مش عارف ليه كل فترة يتفتح موضوع إرضاع الكبير
و المشكلة ان اللى بيتكلم فيه مش بيوضح مثلا إذا كان الحديث الصحيح عن النبى صلى الله عليه وسلم خاص بحالة سالم مولى ابى حذيفة ولا ممكن يتعمم
اخر حاجة قريتها واحد من المشايخ, حتى مش فاكر اسمه قال ان الموظفة ترضع زميلها فى العمل عشان تحلل الخلوة بينهم فى اوقات العمل !!!
يعنى الست و الراجل اللى بيتقفل عليهم مكتب واحد و محدش يدخله غير بإذنهم, الست تتفضل مشكورة و تلقمه ثديها عشان تحلل الخلوة بينهم
ايوة هو قال كده, الإرضاع بالتقام الثدى مباشرة !!!
يا حلاوة يا حلاوة, لأ و قال انها ممكن تخلغ حجابها قدامه و ان الإرضاع ده لا يحرم الزواج !!!!
والله الموضوع حيرنى خصوصا ان انا موظف ;)
بس مش معايا اى موظفات فى المكتب خااااااااالص, انا لوحدى كده :D
بس تخيلت بقى لو فعلا اخذوا بالفتوى دى, يا نهار ابيض
هتلاقى كل الشباب العاطلين اللى بيكرهوا سيرة الحكومة و شغلها جايبين وسايط عشان يشتغلوا حتى فى البوفية
و هتلاقى فلوس دخول المصلحة الحكومية بقت اكبر من فلوس البترول
و هتلاقى بقى الموظفين اللى موجودين بالفعل بيحبوا الشغل و كل واحد بييجى بدرى
طبعا عشان ياخد الرضعة
و بالنسبة للشباب بقى الشيخ قال ان الإرضاع لا يحرم الزواج, فعنده فرصه انه يجرب اكتر من مصدر ما هو كله بالفتوى بقى
و هتلاقى كمان الراجل من دول بيجتهد انه يترقى عشان يبقى جنب المديرة باعتبار ان الدهن فى العتاقى
و الشباب مبيعملش شغله جامد عشان يفضل جنب المزز من الموظفين
و كل شهرين ولا حاجة لما الراجل من دول يكون رضع من كل الموظفات تقريبا يطلب نقله لمكان تانى
اهه فرصه يجرب برضة حاجة جديدة, احسن من اللبن ابو بودرة سيراميك
ولا الست اللى والدة جديد, صحتها ياعينى هتروح, هتلاحق على ابنها ولا على زمايلها
ولا بقى ممكن بنفس المنطق ترضع المدرسة مثلا طلبة ثانوى باعتبارهم بلغوا الحلم
ياعينى يابنتى لو مدرسة بنين و كل فصل فيه 60 ولا 70 طالب
و كده نبقى لقينا حل لمشكلة التعليم و اختفاء الطلبة و التزويغ
و هتلاقى بقى ناس يطلعوا عالفضائيات و يتكلموا فى حكم الرضعات المشبعات
و يجيبوا فريقين واحد محافظ و التانى مجدد
واحد يقولك خمس رضعات مشبعات عشان تحلل الخلوة بينهم
و التانى بيحلف بأغلظ الأيمان انه لازم يتكرع عشان يبقى شبع
و التالت يأمن على كلام و التانى و يقولك انه لازم يأشط على كتف زميلته و تمسحله بقه بالبافتة عشان يتأكدوا انه شبع
و ساعتها بقى انا هاسمع كلام امى اللى بتقولى امسك فى الوظيفة بإيدك و سنانك عشان مش هتلاقيها تانى
طلع عندها بعد نظر!!!!
2 comments:
قشطة كده الشباب هيعيش وهنلاقى طوابير للرضاعة بدل طوابير العيش وهتبقى ظيطة :)
من كام يوم ظهرت فتوى التبرك ببول الرسول والغريب انها جاءت على لسان مفتى الديار المصرية الشيخ على جمعة يعنى مش شيوخ من شيوخ الفضائيات .. ياترى ايه الفايدة من الفتوى دى اللى انا مش مقتنع صحتها نهائيا لانها تتعارض مع اخلاق سيدنما محمد وتتعارض مع تعاليم دين الاسلام الذي يدعونا للطهارة الوعفة
اعتقد ان وسائل الاعلام خاصة الصحف ليست بالمكان المناسب لاخبار الناس بالفتاوى فالفتوى ليست افعل شئ فهو حلال او لا تفعل هذا لانه حرام .. لكن الفتوى يجب ان تكون مدعمة بالادلة والبراهين المتفق عليها وتحتاج الى تفسير وهذا يتطلب مواجهة مباشرة مع صاحب الفتوى و الجمهور حتى تصل اليه المعلومة دقيقة بعيدة عن اى بلبلة او فهم خاطئ لها مما يسئ الى الاسلام .
والله يا شاب مصرى اكيد انت عارف زى ما انا عارف مين اللى له مصلحة فى إثارة مثل تلك الفتاوى فى الوقت ده,خصوصا فى وسط شعب اغلبه جهلة و غلابة,و اى شىء يمس الدين بالنسبة لهم شىء مقدس, حتى لو كان حقيقته انه بعيد كل البعد عن الدين
و من ناحية تانية لما المفكرين و المثقفين يهاجموا الفتاوى دى, يبانوا قدام الشعب الجاهل المتدين(تدين ظاهرى) انهم بيهاجموا الإسلام و بكده يتحقق الفصل بين مفكرى الشعب و جموع الشعب اللى طبعا فى مصلحة نفس اللى أثار الفتوى
Post a Comment