الى كل اللى مش لاقى شغل, ممكن تبقى بتاع كارتة

فى مرة كنت قاعد مع واحدة زميلتى فى الكلية و كانت بترمى اكل للقطط, اصلا كان مجرد ما الأكل يطلع قطط الكلية كلها تتلم حوالينا, المهم لما كانت ترمى اى حتة اكل كنا نلاقى قطط تجرى على اللقمة و قطط تحصلها و تحاول تخطفها و قطط تقف بعيد مستنية اى حاجة تجيلها لغاية عندها او مستنية القطط اللى بتاكل تخلص و تخش هى عالفتات بتاعها, المهم لما شفت المنظر ده بقولها سبحان الله منطق القوى و الضعيف و قانون الغاب موجود حتى بين الحيوانات, لقتها بصتلى بصة غريبة قوى و قالتلى اصلا الإنسان واخده من الحيوانات, قلتلها بس باللى بيحصل اليومين دول واضح ان الحيوانات هى اللى واخداه من البنى ادمين

ستوووووووووووووووووووب, ده كان موقف افتكرته النهاردة الصبح لما حصلت حاجة استفزتنى جدا,

خليكوا معانا, فاصل و سنواصل

خير بقى, النهاردة الصبح و انا رايح الشغل, بيبقى فيه زحمة عالخط اللى بركب منه, فبيبقى فيه عربيات من خط تانى بتحمل الف مسكن

فى نص السكة و فى مكان مبيتغيرش, و على فكرة حصل اكتر من مرة, واحد يوقف الميكروباص و ياخد 2 جنيه!!!! مش عارف باى حق ياخدهم, المهم انه لازم ياخدهم, دول بقى بتوع الكارتة, يعنى اى عربية عشان تشتغل عالخط لازم يدفعوا ال 2 جنيه اتاوه, حتى العربيات اللى مش بتشتغل اصلا عالخط و بيحمل بص الصبح عشان يسترزق وقت الزحمة,برضه لازم يدفع, السواق يدى الراجل جنيه واحد و يقوله دى اول فردة, هادفع الجنيه التانى فى الفردة الجاية يقوله لا, او يديله الفلوس من باب انك مش عاوز تدفع متدفعش, مصاحب ليها نظرة وعيد, من نوعية هكسرلك زجاج العربية, او مش هتشتغل تانى, او العربية هتنسحب, على اعتبار ان الناس دى مسنودين من امناء شرطة مثلا او حتى ضباط, المهم ان فى الأخر السواق بيرضخ و بيدفع, بالذوق بالعافية بيدفع.

السؤال هنا بقى, الراجل منهم مبيحسش انه بياكل فلوس حرام؟؟؟؟

طيب بلاش دى, هنقول مش بيحسوا, او مبيعرفوش حلال و حرام, محدش فيهم بيحس, و لو للحظة انه عالة و بيكسب فلوسه بالبلطجة و عدم احترام الناس؟؟

ولا هما بقى من نوعية ان المجتمع جنى عليهم و محدش هيشغلهم عشان معظمهم اصلا رد سجون و مسجلين خطر؟؟

و بياخدوا حقهم بدراعم و قانون الغاب؟؟

اللى عاوز افهمه بجد, ايه السبب ان قانون الغاب بقى يخيل للواحد انه شىء متأصل فى الإنسان و ان الحيوان هو اللى اخده منه؟؟

اعتقد ان الحيوانات بيبصوا علينا و يتريقوا و يقولوا ايه الناس اللى معندهمش رحمة ولا احساس دول؟؟

و دلوقتى بس فهمت اجابتى العبقرية لزميلتى اللى كانت بتأكل القطط !!!!