح و إلا نفسيتها تتعب برضه

مش لازم نهيألها الجو المناسب للتكاثر عشان يجبوا لما كلاب صغنتوتة و نلاقى فرضة عمل لكل 3 كلاب !!!

افتكرت احمد ادم فى مسرحية حودة كرامة لما مشى فى مظاهرة فى امريكا لناس بيهتفوا و يقولوا

we want protection for street dogs

و هو من طيبته يا عينى فاكرهم عاملين مظاهرة عشان محدش يبات فى البوكس !!!

القصد يعنى ان الكلاب دى حاجة مهمة جدا فى حياتنا و من غير منعرفش نعيش

يعنى الناس الغلابة اصحاب الكلاب دول يعيشوا ازاى لو معندهمش كلب يفسحوه؟؟؟

ولا احساسهم يبقى ايه بقى لما ضيف ييجى يزورهم و معاه الكلب بتاعه و ميلاقيهمش عندهم كلب ولا كلبة تونس الكلب السينجل بتاعه

و يا فضيحتهم بقى لو حد ما عائلتهم شم خبر انهم الوحيدين اللى معندهمش كلب

ممكن يقاطعوهم و يحرموهم من الميراث

الكلاب يا جماعة ليها وضع عالمى, مينفعش نستقل بيه

الله يمسيك بالخير يا عم نجم لما كتبت قصيدة كلب الست

سبحان الله, يعنى الإهتمام بالكلاب ده من زمان بقى

كان مبدع والله لما ختم قصيدته الجامدة و هو بيخاطب الحيوانات و قال:

بشرى لأصحاب الديول, و اللى له اربع رجول

بشرى لإخواننا البهايم من جمايس او عجول

اللى صاحبه يا جماعة له غناوى فى الإذاعة

راح يدوس فوق الغلابه والنيابه بالتباعه

انت تسوى في النيابه تسعميه م الغلابه

طب ياريت يافوكس كنا ولا تربطنا القرابه

هيص ياكلب الست هيص لك مقامك في البوليس

بكره تتولف وزاره للكلاب ياخدوك رئيس

بركاتك يا مصر

بقالى مدة بتابع كلام الناس عن حكاية الشجرة المبروكة اللى ظهر عليها نقش لفظ الجلاله فى طريق مصر اسماعيلية

كلام كتييييييييير و كل واحدة عنده روياته اللى بيدافع عنها

و اللى بيحلف ان ابنه راح و صورها بالموبايل

و اللى فرحان و يقول ظهر الحق و كلام من هذا القبيل

و المحافظة تحط عليها حراسة عشان التدافع من الناس و تعطيل الطريق

و انتداب مسئول من كلية الزراعة فى جامعة عين شمس عشان يقول ده طبيعى ولا من فعل البشر

و البيت بيتك يعمل عنها فقرة

و الجرائد تهتم بالموضوع على انه يطلع منه سبوبة فى شد القارىء

غير بقى الناس اللى بيأكدوا ان الشعب ده عبقرى فى انه يكسب من ولا حاجة

اللى عمل نصبة شاى و قهوة عند الشجرة

و اللى وقف بعربية حمص الشام

غير بقى البلطيجة من نوعية بتوع الكارتة بتاعة الميكروباص

اللى ياخدوا اتاوة على اللى عاوز يصور بالكاميرا ولا الموبايل

يعنى شغل على كبير قوى

و اهه بترزق يا بيه

انا طبعا ماليش اى صفه انى احكم على الشجرة و النقش على اعتبار انى مش متخصص ولا حاجة

بس لما شفت الصورة لقيت النقش بارز عن الشجرة و لونه غامق, و بقية الشجرة لونها فاتح زى ما تكون اتمسحت على ماكينة عند اى نجار

يعنى فى رأيى ان حد عملها

و غير كده, لما هى حاجة طبيعية ليه مشفنهاش غير دلوقتى؟؟

و الأهم من ده كله

اشمعنى مصر من دون كل الدول

و شعبها من دون كل شعوب الأرض اللى ربنا يخصه بطهور معجزاته

ده احنا حتى شعب كسول ولا بيعمل حاجة

غير انه بيحب يكسب بالفهلوة و تفتيح المخ

احنا عايشين كبت سياسى و قهر اجتماعى بيخلينا عاوزين نصدق اى معجزة تحصل عشان تأكد لنا ان ربنا كبير

يعنى نوع من تصبير نفسنا يعنى, نوع من التواكل مش التوكل

ما هو ربنا اللى اظهر النقش على الشجرة قادر انه يغير نظام حياتنا

لا ربنا مش هيغير نظام حياتنا غير لما نغير احنا نفسنا الأول

ان الله لا يغير ما بقوم حتى يغيروا ما بأنفسهم

فوق كل ده, احنا شعب بيؤمن بالخرافة بشكل كبير

و دى ارقام المركز المصرى للبحوث الإجتماعية و الجنائية فى 2003

ان المصريين صرفوا حوالى 10 مليار جنيه على الدجل و الشعوذة و فك الأعمال

و ان حوالى 300 الف واحد دجال و مشعوذ بيسترزقوا على قفا الهبل و اللى بيصدقوا الكلام ده

غير ان المصريين بيؤمنوا ب 274 خرافة

طبعا ده من 4 سنين شوفوا انتوا بقى دلوقتى بقوا كام

بالمناسبة انا افتكرت لقائ لوزير البترول فى البيت بيتك

كان المذيع بيسأله عن الإكتشافات البترولية و الغاز الطبيعى

رد الوزير بأدب و فخر ان عندنا فى مصر نسبة نجاح الإكتشافات 3 اضعاف المعدل العالمى للنجاح

طبعا حاجة تفرح

ف المذيع من فرحة الخبر سأله طيب ايه السبب, الأبحاث مثلا اللى بتتعمل بل البحث و التنقيب

رد الويزر قاله ان مصر بلد مبروكة, يعنى بلد بركة !!!

و ده بيوضح قد ايه التفكير فى البركة او الحاجات الخارقة ميسطرة على تفكيرنا بشكل كبير

الحاجة حواجة

لو سمحت دقيقة

معلش متعطل

مش هعطلك متخافش

يا سيدى انا مستعجل

بقولك ايه اسمع الكلمتين اللى انا حافظهم متخلينيش اتنرفز

طبعا مع التهديد الصارخ ده رضيت مرغما انى اسمع الأخ الفاضل المهذب المحترم اللى كان قرب يمد ايده عليا عشان مش عاوز اشوف المنتج اللى بيسوقه

هو اصلا كان شكله مش طايق نفسه و بيتلكك

وقفنا جنب عربية زلمكة شنطتها مفتوحة و فيها خلاطات و مكاوى و شوية اجهزة كده

و علبة تليفون نوكيا مش فاكر الموديل بتاعه فى الصالون من جوه

و ابتدى الشو اللى انا حفظته من كتر ما شفته و سمعته

احنا بنقدم لحضرتك ازازة برفان و فيها كارت

حضرتك بتفتح الأزازة هتكسب خلاط او مكوة او تليفون نوكيا

و لو لقيت الكارت كسبان بس هتدفع تمن الإزازة 40 جنيه

و لو لقيت الكارت مش كسبان هاتخد ازازة البرفان مجانا و هتاخد كمان 20 جنيه

طبعا انا مش متأكد ان الإزازة فيها ميه بريحه و بس

يعنى انا اكاد اجزم انها ميه مجارى

المهم بصتله و قولتله طيب لما كل الكروت كسبانة مفتحتش ازازة ليييه؟؟؟؟

بدأ دلوقتى اللى بيكلمنى و الشرر بيطق من عينه

قاللى انت فاكرنى حرامى(يعنى هو انا اللى حرامى؟؟؟)

المهم اتكلم كلام كتييير قوى توهنى فيه

انا اصلا كنت بسمعه عشان اتقى شره, لأنه شكله كان ناوى عالشر

قلتله شكرا و مشيت

سمعته بيقول مع الف مليون سلامة, بيقولها بأسلوب ساخط و ساخر و ناقم فى نفس الوقت

بس انا بقى مزعلش قوى, عشان بصراحه حسيت ان سخريته دى مش عليا انا

على قد ما هى عالبلد و حالها و على احتياجه انه يقف طول النهار فى موقف ميكروباص يرخم و يتنح عاللى رايح و اللى جاى

و انا ماشى بعده يخطوتين شفت واحد تانى برضه( بيتنح) على واحد زيى ماشى فى الشارع و الراجل بيقوله والله مستعجل والله مستعجل

افتكرت جمله عبقرية قالهالى مهندس عبقرى لما اضطر انه يشتغل سواق تاكسى

دى دنيا ***** و الحاجة حواجة

عالبطاطا البطاطا, ياعينى عالبطاطا

لا تجيبلى شكلاته لا بلاش يا وله

روح رجع البطاطا لا بلاش يا وله

لا تجيبلى شكلاته لا بلاش يا وله

لا ترجع البطاطا لا بلاش يا وله

الله يرحمك يا سندريلا, اكيد اكيد اكيد مكنتيش هتقولى كده لو عرفتى المعلومات الرهيبة اللى عرفتها عن البطاطا

طبعا محدش يختلف على الشوكولاته ابدا

و لا يمكن برضه تتقارن بالبطاطا

بس لما الواحد يكون لسه صغنون و بيبتدى حياته ومش لاقى يجيب كارت المويايل ماشى

لما واحد يكون خريج و امكانياته الفكرية و العقلية محترمة و صاحب الشغل بيعاملة على انه مبيفهمش حاجة برضه ماشى

لكن لما الواحد يروح منظقة زى جولف سيتى اللى فى العبور

و يشوف هناك فيلا, سورى قصدى قصر

لأن اللى شفته هناك مش فيلا ده لا يمكن انه يقل عن انه يكون قصر

كووووووووووول ده و احنا لسه فى عادى

لكن لما الواحد يعرف بقى ان قصر من دول معروض للبيع بكااااااااااااااااااااااام؟؟؟

ب 125 مليون جنيه( انا كان هيغمى عليا لما سمعت الرقم, امال اللى بيشيلو يعمل ايه؟)

يعنى وارد جدا ان صاحب القصر يكون بيزنس مان رهيب, او ممكن كمان يكون مستثمر اجنبى و عارف حب المنظرة اللى فينا,

و ممكن برضه يكون واحد من اللى بيسهلوا قروض البنوك

او من اللى بيتاجروا فى الخضار و الفواكه المسرطنة

او ممكن يكون بتاع رقاصة او مدرب كورة

او حتى تاجر مخدرات

لكن المفجأة ان صاحب القصر ابو 125 مليون جنيه

طلع تاجر بطاطا

اه والله بطاطا

حتى ان اللى بيحكيلى قاللى يا بطاطا يا بطاطس

الرقم برضه و تأثيره يا جماعة, خلى اللى بيحكى اتلخبط بين البطاطا و البطاطس

المهم لما عرفت, حطيت الصورة دى جنب صور كتير قوى

زى مثلا مهندس شغال زبال ب 250 جنيه

او خريج علوم بتفوق بيكسر حجر فى الجبل

او دكتور مثلا شغال سواق تاكسى

او ملايييييييييييييييين كتير لا لاقييت شغل ولا حتى اللقمة

جمعت الصور دى فى دماغى و مبقتش حاسس غير بحاجة واحدة

لا عاوز ابقى غنى ولا اشترى القصر

عاوز اروح البيت اعمل شهادتى قرطاس لب !!