الواحد بقاله مده مدخلش عالبلوج بتاعته, الحتة اللى بيحس فيها انه براحته
الإكتئاب و الملل بقوا ضيوف اعزاء عليا, او على رأى واحدة صاحبتى احنا اللى بقينا ضيوف اعزاء عليهم
يادوبك الإسبوع اللى فات حسيت ان فيه حاجة جديدة
خير اللهم اجعله خير داخل من الباب لقيت تامر بيه امين فى البيت بيتك بيتكلم فى التليفون عالهواء مع محمد ثروت
الراجل كان بيقوله ان ناس قافلين الطريق الساحلى الدولى عشان بقالهم مش عارف كام شهر المية مقطوعة عنهم
و فعلا حجزوا السيارات لمدة حوالى 10 ساعات عشان المحافظة تستجيب لطلباتهم و توصلهم المية الحلوة
و تامر بيه زعلان قوى من الإسلوب غير الحضارى للمطالبة بشوية مية
كان نفسى اسأله لو نزلت السوبر ماركت و ملقتش الميه المعدنية اللى بتشربها هتحس بإيه
المهم الفقرة اللى بعدها كان المفتى جاى يتكلم عن موضوع الختان و الفتوى الجنان اللى طلعها,و دى ممكن نعملها بوست لوحدة اصلا
و تامر امين حكى له على اللى حصل من الأهالى و كده, يقوم بقى فضيلة المفتى بقى ايه
يقوم يناشد الأهالى انهم يفرجوا عن العربيات المحتجزة
و يقولهم ان كده غلط و حرام, و يضرب امثله من مواقف للصحابة بحاجات كويسة
و ضرب مثل لمحافظة الشرقية بالكرم, مش عارف ايه علاقة الكرم بالمية المقطوعة بس ما علينا
و يقول ان ممكن يكون فيه ناس عيانة و مش عارفين ياخدوا دوا السكر
اكيد طبعا واحد رايح الساحل الشمالى و اتأخر هيتعب و يموت كمان
و لا جاب سيرة المحافظة ولا انها المسئولة عن حالة الكبت و الإحتقان اللى وصل الشعب ليها
ولا اتكلم عن اهمية المية للناس اللى مش بيحسوا خالص
ولا ضرب مثل بسيدنا عثمنا لما اشترى نص البئر من الراجل اليهودى عشان المسلمين يشربوا
ولا مثلا عن سيدنا عمر لما كان بيخاف انه يسئل عن بغلة تعثرت فى الطريق
مش كام الف واحد مش لاقيين يشربوا
ولا عن سيدنا ابو بكر لما كان بيصرف امله كله فى سبيل الله
مش مناقصات تغيير المواسير و الله اعلم باللى بيحصل فيها
باختصار خلى الأهالى هما اللى غلطانين وش كده
اللى مش قادر افهمة ان محدش اخد باله ان حالة احتقان زى كده ممكن تعمل ايه؟
و لكم فى اعتصامات العمال عبرة
محدش فكر ان الجوع و العطش ممكن يخلوا الناس يهبوا و يثوروا عشان اللقمة و بق الميه
اما اللى انا متأكد منه بجد ان الحادثة دى هتبقى بداية جنب اعتصامات العمال فى بناء نظام توعية جديد عند الشعب و الناس العادية
ممكن,ممكن فى يوم من الأيام يقوم يثورة
ثورة الناس العطشانة و هما بيطالبوا بكباية مية نضيفة
دلوقتى افتكرت صوت الشيخ امام العميق و الدافى قوى و هو بيغنى و انا بغنى معاه
هلى يا شمس البشاير
طابت و ان الأوان
طلى و حلى الستاير
نور الأشاير يبان
و ارمى الضفاير مداين
فوق المكان و الزمان
مصر الشباب العزيزة
قامت و كان اللى كان
قامت و كان اللى كان
قامت و كان اللى كان
3 comments:
اول مرور لى على مدونتك
جميله ماشاء الله
...
البوست ده بالذات حسيت انى لازم اعلق عليه ، بس مش عارفه اقول ايه اكتر من اللى انت قلته
للاسف مش عارفه نهضة ايه وتقدم ايه اللى احنا عاوزينه وفى ناس لسه بتحارب عشان بق ميه ولقمة عيش _ ميه مش نظيفه وعيش فيه خشب _ بس اهو اسمهم ميه وعيش
انا بصراحه متعاطفه مع الناس دى ربنا يكون فى عونها وفى نفس الوقت مش عارفه لو انا كنت مكان المحتجزين وقاعده 10 ساعات ولا اكتر مش عارفه بردو كنت هعمل ايه..
لكن اللى الكل متفق عليه ان المسؤلين هما السبب ......
معلش اسفه على الاطاله
ربنا يصلح احوالنا عاجلا يارب
هدى...شاكر مرورك و اطراءك
المدونة نورت :)
من ناحية ان المسئولين هما السبب انا متفق معاكى بنسبة 200 %
بس السؤال بقى,ياترى الجيل بتاعنا او حتى الجيل اللى بعدنا ممكن يعمل ثورة عشان يغيروا الوضع ده؟؟؟؟؟
الرد فى الأحداث اللى قلتها فى البوست
و اسف على الرد المتأخر
مجرد اننا فى مدينة نصر كنا من غير ميه لمدة اسبوعين حسينا اننا هنتجنن ومش قادرين نعيش وفيه اللى ساب البيت وراح عند الاقارب فى مناطق فيها ميه
فما بالك بناس مشافتش ميه نضيفة من كام شهر .. واكيد كلموا المسئولين ووجدوا تجاهل دائم لمطالبهم .. فبالتالى الغضب والرغبة فى البقاء هي اللى هتسيطر علي افعالهم
Post a Comment