Thursday, August 23, 2007

امل

من كام يوم كده قرينا عن البنت اللى اسمها امل من الغربية اللى اختفت

بنت نصرانية و عندها 18 سنة و بيقولوا ان المسلمين خطفوها يعنى عشان تتأسلم

المهم يعنى ملخص القصة ان البنت اخدت اذن من شغلها ساعة وو من ساعتها مرجعتش

النهاردة يبقى بقالها حوالى 10 ايام

المهم يعنى قالوا انهم شافوها مع واحدة منتقبة

و بعد ما اختفت بكام يوم اتصل واحد اسمه محمد عبد الله و قال لابوها ولا لأمها مبروك بنت ربنا هداها

راحت المباحث جايباه و حققوا معاه و سابوه

يعنى بصراحة مش عارف اقول ايه,قصة بقت سخيفة جدا الصراحة

اى حد يختفى من مسلمين ولا نصارى يتهموا الأخر انه بيأسلمه ولا بينصره

مبدأيا كده مفيش دين يتأثر بدخول الف ولا خروج 10
و بعدين يعنى هى اول ما تحتفى كده تبقى تأسلمت

يعنى حتى مش يستنوا يوم ولا اتنين ممكن تكون فين حتى

لا و الأخوة الأقباط عاملين اعتصام فى الكنيسة من ساعتها

و باعتين رسايل لشيخ الأزهر و رئيس الجمهورية و مشعارف مين تانى

انا مش بتكلم فى ملابسات الأختفاء ولا حتى اسلامها لو كان حصل

انا بتكلم فى الطريقة اللى بنعالج بيها مشاكلنا الداخلية

و نحط 100 خط تحت الداخلية دى

اللى الناس مش واخدة بالها منه ان فيه ايادى خفية تلعب عشان تقوض اساس الوطن

ده ان كان لسه متبقى بقية من الوطن

و انهم يخلوا فيه طائفية و تبقى حجة عشان ييجوا عندنا

و يتكرر عراق تانى و لبنان تانى و ابوغريب تالت و رابع

الناس دى بقى مالهمش حل, لانهم زى الطفيليات اللى عايشة على امتصاص الغذاء من النباتات
طبعا مش هنقطع النبات
لكن بالنسبة للفرع اللى سايب الطفيليات تتغذى عليه انا بقى بهديله الصور دى يمكن يفوق


Tuesday, July 24, 2007

افيال,نسانيس,قرود.....احمدك يارب

والله مش عارف احنا هنوصل لغاية فين بالفساد المتفشى فينا ده زى الوباء

و مش عارف احنا بنتقدم ولا بنتأخر ولا بنعمل ايه بالظبط

ولا عارف تصنيفنا وسط الدول عموما

بس الأكيد اننا بقينا حاجة كده مينفعش تتصنف

بقينا اضحوكة بين كل الدول والله باللى بنعمله ده

المقدمة الطويلة العريضة دى بس عشان الخبر الجامد جدا اللى قريته لسه حالا طازه

قال ايه باه,عشان يعنى الناس تاكل لحمة و تتظبط و تشرب شوربه بقى و كده


طبعا مش هيخلى الناس تاكل افيال

لكن اللحمة عجوزة و عمرها اكتر من 5 سنين,فبيسومها افيال يعنى

المهم ان الموضوع ده مخالف للوائح اللجنه الطبية البيطريه

و اللى يضحك بقى ان اللجنة الطبية البيطرية دى كانت مع الراجل ده فى الهند و هو بيشترى اللحمة عشان يكشفوا عليها

و الرجل كتر خيره مد اقامة اللجنة 10 ايام بدون ابداء اسباب

طبعا ما هى الهند ام العجايب يمكن يتعاقدوا كمان على شوية نسانيس و بقر من اللى بيوقف الشارع هناك

و خلى الناس تاكل,دول شوية جعانين هيدقوا يعنى على اللحمة بتاعة افيال ولا قرود ولا حتى هنود

و اللحمة هتنزل فى السوق و الناس هتاكلها,غلابة نفسهم ياكلوا لحمة و بيفكروا انهم ياكلوها حتى لو هيموتوا بعد ما ياكلوها

و بعدين الكيلو بتاعها ب 9 جنيه

يعنى ارخص من كيلو الجبنة !!!

المهم ان اللى وافقوا على دخول الحاجات دى مصر ميبقوش يعيطوا زى ما حضل بعد لحمة توفيق عبد الحى ولحوم النسور و الصقور

اللى كان اكلها للناس من حوالى 20 سنة

Saturday, July 14, 2007

قتل الملائكة


النهاردة خير اللهم اجعله خير كانوا جايبين على 90 دقيقة حاجة غريبة
بنت اتعرضت للإغتصاب و جابت طفلة
خبر ممكن نسمعه كتير وسط الكم الهائل من حوادث الإغتصاب اللى بيفرزها مجتمع عنده كبت جنسى جماعى
لكن الغريب فى الموضوع ان البنت اللى اتعرضت للإغتصاب عندها 11 سنة !!!!!!!!!!!!
ايوة الواحد يفتح بقه من هنا للصبح,على القرف اللى حسيته لما سمعت الموضوع ده
يعنى الاستاذ اللى نفسه طاوعته انه يغتصب ملاك ,الدنيا فضيت من الستات او البنات فيغتصب طفلة؟؟؟؟؟؟؟
---------------------------------------------------------------------------------------
هو انا كان نفسى اكتب رأيى فى الموضوع ده بس حاسس بإحباط جامد
و فى نفس الوقت مخنوق و متضايق من حالة الكبت الجنسى اللى وصللها الشباب
مش عارف احنا وصلنا او هنوصل لغاية فين بالوضع ده
كل اللى حاسسه انى حاسس بغربة,غربة جامدة

Tuesday, July 10, 2007

ثورة العطشى, و الباقى فى السكة

الواحد بقاله مده مدخلش عالبلوج بتاعته, الحتة اللى بيحس فيها انه براحته
الإكتئاب و الملل بقوا ضيوف اعزاء عليا, او على رأى واحدة صاحبتى احنا اللى بقينا ضيوف اعزاء عليهم
يادوبك الإسبوع اللى فات حسيت ان فيه حاجة جديدة
خير اللهم اجعله خير داخل من الباب لقيت تامر بيه امين فى البيت بيتك بيتكلم فى التليفون عالهواء مع محمد ثروت
الراجل كان بيقوله ان ناس قافلين الطريق الساحلى الدولى عشان بقالهم مش عارف كام شهر المية مقطوعة عنهم
و فعلا حجزوا السيارات لمدة حوالى 10 ساعات عشان المحافظة تستجيب لطلباتهم و توصلهم المية الحلوة
و تامر بيه زعلان قوى من الإسلوب غير الحضارى للمطالبة بشوية مية
كان نفسى اسأله لو نزلت السوبر ماركت و ملقتش الميه المعدنية اللى بتشربها هتحس بإيه
المهم الفقرة اللى بعدها كان المفتى جاى يتكلم عن موضوع الختان و الفتوى الجنان اللى طلعها,و دى ممكن نعملها بوست لوحدة اصلا
و تامر امين حكى له على اللى حصل من الأهالى و كده, يقوم بقى فضيلة المفتى بقى ايه
يقوم يناشد الأهالى انهم يفرجوا عن العربيات المحتجزة
و يقولهم ان كده غلط و حرام, و يضرب امثله من مواقف للصحابة بحاجات كويسة
و ضرب مثل لمحافظة الشرقية بالكرم, مش عارف ايه علاقة الكرم بالمية المقطوعة بس ما علينا
و يقول ان ممكن يكون فيه ناس عيانة و مش عارفين ياخدوا دوا السكر
اكيد طبعا واحد رايح الساحل الشمالى و اتأخر هيتعب و يموت كمان
و لا جاب سيرة المحافظة ولا انها المسئولة عن حالة الكبت و الإحتقان اللى وصل الشعب ليها
ولا اتكلم عن اهمية المية للناس اللى مش بيحسوا خالص
ولا ضرب مثل بسيدنا عثمنا لما اشترى نص البئر من الراجل اليهودى عشان المسلمين يشربوا
ولا مثلا عن سيدنا عمر لما كان بيخاف انه يسئل عن بغلة تعثرت فى الطريق
مش كام الف واحد مش لاقيين يشربوا
ولا عن سيدنا ابو بكر لما كان بيصرف امله كله فى سبيل الله
مش مناقصات تغيير المواسير و الله اعلم باللى بيحصل فيها
باختصار خلى الأهالى هما اللى غلطانين وش كده
اللى مش قادر افهمة ان محدش اخد باله ان حالة احتقان زى كده ممكن تعمل ايه؟
و لكم فى اعتصامات العمال عبرة
محدش فكر ان الجوع و العطش ممكن يخلوا الناس يهبوا و يثوروا عشان اللقمة و بق الميه
اما اللى انا متأكد منه بجد ان الحادثة دى هتبقى بداية جنب اعتصامات العمال فى بناء نظام توعية جديد عند الشعب و الناس العادية
ممكن,ممكن فى يوم من الأيام يقوم يثورة
ثورة الناس العطشانة و هما بيطالبوا بكباية مية نضيفة
دلوقتى افتكرت صوت الشيخ امام العميق و الدافى قوى و هو بيغنى و انا بغنى معاه
هلى يا شمس البشاير
طابت و ان الأوان
طلى و حلى الستاير
نور الأشاير يبان
و ارمى الضفاير مداين
فوق المكان و الزمان
مصر الشباب العزيزة
قامت و كان اللى كان
قامت و كان اللى كان
قامت و كان اللى كان

Thursday, June 14, 2007

اتنين

من ساعة ما عرفت ان وجيه عزيز هيغنى فى الساقية عملت حسابى انى احضر
شجعنى على كده اصحابى اللى قالولى هنروح مع بعض
الصراحة انا مكنتش سمعته قبل اليوم الجامد ده, كنت قريت عنه بس و سمعت عنه من اصحابى
لكن لما روحت لقيت حاجة تانية خالص
لقيت ان اللى قريته و اللى سمعته عنه لا يوفيه حقه ابدا
بيغنى بكل حواسه و مش بيغنى اى كلام
و الحانه و الفن اللى بيقدمه بوجه عام حاجة كده تستحق ان مصر تنتسب للراجل ده
زى ما بتنتسب للاهرام و ابو الهول و شرم الشيخ
بمعنى اننا نفخر ان عندنا فنان بالشكل ده
لما دخلت القاعة اصلا بالعافية لقيت مكان عالسور, زحمة رهيبة, ناس بتحب الفن اللى بجد
خصوصا ان كان معاه الشاعر على سلامه كاتب معظم اغانيه
م الأخر كانت امسيه جامدة جدااااااااااااا هما الأتنين مع بعض
وجيه عزيز و على سلامة
و مع وجيه عزيز اغنى
قول معايا قول بجد
قول معايا قول بجد
هى عيشة ولا موتة ولا فوته فى حارة سد
قول لحد أى حد
قول لحد أى حد
حد رايح حد غايب حد جاى
حد لسه فينا فايق حد حى
قول ياعم, قول يا هم
قول لحد لسه فيه عنده دم

Tuesday, June 12, 2007

انا مصرى و ابويا مصرى

فى بوست قبل كده كتبت عن يوم قمىء شفته مع امى فى مستشفى التأمين الصحى و المعاملة التحفة اللى بنشوفها جوة بلدنا
بس لما قريت بقى خبر اختطاف 90 مصرى فى الأردن حسيت قد ايه احنا مالناس سعر ولا قيمة
لا جوة مصر ولا برة مصر
و عرفت قد ايه( او ممكن نقول اتأكدت) اننا يعنى فعلا بلا اى قيمة
لا قيمة معنوية ولا قيمة مادية ولا اى نوع من انواع القيم بتاعة البشر
المهم يعنى مفاد الخبر بيقول ان فيه 90 واحد اتخطفوا فى الأردن و الخاطفين طالبين فدية مالية
ايوة, رجعنا لورا عشارت السنين, فى عصر الخطف و المافيا, بس مع المصريين بس
باعتبارهم ارخص اجناس الأرض
و كمان اللى خطفهم متأكد ان لا حكومة ولا وزارة خارجية هتتحرك
ما هو شعب رخيص, يالا خلينا نخلص شوية من الزحمة
ده احنا بقينا 75 مليون, هيأكلونا منين؟؟
ألا صحيح, هما فى الصين بياكلوا منين؟؟؟ سؤال فى وسط الكلام
المهم اللى خاطفينهم بقى طالبين فدية مالية عشان يفرجوا عنهم
طيب الحكومة اكيد مش هتدفع
و اكيد برضه مفيش وساطة من دولة اجنبية او عربية, عشان دى جماعة جديدة اول مرة نسمع عنها
و اكيد برضه اللى مسافر يشتغل فى الأردن اكيد اهله مش هيعرفوا يدفعوا الفدية
ده ربنا الاعلم باهله هيعيشوا ازاى فى الفترة اللى هو مخطوف فيها,لأنه اكيد كان بيبعتلهم فلوس
و الاغرب من ده كله هو ان عدد 90 مصرى مختطفين كتير جدا, يعنى لو كان فيه جنسيات تانية كان ممكن الواحد يقول عملية منظمة
لكن دول مصريين بس, يعنى عملية منظمة ضد المصريين
لا و وعدوهم بعقود عمل فى ايطاليا, يعنى عارفين نقط الضعف و مكان اللى يمنوا بيه المصريين
و خدوهم لفوا بيهم تركيا و لبنان و يعتقد انهم حابسنهم فى سوريا دلوقتى, يعنى لا تعليق بصراحه
والله مش عارف اقول ايه, ربنا يرجعهم بالسلامة و يصبر اهلهم
و يغير الوضع اللى خلاهم يسافروا بلد غريب يتنظم ضدهم حاجة بالشكل ده

ده كان راسب

فى الشغل المنيل اللى انا فيه ده ممكن الواحد يتخيل اى حاجة غلط و حرام و زى الزفت
طبعا, مش شغل فى مصلحة حكومية
المهم امبارح كنت قاعد مع واحدة زميلتى اساعدها فى شغلها
هى بتشتغل فى شئون الطلبة بتعمل شغل الكمبيوتر,يعنى نقل السجلات و جوابات الوكلاء و العميد و كده
المهم واحدة معها فى الأوضة ادتها ورقة تكتبها عشان تطلع لوكيل الكلية يمضى عليها
قريت الورقة و لقيت مصيبة
المفروض مكتوب فى الورقة نتيجة التماس عمله 2 طلبة و المفروض الوكيل يمضى عليه
الإلتماس الأول طالب اتحولت نتيجته من راسب لناجح عشان ايه بقى
عشان لما راجعوا درجاته, المفروض انه كانت غياب فى امتحان العملى, و بعد المراجعة لقوه جايب 23 !!!!!
و الطالب التانى درجة اعمال السنة مكانتش مرصودة خالص, و بعد المراجعة برضه اتحولت نتيجته من راسب لناجح
والله انا اعرف بما اننا كلنا بشر, ان وارد ان الواحد يغلط
يغلط فى رقم, فى صفر مثلا, فى حاجة قريبة
لكن واحد يتكتب غياب و هو جايب درجة فى الإمتحان, جديدة دى
و واحد تانى يتساب مكان درجة اعمال السنة بتاعتة فاضية و هو ليه درجات, برضه جديدة
مش عارف ليه المستوى المنحط ده من عدم الضمير و شغل اى كلام
المهم بقى, ان ال 2 طلاب دول دوروا على حقهم و هياخدوه اهه
ياترى فيه كام زيهم مفكروش ان ممكن يبقى ليهم حق؟؟
طبعا عشان نظام التعليم بيخلى اى حد يشك فى قدراته العقلية و النفسية و كل حاجة

فى ذكرى الشيخ امام



امبارح كان يوم جامد جدااااااااااااا, حضرت حفلة لعزة بلبع فى الساقية بتغنى اغانى الشيخ امام عيسى فى ذكراه

بصراحة هى ابدعت اخر حاجة, و احساسها كان جميل قوى

و الشىء الكويس ان كان حاضر الحفلة معانا المستشار زكريا عبد العزيز رئيس نادى القضاه

اللى الناس فضلت تحييه بشكل رهيب, تحية اكتر من اللى عزة نفسها اخدتها

عموما الحفلة كانت اكتر من رائعه

و من اغانى الشيخ امام اغنى

اذا الشمس غرقت فى بحر الغمام, و مدت على الدنيا موج الضلام

و تاه البصر فى العيون و البصاير, و داب الطريق فى الخطوط و الدواير

يا ساير يا داير يابو المفهومية, مفيش نجدة ليك غير عيون الكلام

مفيش نجدة ليك غير عيون الكلام

مفيش نجدة ليك غير عيون الكلام

Monday, June 4, 2007

انا م البلد دى, انا م البلد دى

يوم من الأيام اللى فعلا بكره فيها عيشتى فى مصر
امى تعبت, عادى اى حد بيتعب, بس عشان كانت محتاجة جراحة صغيرة كده فى ايديها و هتاخد اجازة فكان لازم-للأسف-انها تروح مستشفى التأمين الصحى
انا انا اصلا مبكرهش فى حياتى قد التعامل مع المستشفيات اللى من النوع ده
اللى هى حكومة و كل اللى فيها من اطباء و تومرجية و رجال امن بيعاملوا المواطن على انه ولامؤاخدة شحات
المواطن الشحات ده جاى يعطلهم و يعكنن عليهم و يخليهم ميعرفوش يشوفوا شغلهم
بس شهادة للحق قبل ما اقول على اللى استفزنى, فيه ناس محترمين هناك, زى اى حتة بس طبعا قليلين
المهم اول ما دخلنا قابلنا دكتور كان خارج و شافنا و قالنا خير؟؟ مين اللى تعبان
بصراحة دكتور وجهة بشوش كده و على وشة ابتسامة جميلة و بيرد على كل الأسئلة بخصوص الوضع اللى احنا فيه
و بيستمع باهتمام , و فوق ده بيكره الروتين بتاع الورق و الكلام ده
طبيعى جدا واحد روحه حرة هيكره الروتين القاتل ده
المهم شاف الجرح اللى فى ايد ماما و طمنها و عملنا ملف للعمليات و ادينا مستنيين
طبعا مندهشتش لما عرفت ان الدكتور ده مش مصرى!!!! ده اردنى
المهم فضلنا مستنيين حوالى ساعة مثلا لغاية ما دخلنا العمليات
وصف حجرة العمليات بقى
حجرة مربعة كبيرة, مكيفة تكييف قوى, الحائط المواجه للباب فيه بابين كبار مكتوب عليهم عمليات 1 و 2
و الحائط اللى عالشمال فيه عمليات 3 و حجرة صغيرة
و الحائط اللى عاليمين فيه عمليات 3 و حجرة الدكاترة و طبيب التخدير و كده
المهم ان الحجرة المربعة الكبيرة دى فيها 3 سراير عليهم مرضى مش منظمين طبعا,المهم انهم بعاد عن ابواب حجرات العمليات ال 4
ممرضة جابت لماما كرسى جلد زى بتاع المكاتب بس باين عليه جديد, و الدكتور جه شاف ايديها و راح ابتدى شغل
امى تقوله بالراحة, و انا اقوله اديها بنج
و هو يقول مفيش لزوم, ابص على وش امى الاقيها بتموت من الألم
لما لاقانى كده قالى استنى بره, و جه دكتور تانى معاه و تعمد انه يدينى ظهره عشان مشفهوش من الكوه اللى فى الباب
لما ملقتش منه فايدة رحت دخلت تانى كانوا خلصوا, اقوله مفيش علاج, قاللى لالالالا
مع ان المفروض عالأقل تاخد حقنة مسكن, ما علينا
المهم فى كل ده كان ملقت للنظر جدا منظر الدكتور, باليونيفورم الأخضر الزبالة اللى المستشفى كلها بتلبسه, عيانين و دكاترة
و منظره و هو مكرمش و لو جبت اصغر تومرجى فى المستشفى مش هيرضى يلبسه
و منظر ايديه و هى لونها ابيض من كتر استخدام حاجة فى العمليات, الله اعلم هى ايه انا معرفهاش, بس ايديه كان لونهم غريب
و الدكتور التانى اللى جه معاه و هو ماسك ايد ماما عشان الدكتور الأولانى شغال فى الجرح
تليفونه رن راح ماسك ايدها بإيد واحدة بس ورد عالتليفون
ده غير انى لما دخلت بعد كده عشان اخد بقية الورق لقيته قاعد مولع سيجارة فى الأودة المكيفة بتاعة المعليات !!!!!!!!!
و التومرجى بيطلع ماما بره على الكرسى ابوعجل عشان مكانتش قادرة تقف, كان كل همه ان الكرسى ده خاص بقسم الجراحة و مينفعش يتساب برة !!!!!!
مش عارف امتى هيكون عندنا البنى ادم اهم من الورق و الدبابيس و الكرسى ابو عجل !!!!!!!!!

Saturday, May 26, 2007

امايه.. و انتى بترحى بالرحى..
على مفارق ضحى..
وحدك و بتعددى
على كل حاجة حلوة مفقودة
متنسنيش يامه فى عدودة
عدودة من اقدم خيوط سودا فى توب الحزن
لا تولولى فيها ولا تهللى...
و حطى فيها اسم واحد مات
كان صاحبى يامه...
و اسمه
ناجى العلى
عبد الرحمن الأبنودى-الموت على الأسفلت
------------------------------------------------------------------------------------------------
الأبيات دى كل ما اقراها تلمسنى من جوه, مش عشان كلامها البسيط و معناها العميق بس
كمان عشان كل مرة اقراها يظهر قدامى ناجى العلى اللى الأبنودى يقصده فى الأبيات على انه حاجة من الحاجات الحلوة اللى فى حياتى و
بتموت كل يوم
الأبنودى يقصد ناجى العلى الرسام الفلسطينى
و انا ناجى العلى بالنسبة لى مجرد رمز, رمز لكل حاجة فى حياتى او المفروض انها تبقى فى حياتنا كلنا و بتموت

الجمعة اللى فاتت....و الجمعة اللى قبلها

يوم الجمعة اللى قبل اللى فاتت اول ما صحيت من النوم كنت سامع صوت الترانيم جاى من الكنيسة اللى ورا البيت
الصراحة, للحظة واحدة اتضايقت من الصوت العالى مع انى كنت صحيت من النوم خلاص
بس فكرت فى الموضوع, صوت ترانيم و صلوات جاية من الكنيسة, ايه اللى يضرنى فى كده؟؟؟
خصوصا ان المربع اللى انا ساكن فيه, موجود فيه حوالى 6 مساجد و دى الكنيسة الوحيدة اللى فيه, مع العلم ان اقرب كنيسة مش اقل من 10-15 دقيقة مشى
و غنى عن الذكر طبعا ان صوت الأذان فى المكيروفون 5 مرات فى اليوم, و فى الصلوات الجهرية كمان
ده طبعا غير اذان الفجر لوحده, عشان بيبقى فى وقت الناس كلها نايمة, ف لو المسلم بيصى عشان يصلى فرض ربنا
المسيحى يصحى ليه؟؟
المهم انى ملقتش مبرر لأنى اكون متضايق من الصوت اللى جاى من الكنيسة,لأن كل واحد من حقة يقيم شعائر دينه زى ما يحب
-------------------------------------------------------------------------------------------------------
نفس اليوم بقى فى صلاة الجمعة, فى النص التانى من الخطبة الإمام اتكلم عن موضوع الفتنة الطائفية اللى كان حصلت من اسبوعين فى العياط
و قال ان الجانبنين محتقنين بسبب الإقتصاد الضعيف و الفقر و الغلاء و انحطاط الأخلاق و غيرهم من الأسباب اللى احنا عارفينها
و بعدين وجه كلامه للمسلمين قال ان لو المسيحى عنده مبدأ احب مخلصيك و اكرم اعدائك و من ضربك على خدك الأيمن صعر له خدك الأيسر
ف احنا عندنا قول الله تعالى " خد العفو و أمر بالعرف و أعرض عن الجاهلين
كذلك قول الله تعالى " لا ينهاكم الله عن الذين لم يقاتلوكم فى الدين أو يخرجوكم من دياركم أن تبروهم و تقسطوا إليهم
و ضرب امثله من السيرة عن عمرو بن العاص مثلا لما كان بيدى الأقباط مال عشان يبنوا كنائس
و عن سيدنا عمر لما رفض يصلى فى الكنيسة فى بيت المقدس و قال لو صليت هنا لأخدها المسلمون و قالوا لقد صلى عمر هنا
و سأل ايه اللى هيضر المسلمين ان الأقباط يحولوا منزل عادى لمكان عبادة؟؟
و غيره من الكلام الكثير اللى له معنى و دلالات عميقة
انا الصراحة انبسطت من كلامه, خصوصا انه بيتوافق مع اللى حصلى يومها الصبح
و كنت مبسوط ان عندنا خطباء بيعرفوا يتكلموا فى الدين ازاى و انه بيربط بين الدين و الدنيا
و يومها خرجت من الصلاه و انا متكيف قوى
--------------------------------------------------------------------------------------------------------
الجمعة اللى هى امبارح بقى, اول ما الخطيب بدأ يتكلم حسيت باختلاف الصوت, لغاية ما اتكلم كلمتين كمان عرفت انه غير الخطيب اللى بيخطب كل مرة
صحيح ان الخطيب ده بييجى من وقت للتانى, بس اشمعنى الجمعة دى؟؟؟
بعد اللى قاله الخطيب الأولانى الجمعة اللى فاتت؟؟
و اللى أكد لى الموضوع ده انى لقيته بيتكلم عن ايه؟؟؟؟؟؟؟
عن الغيبة و النميمة!!!!!
صحيح هى الغيبة و النميمة حاجات فى الدين و الناس لازم تعرفها
بس محدش تقريبا مش عارف الغيبة و النميمة
و بعدين احنا بنقول الواحد يختار التوقيت المناسب
يعنى مينفعش فى وقت كل الناس بتفتى, و تلاقى واحد بيقولك إرضاع الكبير
و تلاقى واحد يقولك التبرك ببول الرسول صلى الله عليه و سلم
و يكون عندنا مواجهات طائفية بين مسلمين و اقباط
ناهيك طبعا عن الفساد بأشكاله و اللى منهم الرشوة
و ييجى فى الاخر يقول الغيبة و النميمة !!!!
ولا احنا كل واحد بيقول كلمة حق مبيعشلوش صوت !!!!

Thursday, May 17, 2007

إلى كل الموظفين الحكوميين, اللبن الأورجانيك مجانا فى المصلحة

مش عارف ليه كل فترة يتفتح موضوع إرضاع الكبير
و المشكلة ان اللى بيتكلم فيه مش بيوضح مثلا إذا كان الحديث الصحيح عن النبى صلى الله عليه وسلم خاص بحالة سالم مولى ابى حذيفة ولا ممكن يتعمم
اخر حاجة قريتها واحد من المشايخ, حتى مش فاكر اسمه قال ان الموظفة ترضع زميلها فى العمل عشان تحلل الخلوة بينهم فى اوقات العمل !!!
يعنى الست و الراجل اللى بيتقفل عليهم مكتب واحد و محدش يدخله غير بإذنهم, الست تتفضل مشكورة و تلقمه ثديها عشان تحلل الخلوة بينهم
ايوة هو قال كده, الإرضاع بالتقام الثدى مباشرة !!!
يا حلاوة يا حلاوة, لأ و قال انها ممكن تخلغ حجابها قدامه و ان الإرضاع ده لا يحرم الزواج !!!!
والله الموضوع حيرنى خصوصا ان انا موظف ;)
بس مش معايا اى موظفات فى المكتب خااااااااالص, انا لوحدى كده :D
بس تخيلت بقى لو فعلا اخذوا بالفتوى دى, يا نهار ابيض
هتلاقى كل الشباب العاطلين اللى بيكرهوا سيرة الحكومة و شغلها جايبين وسايط عشان يشتغلوا حتى فى البوفية
و هتلاقى فلوس دخول المصلحة الحكومية بقت اكبر من فلوس البترول
و هتلاقى بقى الموظفين اللى موجودين بالفعل بيحبوا الشغل و كل واحد بييجى بدرى
طبعا عشان ياخد الرضعة
و بالنسبة للشباب بقى الشيخ قال ان الإرضاع لا يحرم الزواج, فعنده فرصه انه يجرب اكتر من مصدر ما هو كله بالفتوى بقى
و هتلاقى كمان الراجل من دول بيجتهد انه يترقى عشان يبقى جنب المديرة باعتبار ان الدهن فى العتاقى
و الشباب مبيعملش شغله جامد عشان يفضل جنب المزز من الموظفين
و كل شهرين ولا حاجة لما الراجل من دول يكون رضع من كل الموظفات تقريبا يطلب نقله لمكان تانى
اهه فرصه يجرب برضة حاجة جديدة, احسن من اللبن ابو بودرة سيراميك
ولا الست اللى والدة جديد, صحتها ياعينى هتروح, هتلاحق على ابنها ولا على زمايلها
ولا بقى ممكن بنفس المنطق ترضع المدرسة مثلا طلبة ثانوى باعتبارهم بلغوا الحلم
ياعينى يابنتى لو مدرسة بنين و كل فصل فيه 60 ولا 70 طالب
و كده نبقى لقينا حل لمشكلة التعليم و اختفاء الطلبة و التزويغ
و هتلاقى بقى ناس يطلعوا عالفضائيات و يتكلموا فى حكم الرضعات المشبعات
و يجيبوا فريقين واحد محافظ و التانى مجدد
واحد يقولك خمس رضعات مشبعات عشان تحلل الخلوة بينهم
و التانى بيحلف بأغلظ الأيمان انه لازم يتكرع عشان يبقى شبع
و التالت يأمن على كلام و التانى و يقولك انه لازم يأشط على كتف زميلته و تمسحله بقه بالبافتة عشان يتأكدوا انه شبع
و ساعتها بقى انا هاسمع كلام امى اللى بتقولى امسك فى الوظيفة بإيدك و سنانك عشان مش هتلاقيها تانى
طلع عندها بعد نظر!!!!

Tuesday, May 15, 2007

تاج و اشياء اخرى

وصلنى تاج من محمد مش معاهم , الغريب انى طول ما بقرا اجاباته لقيت يها شبه كير قوى معايا لو كنت انا اللى بجاوب , حتى فى الأخر لما هو بعتلى التاج قلت انا مش هتعب فى الإجابة :D
من هو:أحب شخص لقلبك فى الدنيا؟
هو طبعا مش شخص واحد :P
انسان مستعد تضحي بحياتك - ركز فى كلمة حياتك- علشانة؟
مفيش حد يستاهل انى اضحى بحياتى عشانه, مش عشان البشر نفسهم مش كويسين ولا يستاهلوا, لكن عشان حياتى مش ملكى و لما اضحى بيها يبقى فى سبيل الله
اسم أول حب؟
كان اكيد اسم بنت :P
اسم اخر حب(حتى الان)؟
هو نفس اسم البنت اللى فوق :P
بس مع فرق بسيط هو انه مش حتى الان, ده كان زمان :D
ما هو :اسم أجمل كتاب كتبه بشر قرأته ومحتفظ به حتى الان ؟
رواية السيميائى لباولو كويلهو, بس اديتها هدية لجارتى بعد ما اتجوزت و كانت مسافرة و لسه مشتريتش نسخة تانية
اسم كتاب-كتبه بشر برضة- انت متعلق بيه وبتقرأه كل فترة؟
برضه رواية السيميائى لباولو كويلهو مع انى اديتها لجارتى و هى مسافرة بس انا تقريبا حافظها
اهم جهاز منزلى انت متعلق بيه او بتستخدمه كتير ؟
الكمبيوتر طبعااااااا
شىء تحس بالراحة النفسية عندما تنظر اليه ؟
وجه طفل صغير, و يا سلام لو كان بيضحك
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
اسكندرية و خصوصا الحتة اللى قدام القلعة فى بحرى
و مرسى مطروح فى شاطىء عجيبة
مكان تحس بالراحة عندما تدخله ؟
المساجد الأثرية و بيت جماعة قرايبنا فى البلد
اجمل مدينة زرتها داخل مصر ؟
سؤال محير, بس هما 2, اسكندرية و مرسى مطروح
أجمل مكان طبيعي رأيته داخل مصر؟
شاطىء عجيبة فى مرسى مطروح
نوع هاتفك المحمول؟
siemens A65
سرعة بروسيسور جهازك ؟
900 mhz
حجم ذاكرة –هارد- جهازك ؟
40 GB
المساحة التى تشغلها المواد الاسلامية على جهازك ؟
مساحة صغيرة, قرأن كريم فقط و بعض السور مش كلها
نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
خلاص ماشى
أهم هدف انت واضعه لحياتك دلوقتى ؟
انى الف العالم و اكتب عن كل الحاجات اللى هشوفها واعمل البوم صور ضخم بإذن الله
مواصفات فتاة –أو فتى للبنات- الأحلام بالنسبة لك ؟
انها تكون مثقفة و مخها متفتح و عاقلة
و تكون بتحب القراءة و يكون ليها رأى و فكر و اسلوب فى الحياة, مش مجرد عايشة و خلاص
و انها تكون بتقول رأيها فى كل حاجة بصراحه و ميهمهاش حد طالما على حق
م الأخر تكون جريئة و متجددة و فى نفس الوقت رقيقة و حساسة
طبعا مش محتاج اقول انها تكون محترمة و ملتزمة و نعين بعض على الطاعة
صف ما يأتى :شعورك لما بتسمع كلمة مصر؟
الخيبة التقيله..والغربة و الإكتئاب
شعورك لما بتسمع كلام عن اليهود ؟
الحيرة
شعورك لما بتشوف ظابط شرطة ؟
اعرف ظباط محترمين, يعنى مش كلهم وحشين
...شعورك لما بتشوف الكناس العجوز فى الطريق ؟
شعور مركب, بين الحيرة انى مش عارف اعمله حاجة
و النعمة اللى بحس انى عايش فيها
و الإكتئاب ان عندنا ناس كتير -مش شرط كناسين- على نفس الهيئة
لون البطانية اللى بتتغطى بيها فى الشتاء ؟
:Pبتغطى باللحاف
لون الجورب-الشراب- المفضل لديك ؟
اسود و بيج
احساسك اذا داست قدمك فى الطريق على مخلفات اخراج حيوان- *** ولا مؤاخذة-
اكيد بحس بقرف و اشمئزاز
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
بتمني انه يكون بالفعل فاهم دينة مش واخده منظر وبس
احساس يراودك فى اشارة مرور مغلقة بسبب مسئول كبير؟
احساس بالإكتئاب انى مش عايش فى اى حتة تانية
و احساس بالحنين اننا نرجع لأيام الجمل و الخيل, عشان ساعتها مش هيوقفوا الطريق كده
اخر حاجة انى هبعت التاج ده قلمى الحر و زمن الرجال

Sunday, May 13, 2007

سيب الملك للمالك




صديقى شريف بعتلى الصور دى, و كان معاهم صور تانية بس مرضيتش احطها حفاظا على سلامة الفاظ اصدقائى اللى بيجبروا بخاطرى و يزرورونى هنا
بصراحه مكنتش عاوز اعلق عليهم حفاظا على سلامة الفاظى انا لكن مش قادر امسك نفسى الصراحة
الصورة اللى عاليمين بتوضح يعنى ان مفيش اهتمام نوهائى بالعشوائيات و طبعا سكانها اللى هما محدودى الدخل اللى كل جهد الكحومة موجه لرفع مستوى معيشتهم !!!!
و بتوضح كمان منطق الحنوع اللى عايش بيه المصريين, و بيأكد ده الجملة العميقة جداااااااااااااا اللى مكتوب على بلكونة البيت, سيب الملك للماك, لأ و فيه غسيل و محلات فاتحة تحت يعنى فيه حياة فى البيت ده, مع ان لو عملناه لامؤاخده زريبة للبهايم البهايم هتثور و مترضاش تعيش فيه !!!
الصورة التانية بقى احط جنبها مليون علامة استفهام, يعنى المقاول او صاحب العمارة او اى كان المستفيد خلاص هيموت لو مخدش ال 2 متر دول من الشارع؟؟ ولا هو نيته سليمة و عاوز ينور لسكان العمارة و يوفر عليهم كهربا؟؟ ولا يمكن هو عامل العمارة ايجار و عاوز يسهل على الحرامية طلوع العمارة على عامود النور بدل المواسير؟؟ على اعتبار يعنى اننا تقدمنا و لازم نساعد الحرامية انهم يادوا شغلهم على اكمل وجه؟؟ و فين بتوع الحى او البلدية او المسئولين عموما على السرقة دى؟؟ مش دى برضه سرقة من شارع الحكومة؟؟ يعنى الأتنين متر دول بفلوس؟؟ يعنى اهدار للمال العام ؟؟ لكن اللى مستفزنى اكتر هو ان مفيش راجل واحد فى الشارع قادر يقول لأ؟؟ و يبلغ عنه؟؟ طول بناء 3 ادوار محدش خد باله؟؟؟ ولا احنا خلاص اتعودنا اننا نبقى فى حالنا و منقولش لأ على الغلط؟؟؟
رحماك يارب

Saturday, May 12, 2007

المالكى

كتير عندنا فى الأرياف ناس عواجيز حدود معرفتهم اخره الحارة اللى فيها بيتهم, و تلاقى الواحد من دول لا عمره طلع بطاقة ولا حتى راح البندر, ناس طبيعيين و على فطرتهم و تحبهم اول ما تكلمهم و متحبش تسيب قعدتهم
افتكرت الكلام ده كله لما سمعت خبر فى برنامج على قناة فضائية بيقول ان رجل فى السعودية, اسمه المالكى و عايش فى قرية بنى مالك فى جنوب محافظة الطائف, ماله الراجل ده, حاجة بسيطة جدا, عنده 91 سنة و اول مرة يطلع بطاقة فى حياته و يركب عربية, سيارة يعنى !!!!!
الحكاية انه لما تعب و اضطر يروح مستشفى فى جدة كان لازم يتنقل من الطائف لجدة فركب العربية, و طبعا المستشفى كان لازم تسجل بيناته فاضطر انه يطلع بطاقة, خبر غريب بس بيحصل و عندنا منه نماذج كتير قوى فى مصر, المهم ان الخبر اثار عندى شوية نقاط
اولا : ان الراجل اضطر انه يروح المستشفى لما تعب, معنى كده انه اول مرة يتعب و يروح المستشفى فى 91 سنة هو كل عمره, ما شاء الله عليه, عايش فى قرية, الهوا اللى بيتنفسه نضيف, الأكل من غير مبيدات, اللى بيقولوا عليه اورجانيك, شغلته رعى غنم , يعنى طول النهار بيلف وسط الزرع و الخضرة, رياضة كده و هو فى سن كبيرة, غير انه ميعرفش ابعد من حدود قريته
فين بقى الصحة دى عندنا مع كم المبيدات المسطرنة اللى بناكلها طول الوقت؟؟ و ما يصاحب ذلك من زيادة عدد المرضى فى معهد الاورام و معهد ناصر؟؟ بلاش دى, فين الصحة دى عندنا فى شاب عنده 20 ولا 30 سنة و مبيقدرش يشتغل نص شغل الراجل ده؟؟ فين الهوا النضيف اللى خلاص اتشبع بثانى اكسيد الكربون؟؟؟ فين روقان البال و مشاهدة الغروب مع كباية شاى لذيذة كده و ان الواحد ميبقاش شايل اى هم؟؟ فين الإصطباحة بمنظر الخضرة و الغنم و الحياة البدائية اللى مفيهاش اى نوع من انواع التزييف؟؟فين المية النضيفة اللى مفيهاش نفايات؟؟ و الأهم من ده فين النية السليمة اللى اكيد متلوثتش بسبب اخبار القتل و الحرق و الإعتقال و الإغتصاب والتحرش و الفساد و مشاكل المرور و تأخر سن الزواج؟؟؟
ثانيا : ان طول الحلقة 2 مذيعين و هما بيحاولوا يطلعوا بمعانى من الخبر ده , و ازاى ان الواحد ممكن يبدأ فى اى حاجة حتى فى سن متأخر و الكلام ده , و المذسعة التالتة تاعبها قوى فكرة ان ازاى واحد عايش من غير عربية, نفسى افهم يعنى بدل ما نحاول نطلع بالفكرة او الدروس العميقة من الخبر ده برضه بنعالجه بتفاهة, مين بقى اللى وصل الناس التافهة دى لإنها تخاطب عقول الشباب؟؟ هو يعنى عشان برنامج بيخاطب الشباب مينفعش نكلمه فى مواضيع بتهمة بلغته هو؟؟ لازم يعنى تبقى المواضيع تافهة عشان خاطر الشباب؟؟؟؟؟

Friday, May 11, 2007

بهية

المشهد الأول
يجلس سعيد و زوجته الأجنبية مع والده فى البلكونة, و تأتى الأم بصينية الشاى و فى الداخل ينبعث صوت محمد منير بكلمات صلاح جاهين ( مصر النسيم فى الليالى و بياعين الفل, و مراية بهتانة عالقهاوى اوزرها و اطل,مصر السما الفزدقى عصافير معدية, و القلة مملية على الشباك مندية)
ابو سعيد : و ناوى تعمل ايه يابنى بعد ما اتغربت السنين دى كلها؟؟
سعيد : يعنى هاعمل ايه يابابا, هنا مبقتاش بلدى خلاص, انا اتعودت على عيشة برة, و ولادى هيتعلموا برة, هنا مبقاش مكان ينفع للمعيشة خلاص
ابوه : طيب يابنى انت عشت برة و اتعلمت ارجع بقى عشان بلدك
سعيد : يضحك ضحكة سخرية, بلدى؟؟؟ هى فين بلدى دى؟؟ بلدى دى اللى مقدرتنيش و انا متفوق فى الجامعة ولا بشغلانة كويسة ولا بحياة ادمية, افكر فيها دلوقتى؟؟
المشهد الثانى
اخو سعيد فى الجامة يقود مظاهرة طلابية للإعتراض على اعتقال بعض زملائهم مع صياح الطلبة و المطالبة بالإفراج عن زملائهم
المشهد الثالث
نفس المشهد الأول ولكن بإختلاف المكان, الأسرة مجتمعة امام التلفزيون و معهم اخو سعيد, و بعد فترة يطرق الباب بقوة ة يدخل بعض الضباط و يصطحبون اخو سعيد
ابوه :خير يابنى فيه ايه؟؟
الضابط : مفيش يا حاج, شوية و هايرجع علطول
المشهد الرابع
سعيد و المحامى فى المديرية يحاولوا معرفة مكان اخوه بلا فائدة و يقابلوا هناك الكثير من اسر الطلبة يحاولوا معرفة اماكن احتجاز ذويهم
المشهد الأخير
سعيد يودع زوجته فى المطار, و يذهب لقيادة مظاهر للمطالبة بالإفراج عن اخوه و باقى الطلبة و فى الخلفية ينبعث صوت الشيخ امام و يغنى
مصر يامة يا بهية يام طرحة جلابية
الزمن شاب و انتى شابة, هو رايح و انتى جاية
جاية فوق الصعب ماشية, فات عليكى ليل و مية
و احتمالك هو هو, و ابتسامتك هى هى
تضحكى للصبح يصبح, بعد ليلة و مغربية
تلطع السمش تلاقيكى معجبانية و صبية, يا بهييييييييية

Wednesday, May 9, 2007

الزاوج, تانى و تالت و سبعتاشر

كل ما اسمع عن اى حد ابتكر حاجة جديدة فى شغله افرح ان عندنا عقول لسه شغاله, لكن للأسف التجديد مش دايما بيبقى فى محله
قرأت خبر بيقول ان المأذونين عشان يواجهوا الكساد فى حالة الزواج و بالتالى قله رزقهم عملوا عرض مغرى
ان اللى يعقد قرانه ياخد حباية فياجرا هدية !!!!
ايوة, علامات تعجب من هنا للصبح و فاتح بقى مذهول من اللى بقرا, عشان يعنى مش مشاكل الزواج كلها فى الأداء فى العلاقة الزوجية
اصلا هو حد لاقى زواج عشان يبقى عنده مشاكل فى الاداء, غير ان اكتر من نص الشباب تقريبا عندهم كبت جنسى
و لكم فى تحرش وسط البلد عبرة
زى ما يكون مثلا كل الشباب لقى شغل مناسب لإمكانياته و طموحاته و بمترتب كويس
و لقى شقة ايجارها مناسب لدخله, لأ و ربنا رزقه بعروسة اهلها مش بيطلبوا كتير
و اطمئن لمستقبله انه لما يخلف عيل هيعرف يأكله و يشربه و يعلمه و يعالجه لما يتعب
و ان كل ده اتحل و مفاضلش غير الأداء اللى محتاج يتظبط بحباية فياجرا !!!
المأذونين تقريبا ميعرفوش ان معظم حالات الإغتصاب و التحرش الجنسى بتحصل من مراهقين, يعنى عندنا جيل لسه هيطلع عنده كبت جنسى كامل
ده طبعا غير الجيل اللى عدى مرحلة المراهقة و اللى طبعا مش لاقى جواز و ربنا يستر منه و عليه
و تقريبا كمان ميعرفوش ان فيه حوالى 12-14 مليون بنت عدوا سن الزواج, اكيد مش عشان شبابنا مش عارف يجيب فياجرا, لكن عشان شبابنا مش عارف يتجوز اصلا
و بعدين لما انتوا ما شاء الله عليكم مخكم شغال فى الترويج لمهنتكم, ما تأكدوا على اهمية الزواج فى كل عقد قران بتعملوه
و تأكدوا على اساس اختيار الزوج لزوجته( تنكح المرأة لأربع, مالها و جمالها و دينها و نسبها, فاظفر بذات الدين تربت يداك
و تقولوا لأهل العروسة ان اسس الموافقة على الزوج اللى متقدم لبنتهم( اذا جائكم من ترضون دينه و خلقه فزوجوه, إلا تفعلوا تكن فتنة فى الأرض و فساد كبير)
فهموا الناس ان النبى صلى الله عليه وسلم رفض يزوج بنته لأشراف قريش و زوجها للإمام على و هو كان فقير, زوجهاله مقابل درع كان اهداهوله فى الأصل
لكن مش تقولوا حباية فياجرا و كلام فارغ
و اذا المشاكل دى كلها اتحلت و فضل مشكلة الفياجرا, انا هاجيب الفياجرا دى لكل عريس هيتجوز جديد هدية منى بس يتجوزوا !!!!

Tuesday, May 8, 2007

الى كل اللى مش لاقى شغل, ممكن تبقى بتاع كارتة

فى مرة كنت قاعد مع واحدة زميلتى فى الكلية و كانت بترمى اكل للقطط, اصلا كان مجرد ما الأكل يطلع قطط الكلية كلها تتلم حوالينا, المهم لما كانت ترمى اى حتة اكل كنا نلاقى قطط تجرى على اللقمة و قطط تحصلها و تحاول تخطفها و قطط تقف بعيد مستنية اى حاجة تجيلها لغاية عندها او مستنية القطط اللى بتاكل تخلص و تخش هى عالفتات بتاعها, المهم لما شفت المنظر ده بقولها سبحان الله منطق القوى و الضعيف و قانون الغاب موجود حتى بين الحيوانات, لقتها بصتلى بصة غريبة قوى و قالتلى اصلا الإنسان واخده من الحيوانات, قلتلها بس باللى بيحصل اليومين دول واضح ان الحيوانات هى اللى واخداه من البنى ادمين
ستوووووووووووووووووووب, ده كان موقف افتكرته النهاردة الصبح لما حصلت حاجة استفزتنى جدا,
خليكوا معانا, فاصل و سنواصل
خير بقى, النهاردة الصبح و انا رايح الشغل, بيبقى فيه زحمة عالخط اللى بركب منه, فبيبقى فيه عربيات من خط تانى بتحمل الف مسكن
فى نص السكة و فى مكان مبيتغيرش, و على فكرة حصل اكتر من مرة, واحد يوقف الميكروباص و ياخد 2 جنيه!!!! مش عارف باى حق ياخدهم, المهم انه لازم ياخدهم, دول بقى بتوع الكارتة, يعنى اى عربية عشان تشتغل عالخط لازم يدفعوا ال 2 جنيه اتاوه, حتى العربيات اللى مش بتشتغل اصلا عالخط و بيحمل بص الصبح عشان يسترزق وقت الزحمة,برضه لازم يدفع, السواق يدى الراجل جنيه واحد و يقوله دى اول فردة, هادفع الجنيه التانى فى الفردة الجاية يقوله لا, او يديله الفلوس من باب انك مش عاوز تدفع متدفعش, مصاحب ليها نظرة وعيد, من نوعية هكسرلك زجاج العربية, او مش هتشتغل تانى, او العربية هتنسحب, على اعتبار ان الناس دى مسنودين من امناء شرطة مثلا او حتى ضباط, المهم ان فى الأخر السواق بيرضخ و بيدفع, بالذوق بالعافية بيدفع.
السؤال هنا بقى, الراجل منهم مبيحسش انه بياكل فلوس حرام؟؟؟؟
طيب بلاش دى, هنقول مش بيحسوا, او مبيعرفوش حلال و حرام, محدش فيهم بيحس, و لو للحظة انه عالة و بيكسب فلوسه بالبلطجة و عدم احترام الناس؟؟
ولا هما بقى من نوعية ان المجتمع جنى عليهم و محدش هيشغلهم عشان معظمهم اصلا رد سجون و مسجلين خطر؟؟
و بياخدوا حقهم بدراعم و قانون الغاب؟؟
اللى عاوز افهمه بجد, ايه السبب ان قانون الغاب بقى يخيل للواحد انه شىء متأصل فى الإنسان و ان الحيوان هو اللى اخده منه؟؟
اعتقد ان الحيوانات بيبصوا علينا و يتريقوا و يقولوا ايه الناس اللى معندهمش رحمة ولا احساس دول؟؟
و دلوقتى بس فهمت اجابتى العبقرية لزميلتى اللى كانت بتأكل القطط !!!!

friendship

hello my dear friend ! hope you've got this card in time,right to your Birthday !
first of all,wana ilustrate what is written on the card in russia " To the one,who means alot to me,wish you ALMOST all your dreams come true...but that there was always something to dream about still"
so i wish you to find your happiness-whatever it can be, stay healthy,full of optimism,and keep sharing your greatest soul with those whom you consider deserving this !!!

from your russian friend
with all my love
and the best wishes !

Olga


that was words in a card sent 2 me in my birthday from my russian friend whom i never met in real life,second year 2 send me card and chocolates,we have great meaning of friendship away from who thinks bad in a friendship between male and female,here's the example,clear and innocent friendship only with nothing more,to those people,everything is possible !!!
and for my dear friend,thank u so much !!

Monday, May 7, 2007

احيه يابو سوسو احييييييييييييييييييه

كل مرة اقابل فيها د/شاهين ازعل و افرح
افرح عشان عندنا ناس زيه, مخلصة فى شغلها و متجوزة الشغل م الأخر
و ازعل عشان مبيتقدروش ولا بيوصلوا لأى حاجة
د/شاهين ده من الناس اللى أثرت فيا جداااااااااااااااا خلال دراستى بالكلية,كان ليا فيه رأى بقول عنه
ان لو عندنا 1000 راجل من نوعية الراجل ده, كنا زماننا بقينا احسن و اقوى من امريكا و المانيا و اليابان مجتمعين
ليه عشان عنده قدرة عجيبة عالشغل بدون ملل او زهق او تعب, انا فاكر مرة فضل قاعد حوالى 3 ايام فى الكلية مروحش بيته عشان بيشتغل,3 ايام شغل متواصل
و عنده قدره عجيبة على قيادة الناس حواليه و الهامهم و مساعدتهم بدون زهق او تعب
المهم هو عنده ايمان مطلق بإننا فى مصر ممكن نصنع عربية
نصنع ايه يا ولاد,عربية, بتقولوا مين؟؟؟ عربية, عربية فى مصر؟؟ اه والله عربية
النهاردة بقى الموضوع وسع منه شويه, قالى نفسه فى سيارة عربية, يعنى ناخد الفلوس مثلا من دول الخليج, و الفكر من مصر و الشام, و الخبرة من المغرب العربى و نصنع سيارة عربية نواجه بيها تحديات القرن الواحد و العشرين و نقدر بعد 20 سنة نقف قدام الصناعة الكورية مثلا
كلام كبير قوى و جامد جداااااااااااااااااااااا
بس مش صعبة شوية حكاية اننا نتفق على الحوار ده كعرب,
والله يا دكتور مع احترامى الشديد ليك, احترام مطلق, دلوقتى بس انا فهمت جملة سعيد صال الخالدة فى مسرحية العيال كبرت
احيه يابو سوسو احييييييييييييييييييييييه

تبقى انت اكيد اكيد فى مصر

قال ايه بقى, اللى جايب جيد بس هو اللى هيدخل الأنترفيو عشان يسافر
يسافر ايه و اتنرفيو مين ياعم انت
الموضوع ببساطة ان عندى فى الشغل كانوا عاملين اعلان عن تدريب فى الصيف للطلبة فى سوريا و اليمن و الأردن و ليبيا
عادى الحوار, نوع من تطوير التعليم و فتح افاق جديدة امام الخريجين
حاجة كده من الكلام الكبير اللى بنسمعه ده
بس ده اصلا لو فى تعليم عشان نفتح افاق جديدة للخريجين, ما علينا
المهم الناس اللى قدموا جه معاد الانترفيو بتاعهم, و كان على ما سمعت اسئلة عامة
المهم لما كان العدد كبير, قالوا ان اللى جايب اقل من جيد مش هيدخل الأنترفيو,
مش باعتبار انه هيسافر علطول,لأ ده معندوش احتمال انه يسافر اصلا
انا مش معترض عالفكرة, بس ده لما يكون التقدير هو فعلا تقييم الطالب
لان طبعا التعليم مش بيبين القدرات الحقيقة ابداااااااااااااااااااااااااا
انا مش بقول ان فلان احسن من علان
ولا زبيدة احسن من عزيزة
بس الفكرة ان فيه ناس امكانياتهم اكبر من انها تطلع فى تقدير,لكن عشان مش جايبين تقدير مش هيدخلوا الانترفيو
لكن طول ما عندنا الطريقة العقيمة فى الأختيار, تبقى انت اكيد اكيد فى مصر

Friday, May 4, 2007

يوم العمارة

يوم الخميس اللى فات كان يوم جامد جدااااااااا بالنسبة لى


و اعتقد انه هيفضل فى ذاكرتى كتيييييييييييييييير قوى ده ان مكانش هيفضل فى ذاكرتى للأبد


كان احتفال قسم العمارة بهندسة المطرية بيوم العمارة, و تنظيم المعرض اللى المفروض انا مسئول عنه


المهم انه كان يوم اكتر من رائع, فى علاقة الطلبة ببعضهم و علاقة الطلبة بالدكاترة و الأهم بالنسبة لى علاقتى انا بالطلبة و الدكاترة طبعا, لكن علاقتى بالطلبة خصوصا فى اسبوع التحضير للمعرض كان اكتر من رائعة




المهم من غير كلام كتير العيال الطلبة اللى معظمهم بقوا خلاص اصحابى, عملولى مفجأة خلتنى مش قادر اتكلم او اقول اى حاجة, كرمونى ضمن الناس اللى اتكرموا, بصراحة الموضوع فرحنى و رفع معنوياتى جداااااااااااااااا خصوص مع تعليقات دكتور حسن كامل المستفزة,و انا عالمساحة الصغنتوتة دى باقول لهم, متشكر جداااااااااا يا جماعة, كل واحد كان له رأى فى تكريمى او اختيارى بقوله متشكر, صحيح هى كلمة صغيرة, لكن مش لاقى اكتر منها اعبر بيه, خصوصا انكم خلتونى مش لاقى كلام اقوله من فرحتى



دكتور سيف و دكتور اشرف و طبعا دكتورة راندا والمهندس احمد حليم, يعنى مش عارف اقولهم ايه,


ببساطة انا اول مرة احب الشغل ده من ساعة ما جيت فى شهر 12 اللى فات, و لو سبت الشغل ان شاء الله وعد منى هاجى السنة الجاية و ان شاء الله اللى بعدها اشتغل معاكم فى يوم عمارة لغاية ما اللى فى سنة 2 يتخرجوا و بعدها اجى ضيف بقى,عموما انا هاسيب الصور هى اللى تتكلم
عموما هو فيه واحد واطى عالنتوورك بيحمل و ساحب سرعة النت ف مش عارف ارفع صور تانى دلوقتى, لكن لغاية ما اعمل بوست تانى و ارفع فيه بقية الصور, لزوار

المساحة دى من طلبة عمارة, تعليقاتكم مهمة جدااااااااااااااااا ;)

Friday, March 30, 2007

جلست وحدى بجانب الهاتف فى منتصف الليل اطلبها, سألتنى ما بك؟؟ قلت انت تعرفين,ردت اننى هو من يجب ان يقوم بهذا العمل ولا احد سواى, قلت لا اقدر, قالت حاول, قلت لا اعرف, قالت تعلم, قلت مستحيل,قالت جرب,ثم اغلقت الخط, وقتها ادركت, اننى انا, انا فقط هو من يجب ان يهزم هذا الشيطان, شيطان الخوف!!!

Sunday, March 25, 2007

يوم الأربع اللى فات كان يوم غريب
قرأت فيه خبر من اغرب الأخبار اللى قريتها فى حياتى
الخبر ببساطة كان قتل, و مش عارف دى نقول عليها جريمة ولا لأ
اصل لما الواحد يقتل واحد بمسدس ولا يشنقه ولا حتى يسممه نقول عليها جريمة
لكن لما واحد يقتل مراته فى عز ما هو مندمج فى العلاقة الزوجية
دى بقى تبقى جريمة قتل؟؟؟؟؟؟؟؟
الخبر بقى بيقول ان فلانة طلبت من زوجها يقضوا ليلة زى ليلة الدخلة
مش فاهم يعنى اشمعنى الدخلة؟؟ ما كانت تقضيها زى اى ليله و خلاص
المهم الراجل حب يرضيها راح عامل فيها سبع رجالة و واخد حباية فياجرا
راحت طبعا عاملة مفعولها و ضربت الدم فى عروقه و نشاطة زاد و الست ياعينى ماتت
الراجل طبعا اترعب, راح رابط الست فى كرسى و كمم بقها
و بهدل الشقة و خبى فلوس عند صاحبه عشان يبين ان الموضوع وراه سرقة
المهم انه انكشف فى الأخر, بس السؤال اللى محيرنى بقى انه ياترى الراجل عليه مسؤلية جنائية؟؟
يعنى يتحاكم بتهمة العنف اثنائ ممارسةالعلاقة الزوجية مثلا؟؟
و لو اتحكم عليه, هيتحكم عليه انه ميتجوزش لمدة كذا سنة مثلا؟؟
ولا انه ممنوع يستخدم الفياجرا و الأكل المغذى؟؟؟
لا و سمعته بين الستات هتبقى منيلة
مفيش واحدة هترضى تتجوزه, كل واحدة هتخاف على نفسها
ما هو العمر مش بعزقه برضه
و اهه الواحد يبقى اتعلم حاجة, انه ميسمعش كلام واحدة ست !!!

Wednesday, March 21, 2007

العم سام و مايكل و تيتا و اونكل بيهنوا مصر بالتعديلات الدستورية و كل عام و انت بخير

يوم السبت اللى فات قرات خبر بيقول
الولايات المتحدة تشيد بالتعديلات الدستورية فى مصر
و مفاد الموضوع ان امريكا بتقول يعنى ان التعديلات نقلة على طريق الديموقراطية
و تفعيل دور الأحزاب و كلام كبير من النوعية دى
و انا قلت كده بانت لبة الموضوع, امريكا موافقة و بتبارك على التعديلات اللى هنعملها فى مصر
و نحط تحت مصر كام خط لزوم التوضيح
يأكد الكلام ده انتهاء دورات المناقشة و التصويت فى يومين بدل 3 ايام
و تقديم معاد الإستفتاء اسبوع كامل,يعنى اللى مش عاجبة يخبط دماغة فى الحيط
قلت خلاص, بارك الله لكما, و بارك عليكما, و جمع بينكما فى خير
ده على امريكا و التعديلات بتاعتنا,طالما هما مبسوطين منها قوى كده
وخلاص اخدنا الضوء الأخضر اننا نمرر التعديلات الدستورية
او قل نقتل الدستورية و الشرعية
و الموضوع نام لغاية ما النهاردة قرأت خبر بيقول
واشنطن قلقة من التعديلات الدستورية فى مصر
نعممممممممممممممممممممممممممم
هما ايه بقى مالهمش كلمة ولا ايه؟؟؟؟
مرة يشيدوا بيها و مرة يبقوا قلقانين منها؟؟؟
هو شغل عيال ولا ايه؟؟ نظام والله ما انا لاعب معاك غير لما ابقى انا كسبان الأول
و بعدين بلد بحجم و ثقل امريكا ترجع فى كلامها كده فى اقل من اسبوع؟؟؟
امال يعنى مرجعتش فى كلامها ناحية العراق و افغانستان و سيايتها اللى علطول مع اسرائيل ليييييييييييه؟؟؟
ولا يمكن هما بيقولوا ان احنا تحت ايديهم, او بمعنى اصح فى ايديهم؟؟
بس الأكيد و الواضح ان كل الكلام ده مش بيتم غير بعلمهم و موافقتهم و مباركتهم كمان

Tuesday, March 20, 2007

المديييييييييير المدير

سبحان الله, فى الشغل اللى انا فيه صوتى اتنبح على عمال ينظفوا المكان اللى انا فيه
مش عشانى بس عشان المكان نفسه و طبيعته ان بيدخله ناس كتير
ولا حياة لمن تنادى
و من اول ما استلمت العمل كتبت الحاجات اللى ناقصة و بلغت بيها السكرتارية و هما بلغوا بيها الصيانة
و انا بردة بغنى وسط جماعة طرش
و كل حاجة ماشية تبع روتين الحكومة الممل و اللى بيغتال اى ماحولة ابداع
قلت يا واد طنش خااااااااااااااااااااااالص و سيب حبيبك على هواه
و المفروض ان فيه معرض هيقام و لا حد كلمنى ولا قاللى حاجة عشان تجهيزاته خالص
المهم النهاردة لقيت المهندسة مسئولة الصيانة جايبة 2 صنايعية عشان يركبوا الزجاج المكسور
و فى اقل من نص ساعة كان الزجاج متركب
خير خير, اهم بدأو يتحركوا, و انبسطت بقى و قولت خلاص مفيش روتين ولا اى حاجة من دى
بس فرحتى مطالتش, عشان عرفت ان رئيس الجامعة هيزور الكلية ولازم تبقى بتبرق قصاده
يالهوى, هو احنا ايه اللى جرى لنا؟؟؟؟؟؟؟
منتحركش ولا نعمل اى حاجة غير لما يكون المدير هيمر ولا هيفتش
ليه مش بنخاف من ضمائرنا ولا من ربنا زى ما بنخاف من مدراءنا
ليه زيارة المدير او المسئول الكبير كأنها يعنى حج لبيت الله الحرام الكل بيستعد له
و فى الأخر ناس ثورجية يزعلوا لما اقول اننا مش هنبقى زى الغرب ولا بعد 100 سنة
لانهم ببساطة محدش فيهم بيتملق رئيسه, ولا بينافقه ولا بيمسحله جوخ
يالا هنعمل ايه بس
ندعى و نقول
اللهم لا تؤاخذنا بما فعل السفهاء منا