زمان عمتى الله يرحمها جابتلى قميص هدية و كان عاجبنى جدااااااااااااااااا
بس كان صغير عليا...فقالتلى هتاخده تغيره
لكن انا بقى كنت هموت و البسه...فقولت لابويا البسه و نغسله و نكويه و محدش هايعرف
قاللى النبى صلى الله عليه وسلم قال من غشنا فليس منا
----------------------------------------
ملحوظة: انا كتبت الكلمتين دول لما كبرت عالحاجات الكويسة اللى ابويا علمهالى و اكتشفت انها متنفعش فى الأيام المنيلة بنيلة اللى عايشنها دلوقتى

امل

من كام يوم كده قرينا عن البنت اللى اسمها امل من الغربية اللى اختفت

بنت نصرانية و عندها 18 سنة و بيقولوا ان المسلمين خطفوها يعنى عشان تتأسلم

المهم يعنى ملخص القصة ان البنت اخدت اذن من شغلها ساعة وو من ساعتها مرجعتش

النهاردة يبقى بقالها حوالى 10 ايام

المهم يعنى قالوا انهم شافوها مع واحدة منتقبة

و بعد ما اختفت بكام يوم اتصل واحد اسمه محمد عبد الله و قال لابوها ولا لأمها مبروك بنت ربنا هداها

راحت المباحث جايباه و حققوا معاه و سابوه

يعنى بصراحة مش عارف اقول ايه,قصة بقت سخيفة جدا الصراحة

اى حد يختفى من مسلمين ولا نصارى يتهموا الأخر انه بيأسلمه ولا بينصره

مبدأيا كده مفيش دين يتأثر بدخول الف ولا خروج 10

و بعدين يعنى هى اول ما تحتفى كده تبقى تأسلمت

يعنى حتى مش يستنوا يوم ولا اتنين ممكن تكون فين حتى

لا و الأخوة الأقباط عاملين اعتصام فى الكنيسة من ساعتها

و باعتين رسايل لشيخ الأزهر و رئيس الجمهورية و مشعارف مين تانى

انا مش بتكلم فى ملابسات الأختفاء ولا حتى اسلامها لو كان حصل

انا بتكلم فى الطريقة اللى بنعالج بيها مشاكلنا الداخلية

و نحط 100 خط تحت الداخلية دى

اللى الناس مش واخدة بالها منه ان فيه ايادى خفية تلعب عشان تقوض اساس الوطن

ده ان كان لسه متبقى بقية من الوطن

و انهم يخلوا فيه طائفية و تبقى حجة عشان ييجوا عندنا

و يتكرر عراق تانى و لبنان تانى و ابوغريب تالت و رابع

الناس دى بقى مالهمش حل, لانهم زى الطفيليات اللى عايشة على امتصاص الغذاء من النباتات

طبعا مش هنقطع النبات

لكن بالنسبة للفرع اللى سايب الطفيليات تتغذى عليه انا بقى بهديله الصور دى يمكن يفوق

افيال,نسانيس,قرود.....احمدك يارب

والله مش عارف احنا هنوصل لغاية فين بالفساد المتفشى فينا ده زى الوباء

و مش عارف احنا بنتقدم ولا بنتأخر ولا بنعمل ايه بالظبط

ولا عارف تصنيفنا وسط الدول عموما

بس الأكيد اننا بقينا حاجة كده مينفعش تتصنف

بقينا اضحوكة بين كل الدول والله باللى بنعمله ده

المقدمة الطويلة العريضة دى بس عشان الخبر الجامد جدا اللى قريته لسه حالا طازه

قال ايه باه,عشان يعنى الناس تاكل لحمة و تتظبط و تشرب شوربه بقى و كده

رجل اعمال سكندرى استورد لحمة افيال من الهند !!!!

طبعا مش هيخلى الناس تاكل افيال

لكن اللحمة عجوزة و عمرها اكتر من 5 سنين,فبيسومها افيال يعنى

المهم ان الموضوع ده مخالف للوائح اللجنه الطبية البيطريه

و اللى يضحك بقى ان اللجنة الطبية البيطرية دى كانت مع الراجل ده فى الهند و هو بيشترى اللحمة عشان يكشفوا عليها

و الرجل كتر خيره مد اقامة اللجنة 10 ايام بدون ابداء اسباب

طبعا ما هى الهند ام العجايب يمكن يتعاقدوا كمان على شوية نسانيس و بقر من اللى بيوقف الشارع هناك

و خلى الناس تاكل,دول شوية جعانين هيدقوا يعنى على اللحمة بتاعة افيال ولا قرود ولا حتى هنود

و اللحمة هتنزل فى السوق و الناس هتاكلها,غلابة نفسهم ياكلوا لحمة و بيفكروا انهم ياكلوها حتى لو هيموتوا بعد ما ياكلوها

و بعدين الكيلو بتاعها ب 9 جنيه

يعنى ارخص من كيلو الجبنة !!!

المهم ان اللى وافقوا على دخول الحاجات دى مصر ميبقوش يعيطوا زى ما حضل بعد لحمة توفيق عبد الحى ولحوم النسور و الصقور

اللى كان اكلها للناس من حوالى 20 سنة

قتل الملائكة

النهاردة خير اللهم اجعله خير كانوا جايبين على 90 دقيقة حاجة غريبة
بنت اتعرضت للإغتصاب و جابت طفلة
خبر ممكن نسمعه كتير وسط الكم الهائل من حوادث الإغتصاب اللى بيفرزها مجتمع عنده كبت جنسى جماعى
لكن الغريب فى الموضوع ان البنت اللى اتعرضت للإغتصاب عندها 11 سنة !!!!!!!!!!!!
ايوة الواحد يفتح بقه من هنا للصبح,على القرف اللى حسيته لما سمعت الموضوع ده
يعنى الاستاذ اللى نفسه طاوعته انه يغتصب ملاك ,الدنيا فضيت من الستات او البنات فيغتصب طفلة؟؟؟؟؟؟؟
---------------------------------------------------------------------------------------
هو انا كان نفسى اكتب رأيى فى الموضوع ده بس حاسس بإحباط جامد
و فى نفس الوقت مخنوق و متضايق من حالة الكبت الجنسى اللى وصللها الشباب
مش عارف احنا وصلنا او هنوصل لغاية فين بالوضع ده
كل اللى حاسسه انى حاسس بغربة,غربة جامدة

ثورة العطشى, و الباقى فى السكة

الواحد بقاله مده مدخلش عالبلوج بتاعته, الحتة اللى بيحس فيها انه براحته

الإكتئاب و الملل بقوا ضيوف اعزاء عليا, او على رأى واحدة صاحبتى احنا اللى بقينا ضيوف اعزاء عليهم

يادوبك الإسبوع اللى فات حسيت ان فيه حاجة جديدة

خير اللهم اجعله خير داخل من الباب لقيت تامر بيه امين فى البيت بيتك بيتكلم فى التليفون عالهواء مع محمد ثروت

الراجل كان بيقوله ان ناس قافلين الطريق الساحلى الدولى عشان بقالهم مش عارف كام شهر المية مقطوعة عنهم

و فعلا حجزوا السيارات لمدة حوالى 10 ساعات عشان المحافظة تستجيب لطلباتهم و توصلهم المية الحلوة

و تامر بيه زعلان قوى من الإسلوب غير الحضارى للمطالبة بشوية مية

كان نفسى اسأله لو نزلت السوبر ماركت و ملقتش الميه المعدنية اللى بتشربها هتحس بإيه

المهم الفقرة اللى بعدها كان المفتى جاى يتكلم عن موضوع الختان و الفتوى الجنان اللى طلعها,و دى ممكن نعملها بوست لوحدة اصلا

و تامر امين حكى له على اللى حصل من الأهالى و كده, يقوم بقى فضيلة المفتى بقى ايه

يقوم يناشد الأهالى انهم يفرجوا عن العربيات المحتجزة

و يقولهم ان كده غلط و حرام, و يضرب امثله من مواقف للصحابة بحاجات كويسة

و ضرب مثل لمحافظة الشرقية بالكرم, مش عارف ايه علاقة الكرم بالمية المقطوعة بس ما علينا

و يقول ان ممكن يكون فيه ناس عيانة و مش عارفين ياخدوا دوا السكر

اكيد طبعا واحد رايح الساحل الشمالى و اتأخر هيتعب و يموت كمان

و لا جاب سيرة المحافظة ولا انها المسئولة عن حالة الكبت و الإحتقان اللى وصل الشعب ليها

ولا اتكلم عن اهمية المية للناس اللى مش بيحسوا خالص

ولا ضرب مثل بسيدنا عثمنا لما اشترى نص البئر من الراجل اليهودى عشان المسلمين يشربوا

ولا مثلا عن سيدنا عمر لما كان بيخاف انه يسئل عن بغلة تعثرت فى الطريق

مش كام الف واحد مش لاقيين يشربوا

ولا عن سيدنا ابو بكر لما كان بيصرف امله كله فى سبيل الله

مش مناقصات تغيير المواسير و الله اعلم باللى بيحصل فيها

باختصار خلى الأهالى هما اللى غلطانين وش كده

اللى مش قادر افهمة ان محدش اخد باله ان حالة احتقان زى كده ممكن تعمل ايه؟

و لكم فى اعتصامات العمال عبرة

محدش فكر ان الجوع و العطش ممكن يخلوا الناس يهبوا و يثوروا عشان اللقمة و بق الميه

اما اللى انا متأكد منه بجد ان الحادثة دى هتبقى بداية جنب اعتصامات العمال فى بناء نظام توعية جديد عند الشعب و الناس العادية

ممكن,ممكن فى يوم من الأيام يقوم يثورة

و الدليل اهه

ثورة الناس العطشانة و هما بيطالبوا بكباية مية نضيفة

دلوقتى افتكرت صوت الشيخ امام العميق و الدافى قوى و هو بيغنى و انا بغنى معاه

هلى يا شمس البشاير

طابت و ان الأوان

طلى و حلى الستاير

نور الأشاير يبان

و ارمى الضفاير مداين

فوق المكان و الزمان

مصر الشباب العزيزة

قامت و كان اللى كان

قامت و كان اللى كان

قامت و كان اللى كان

كلمة واحدة

احلامى المبعثرة

اتنين

من ساعة ما عرفت ان وجيه عزيز هيغنى فى الساقية عملت حسابى انى احضر

شجعنى على كده اصحابى اللى قالولى هنروح مع بعض

الصراحة انا مكنتش سمعته قبل اليوم الجامد ده, كنت قريت عنه بس و سمعت عنه من اصحابى

لكن لما روحت لقيت حاجة تانية خالص

لقيت ان اللى قريته و اللى سمعته عنه لا يوفيه حقه ابدا

بيغنى بكل حواسه و مش بيغنى اى كلام

و الحانه و الفن اللى بيقدمه بوجه عام حاجة كده تستحق ان مصر تنتسب للراجل ده

زى ما بتنتسب للاهرام و ابو الهول و شرم الشيخ

بمعنى اننا نفخر ان عندنا فنان بالشكل ده

لما دخلت القاعة اصلا بالعافية لقيت مكان عالسور, زحمة رهيبة, ناس بتحب الفن اللى بجد

خصوصا ان كان معاه الشاعر على سلامه كاتب معظم اغانيه

م الأخر كانت امسيه جامدة جدااااااااااااا هما الأتنين مع بعض

وجيه عزيز و على سلامة

و مع وجيه عزيز اغنى

قول معايا قول بجد

قول معايا قول بجد

هى عيشة ولا موتة ولا فوته فى حارة سد

قول لحد أى حد

قول لحد أى حد

حد رايح حد غايب حد جاى

حد لسه فينا فايق حد حى

قول ياعم, قول يا هم

قول لحد لسه فيه عنده دم