لبنان..الصبية المنيحة

مش عارف ايه فكرنى بالأعتصام المفتوح بتاع المعارضة اللبنانية اليومين دول

يمكن عشان الأضراب اللى بيعمله اتحاد العمال امام وزارة المالية؟؟

يمكن...

يمكن عشان بعد طول الأعتصام, و مفيش استجابة من الحكومة لطلباتهم؟؟

يمكن...

ولا يمكن عشان اعجابى انا اصلا بكل ما هو لبنانى, الأكل و الحلويات و اللهجة اللى بتاخد العقل؟؟

و طبعا ببنات لبنان؟؟

برضة يمكن....

لكن المهم ان الأعتصام اللبنانى جه على بالى بعد ما كان خلاص قرب يتنسى..

اهم حاجة عندهم انهم ملتفين حوالين هدف واحد...

امه واحدة...

مع العلم ان لبنان فيها عدد كبير جدا من الأتجاهات الدينية و السياسية

و اللى نسى يفتكر الحرب الأهلية اللى اكلت لحمهم و مصت دمهم 15 سنة...

لما افتكرت موضوع الإعتصام و اعجابى بالتفاف كل اللبنانيين بجميع طوائفهم حواليه

افتكرت حوار قرأته مع بنت لبنانية نزلت مصر وقت الحرب الأخيرة

قالت بلهجتها الجميلة و الصافية زى قلوب اللبنانيين...

لما كان بييجى الضرب كنا نطلع عالجبل

كنت تلاقى البيت الواحد فيه تلات عوايل

عائلة مسيحية صاحبة البيت, و عائلة سنية و عائلة شيعيه

حد يربط ده باللى بيحصل من تعصب بين افراد الأمة الواحدة!!

و الشعب الواحد!! ...

مش فيه هنا ناس متعصبين,

سواء مسلمين ولا مسيحيين؟؟

اعتقد ان بعد الكلام اللبنانى الجميل ده

لازم كل العرب يفكروا فيه و يتعلموا منهم

ولا ايه؟؟

اه بالمناسبة,انا رأييى انهم يغيروا اسم ساحة رياض الصلح اللى المعارضة عاملة فيها الأعتصام

يخلوا اسمها رياض الجنة

احنا كلنا ممكن نعمل جنه عالأرض,

جنة فى وطن كل اولاده بيحبوه و ملتفين حواليه

جنة فى وطن كرامته محفوظة بين الأمم

جنة فى وطن كرامة المواطن فيه ليها ثمن

ولا ايه؟؟؟