يوم الجمعة اللى قبل اللى فاتت اول ما صحيت من النوم كنت سامع صوت الترانيم جاى من الكنيسة اللى ورا البيت
الصراحة, للحظة واحدة اتضايقت من الصوت العالى مع انى كنت صحيت من النوم خلاص
بس فكرت فى الموضوع, صوت ترانيم و صلوات جاية من الكنيسة, ايه اللى يضرنى فى كده؟؟؟
خصوصا ان المربع اللى انا ساكن فيه, موجود فيه حوالى 6 مساجد و دى الكنيسة الوحيدة اللى فيه, مع العلم ان اقرب كنيسة مش اقل من 10-15 دقيقة مشى
و غنى عن الذكر طبعا ان صوت الأذان فى المكيروفون 5 مرات فى اليوم, و فى الصلوات الجهرية كمان
ده طبعا غير اذان الفجر لوحده, عشان بيبقى فى وقت الناس كلها نايمة, ف لو المسلم بيصى عشان يصلى فرض ربنا
المسيحى يصحى ليه؟؟
المهم انى ملقتش مبرر لأنى اكون متضايق من الصوت اللى جاى من الكنيسة,لأن كل واحد من حقة يقيم شعائر دينه زى ما يحب
-------------------------------------------------------------------------------------------------------
نفس اليوم بقى فى صلاة الجمعة, فى النص التانى من الخطبة الإمام اتكلم عن موضوع الفتنة الطائفية اللى كان حصلت من اسبوعين فى العياط
و قال ان الجانبنين محتقنين بسبب الإقتصاد الضعيف و الفقر و الغلاء و انحطاط الأخلاق و غيرهم من الأسباب اللى احنا عارفينها
و بعدين وجه كلامه للمسلمين قال ان لو المسيحى عنده مبدأ احب مخلصيك و اكرم اعدائك و من ضربك على خدك الأيمن صعر له خدك الأيسر
ف احنا عندنا قول الله تعالى " خد العفو و أمر بالعرف و أعرض عن الجاهلين
كذلك قول الله تعالى " لا ينهاكم الله عن الذين لم يقاتلوكم فى الدين أو يخرجوكم من دياركم أن تبروهم و تقسطوا إليهم
و ضرب امثله من السيرة عن عمرو بن العاص مثلا لما كان بيدى الأقباط مال عشان يبنوا كنائس
و عن سيدنا عمر لما رفض يصلى فى الكنيسة فى بيت المقدس و قال لو صليت هنا لأخدها المسلمون و قالوا لقد صلى عمر هنا
و سأل ايه اللى هيضر المسلمين ان الأقباط يحولوا منزل عادى لمكان عبادة؟؟
و غيره من الكلام الكثير اللى له معنى و دلالات عميقة
انا الصراحة انبسطت من كلامه, خصوصا انه بيتوافق مع اللى حصلى يومها الصبح
و كنت مبسوط ان عندنا خطباء بيعرفوا يتكلموا فى الدين ازاى و انه بيربط بين الدين و الدنيا
و يومها خرجت من الصلاه و انا متكيف قوى
--------------------------------------------------------------------------------------------------------
الجمعة اللى هى امبارح بقى, اول ما الخطيب بدأ يتكلم حسيت باختلاف الصوت, لغاية ما اتكلم كلمتين كمان عرفت انه غير الخطيب اللى بيخطب كل مرة
صحيح ان الخطيب ده بييجى من وقت للتانى, بس اشمعنى الجمعة دى؟؟؟
بعد اللى قاله الخطيب الأولانى الجمعة اللى فاتت؟؟
و اللى أكد لى الموضوع ده انى لقيته بيتكلم عن ايه؟؟؟؟؟؟؟
عن الغيبة و النميمة!!!!!
صحيح هى الغيبة و النميمة حاجات فى الدين و الناس لازم تعرفها
بس محدش تقريبا مش عارف الغيبة و النميمة
و بعدين احنا بنقول الواحد يختار التوقيت المناسب
يعنى مينفعش فى وقت كل الناس بتفتى, و تلاقى واحد بيقولك إرضاع الكبير
و تلاقى واحد يقولك التبرك ببول الرسول صلى الله عليه و سلم
و يكون عندنا مواجهات طائفية بين مسلمين و اقباط
ناهيك طبعا عن الفساد بأشكاله و اللى منهم الرشوة
و ييجى فى الاخر يقول الغيبة و النميمة !!!!
ولا احنا كل واحد بيقول كلمة حق مبيعشلوش صوت !!!!
2 comments:
انت قولتها بنفسك شيخ الجمعة اللى قبلها قال كلام كيفك وخلاك تحس ان قد ايه جميل ان مواضيع خطب الجمعة تربط بين الدين والاحداث الى بتحصل حولينا .. وزى ما انت عجبك كلام الشيخ فيه غيرك كتير عجبهم كلامه والاكيد انه لو تكررت خطبه بنفس الاسلوب هيكون ليه قاعدة جماهيرية كبيرة وبالتالى يطلع عمرو خالد جديد .. واخوانا البعده مش عايزين يحصل كده فبالتالى غيروه وجابوا شيخ الجمعة اللى فاتت اللى بيقول كلام سمعناه كتيييير فى خطب الجمعة عن النميمة والصدق والامانة ووو
تحياتى :)
شاب مصرى, اولا اسعدتنى زيارتك و متابعتك للمدونة,ربنا يكرمك
ثانيا بقى ان احنا خلاص اتعودنا على اننا نكسر عظام كل صاحب رأى و فكر و اى حد بيحاول يفهم الناس صح
عموما حتى لا نسبق الأحداث انا هستنى الجمعة الجاية اشوف لو مش هيخطب تانى ولا ده كان حادث عرضى بس
مبسوط بأراءك و طريقة تفكيرك :)
Post a Comment